ރޭ ރޯވި ސައިކަލްތައް ކައިރީގައި އެމްއެންޑީއެފްގެ އަލިފާން ނިވާ މީހަކު މަޑުކޮށްލައިގެން: ފަސް ސައިކަލެއް ވަނީ އަނދާފައި
ގަސްތުގައި ކަމަކަށް ނުބެލެވޭ؛ ސައިކަލުތަކުގައި ރޯވީ މަތިން ވެއްޓުނު ހުޅުކޮޅަކުން
ރޭ ދަންވަރު ސައިކަލުތަކެއްގައި ރޯވެފައިވާއިރު އެއީ ބަޔަކު ގަސްތުގައި ހިންގި އަމަލެއް ކަމަށް ނުބެލެވޭ ކަމަށް ފުލުހުން މިއަދު ބުނެފި އެވެ.
ވީ ކިހިނެއް؟ - ރޭ 12:30 ހާއިރު ރޯވެފައިވަނީ ހ. ޕެޓްރޯލް ޝެޑް ކައިރީ، މެހެލި ގޯޅީގައި ހުރި ސައިކަލްތަކެއްގަ އެވެ. އެ ހާދިސާގައި ފަސް ސައިކަލެއް، ބޭނުން ނުކުރެވޭ ވަރަށް ވަނީ އަނދާފަ އެވެ.
ފުލުުހުންގެ ބަސް - ފުލުހުން ބުނިގޮތުގައި މިހާތަނަށް ބެލިބެލުމުން، އެއީ އޮޅުމަކުން ހިނގާފައިވާ ކަމެކެވެ. އެ ހާދިސާ ހިނގިތަނުގެ ވީޑިއޯއަށް ބަލާއިރު، ކައިރީގައި ހުރި އިމާރާތުން، ސައިކަލުތަކާ ދިމާއަށް ހުޅުކޮޅެއް ވެއްޓޭތަން ފެންނަ ކަމަށް ފުލުހުން ބުންޏެވެ. އެކަމަކު އެއީ:
-
ސީދާ ސައިކަލުތަކަށް އަމާޒުކޮށްގެން، ވައްޓާލި ހުޅުކޮޅެއް ކަމަށް ނުބެލެވޭ ކަމަށް ފުލުހުން ބުނޭ
މަތިން ވެއްޓުނީ ކޮން ކަހަލަ ހުޅުކޮޅެއް ކަމެއް އަދި ސާފެއް ނުވެ އެވެ.
ފާހަގަކޮށްލެވޭ - ސޯޝަލް މީޑިއާގައި އާންމުވެފައިވާ ވީޑިއޯތަކުން ފެންނަ ގޮތުގައި ސައިކަލްތަކުގައި ރޯވި ވަގުތު ވަރަށް ބޮޑަށް މުޅި ސަރަހައްދަށް ހުޅުގަނޑު ފެތުރިފައި ހުއްޓެވެ. އަދި ބައެއް މީހުން އަލިފާންގަނޑު ނިއްވުމަށް މަސައްކަތް ކުރާތަން ވެސް ފެނެ އެވެ.
ގުޅުންހުރި - މި ހާދިސާ ހިނގީ، ހޮޓަލް ޖެން ކައިރީ، ޕާކިން ޒޯންގައި ބަހައްޓާފައި ސައިކަލުތަކެއްގައި ރޯކޮށްލިތާ ދެ ހަފުތާ ވެސް ނުވަނީހެވެ. އެ ފަހަރު ފުލުހުން ވަނީ އެ މައްސަލައިގައި މީހަކު ވެސް ހައްޔަރުކޮށްފަ އެވެ.
ކޮމެންޓް (1)
އަނދިރި