އުނގޫފާރުގައި ކަރަންޓުގައި ޖެހުނު ޒުވާނާ މަރުވެއްޖެ

ރ. އުނގޫފާރުގައި ކަރަންޓު ޖެހިގެން ފަރުވާ ދެމުންދިޔަ ޒުވާނާ މިއަދު މަރުވެއްޖެ އެވެ.

ވީ ކިހިނެއް؟- އުނގޫފާރު މަގެއްގައި އޮތް ފެންގަނޑަކަށް ކަަރަންޓް އައުމުން ދެ ކުއްޖަކު ސަލާމަތް ކުރަން އުޅެނިކޮށް ކަރަންޓުގައި ޖެހި ހާލު ސީރިއަސްވި 18 އަހަރުގެ ހުސެން އަތީކަށް ފަރުވާ ދެމުން އަންނަތާ 15 ދުވަސް ވެއްޖެ އެވެ. އާއިލާއިން ބުނާގޮތުގައި މިއަދު 10:30 އެހާކަންހާއިރު އޭނާ މަރުވީ ވެންޓިލޭޓަރުގައި ފަރުވާ ދެމުން ދަނިކޮށް، ހޭ ވެސް ނާރަ އެވެ.

"ހަމަ ދާދި ދެންމެއަކު އެ ނިއާވީ،" ހޮސްޕިޓަލުގައި ހުރި އަތީކުގެ ބޭބެއަކު ބުންޏެވެ.

އޭނާ ބުނިގޮތުގައި އަތީކު ވަޅުލާނީ މާލޭގަ އެވެ.

އެނގުން މުހިންމު - މިދިޔަ މަހުގެ 23 ވަނަ ދުވަހު ހިނގި އެ ހާދިސާއަށް ފަހު އަތީކަށް އެންމެ ފުރަތަމަ ފަރުވާދިނީ އުނގޫފާރު ރީޖަނަލް ހޮސްޕިޓަލުގެ އައިސީޔޫގަ އެވެ. އިތުރު ފަރުވާއަށް އަތީކް މާލެ ގެނައީ މިދިޔަ މަހުގެ 24ގަ އެވެ.