ސްޓެލްކޯގެ މާލޭ އިންޖީނުގެ: މިދިޔަ މަހުގެ ކަރަންޓު ބިލް ބޮޑުވެގެން ގިނަ ބަޔަކު ދަނީ ޝަކުވާ ކުރަމުން (ދައުރު ފޮޓޯ/ހުސައިން ސުނޭން)
ކަރަންޓު ބިލް މާ ބޮޑީތަ؟ ކުޑަކުރެވޭނެ ގޮތް އިންޖިނޭރަކު ކިޔައިދީފި
މި ދުވަސްވަރު އެންމެ އަޑުގަދަކޮށް ދެކެވެނީ، ސްޓެލްކޯއިން ފޮނުވި މިދިޔަ މަހުގެ ކަރަންޓު ބިލް ބޮޑު ވާހަކަ އެވެ. ގެ ފަޅަށް ހުރި އިރު ވެސް އެތައް ހާހެއްގެ ބިލެއް އައި ވާހަކަ އެވެ. މާޗު މަހާއި އޭޕްރީލް މަހު ކަރަންޓު ބިލް ބޮޑުވީ ހޫނު ގަދަވެގެން ކަމަށް ސްޓެލްކޯއިން ބުނާއިރު، މިދިޔަ ވިއްސާރަ މޫސުމަށް ފަހު ވެސް އެހާ ބޮޑު ބިލެއް އައި ވާހަކަ އެވެ.
އެއާ އެކު، ބައެއް މީހުންނަށް، މިހާރު ސްޓެލްކޯ ވެފައިވަނީ 'ވައްކަން' ކުރާ ތަނަކަށެވެ. އެކަމަކު އެކަން ސްޓެލްކޯގެ އިންޖިނިއަރު އަލީ ނިޔާޒަކަށް ގަބޫލެއް ނުކުރެއްވެ އެވެ.
"ވަގަށް ގޮވުމުގެ ކުރިން، ލިބުނީ ކޮން ދުވަސްވަރެއްގެ ބިލެއްތޯ އެއްވެސް ބޭފުޅަކު ބަލާލިންތަ؟،" ފޭސްބުކްގައި އޭނާ ލިޔުއްވި އެވެ.
ނިޔާޒު ވިދާޅުވި ގޮތުގައި މިދިޔަ އެންމެ ހޫނު ދުވަސްވަރު، އެވްރެޖްކޮށް 110-113 މެގަވޮޓްއާ ދޭތެރޭ ޑިމާންޑެއް މާލޭ ސަރަހައްދުގައި އޮތެވެ. އެހެންވެ، ޖެނެރޭޝަން ކެޕޭސިޓީ އިތުރުކޮށް، އިތުރު އިންޖީނުތައް ހިންގަން ޖެހުނެވެ. ނިމިދިޔަ 'ބިލިން ސައިކަލް'ގައި ހޫނުމިން އިހުސާސްކުރެވޭ މިންވަރު 44 ޑިގްރީ ސެލްސިއަސްއަށް ވެސް އެރި ކަމަށް އޭނާ ވިދާޅުވި އެވެ.
"އެކަމަކު ގޭތެރޭގައި ހުރީ ހަމަ ޗިލްކޮށް 25 ޑިގްރީގައި؟" ނިޔާޒު ލިޔުއްވި އެވެ.
އޭސީ ނުޖައްސާއިރު ގޭތެރެ 30 އާއި 35 ޑިގްރީ ސެލްސިއަސްއާ ދެމެދު ހުރި ނަމަވެސް 25 ޑިގްރީ ސެލްސިއަސްއަށް ވުރެ ދަށްކޮށް އެ ވަރުގައި ހިފަހައްޓަން އޭސީން ކުރަން ޖެހޭ މަސައްކަތް ހިތަށް އަރުވާލިޔަސް ރޮވޭ ހުވާ. ހާދަ އެނާޖީއެކޭ."
އޭނާ އެދިވަޑައިގެންނެވީ ހޫނުމިން އިހުސާސްކުރެވޭ ވަރު 40-45 ޑިގްރީ ސެލްސިއަސްގައި ހުރެފައި ތިރިއަށް އަންނަން ކުރަން ޖެހޭނެ މަސައްކަތް ވިސްނާލުމަށެވެ.
"މިއީ އަދި އޭސީ އެކަނި. ކޮބާ އަދި ފްރިޖު. އެ އަދި މާ ބޮޑަށް ޓެމްޕަރޭޗަރު ދަށް ކުރަން ޖެހޭ އެއްޗެހި. އާ އެއްޗެހިތަކެއް ގެޔަށް އިތުރު ކޮށްގެނެއް ނޫން ހަމައެކަނި ބިލަށް އަސަރު ކުރާނީއެއް،" ނިޔާޒު ވިދާޅުވި އެވެ.
ކަރަންޓު ބިލް ކުޑައކުރާނީ ކިހިނެއް؟
ކަރަންޓު ބިލް ބޮޑުވަމުންދާ ގޮތް، ސްޓެލްކޯގެ އެ އިންޖިނޭރަށް އެނގިވަޑައިގަންނަވަ އެވެ. އެހެންވެ ދެން އޭނާ ކިޔައިދެއްވީ ބިލް ކުޑަކުރާނެ ގޮތެވެ. އެގޮތުން:
-
އޭސީ ސާވިސްކޮށް. ގޭސް ލެވެލް ޗެކްކޮށްލުން؛ ގޭސް ލީކެއް އުޅޭ ނަމަ އެކަން ހައްލުކުރުން
-
ފުލް ސާވިސްއެއް ނުކުރި ނަމަވެސް މަހަކު އެއް ފަހަރު ކަހަލަ ގޮތަކަށް އޭސީގެ އައުޓް ޑޯ ޔުނިޓާއި އިންޑޯ ޔުނިޓުގެ 'ކޯ ކަނޑު' ދޮވެލައި ފިލްޓަރުތައް ސާފުކޮށްލުން
-
އައުޓް ޑޯ ޔުނިޓް އިނީ ވައި ދައުރުވައި ހޫނު ގަދަ ނޫން ތަނެއްގައިތޯ ޔަގީންކޮށްލުން
-
އޭސީކޮށްފައި ހުރި ތަންތަނުގެ ދޮރު ދޮށުން، ފިނި ވައި ލީކުވާ ގޮތަށް ހުރި ނަމަ، އެ ތަނަށް ޕެކިނެއް ލައި ބަންދުކޮށްލުން
-
ބަދިގޭގެ އުނދުނާ ވީހާވެސް ދުރުގައި ރެފްރިޖަރޭޓަރު ބެހެއްޓުން
-
އޭސީކޮށްފައި ހުރި ތަންތަނުގެ ބިއްލޫރި ދޮރުތަކުގައި ވީހާ ވެސް ބޯ ދޮރުފޮތި ދެމުން
-
ތަނާ އެކަށީގެންވާ ވަރުގެ އޭސީއެއް ހަރުކުރުން
-
ބަދިގެ އާއި ސިޓިންރޫމު އެއްކޮށް ހުންނަ ނަމަ، ކައްކާއިރު ސިޓިންރޫމުގައި އޭސީ ނުޖެއްސުން
-
ބޭރަށް ދަމުން ވީހާވެސް ގިނަ އެއްޗެހި ނިވާލުން
-
ފަންކާގެ ފިޔަތައް ގަވައިދުން ސާފުކުރުން
-
ދޭތެރެއަކުން ގޭގެ ކަރަންޓު މީޓަރު ބަލާލައި، މީޓަރު ހިނގާވަރާއި އަރާ އެއްޗެހި ބަލާލުން؛ ބިލަށް އަރާނެވަރު މޮބައިލް އެޕުގައި ޖަހާލައިގެން ބަލާލެވޭނެ
"މިގޮތަށް ބަލަމުން ދާ ނަމަ، އިގްތިސާދު ކުރެވޭނެ ލައްކަ ކަންކަން ބޮލަށް ވަންނާނެ. މިކަންކަން ކޮށްލައްވާ. ނަތީޖާ ފެންނާނެ. ބިލް ކުރެވޭނީ ބޭނުންކުރި އެއްޗަކަށް ހަމަ،" ނިޔާޒު ވިދާޅުވި އެވެ.
ސްޓެލްކޯ
ކޮމެންޓް (19)
ޝިފާ
އަފީފާ
އިންޖިނިއަރު
އަފީފާ
ފުޅިބައްތި
ނިހާ
ޙެހެހެ
ާއަރާމަގު ދޮންކަމަނަ
އަހްމަދު
ދުންތަރި
ބަކުރުބެ
މަޑޭ
ސްޓެލްކޯ ޒުވާން އިންޖިނިއަރ
ސްޓެލްކޯ ރައްޔިތު މީހާގެ އިންޖިނިއަރ
އަލްފާލިލް
ފެލާކޯ
ހަބީބު
ފަހުމީ
ޙިރު