ފަލަސްތީނަށް އދ.ގެ ފުރިހަމަ މެންބަރުކަން ދިނުމަށް 143 ގައުމުގެ ވޯޓުން ފާސްކޮށްފި

ފަލަސްތީނަށް އދ.ގެ ފުރިހަމަ މެންބަރުކަން ދިނުމަށް ޔޫއޭއީ އިން ހުށަހެޅި ގަރާރު 143 ގައުމުގެ ވޯޓުން މިރޭ ފާސްކޮށްފި އެވެ.

ތަފްސީލް - މިއަދު ބޭއްވި އދ.ގެ އާންމު މަޖިލީހުގެ ކުއްލި ބައްދަލުވުމެއްގައި، ފަލަސްތީނަށް މެންބަރުކަން ދޭން ނުފެންނަ ކަމަށް ވޯޓު ދިނީ، އެމެރިކާ އާއި އިޒްރޭލް ހިމެނޭ ގޮތަށް، ނުވަ ގައުމަކުންނެވެ. ވަކި ކޮޅަކަށް ވޯޓުނުދޭ 25 ގައުމެއް ތިއްބެވެ.

އެނގުން މުހިއްމު - މި ގަރާރުގައި ފާސްކޮށްފައި ވަނީ ފަލަސްތީނަކީ އދ.ގެ ފުރިހަމަ މެމްބަރަކަށް ވުމަށް ޝަރުތުހަމަވާ ގައުމެއް ކަމެވެ. އދ.ގެ މެމްބަރު ގައުމަކަށް ވެވޭނީ ސަލާމަތީ މަޖިލީހުން އެގޮތަށް ފާސްކޮށްގެންނެވެ.

ވީ ކިހިނެއް؟ - އދ.ގެ އާންމު މަޖިލީހުގެ ކުއްލި ބައްދަލުވުމެއް މި ބޭއްވީ އިޒްރޭލުން ފަލަސްތީނަށް ދެމުންގެންދާ ހަމާލަތައް ހުއްޓުވުމަށް ސަލާމަތީ މަޖިލީހުން ހައްލެއް ހޯދިފައި ނުވާތީ އެވެ. އާންމު މަޖިލީހުގެ ކުއްލި ބައްދަލުވުމުގައި ޔޫއޭއީގެ ގަރާރު ހުށަހެޅީ 'އެޑްމިޝަން އޮފް ނިއު މެމްބާސް ޓު ދަ ޔުނައިޓަޑް ނޭޝަންސް'ގެ ނަމުގަ އެވެ.

ރާއްޖޭން ކޯ-ސްޕޮންސާ ކޮށްފައިވާ އެ ގަރާރުގައި ވަނީ ފަލަސްތީނަކީ އދ.ގެ މެމްބަރަކަށް ވުމަށް ޝަރުތުހަމަވާ ގައުމެއް ކަމަށާއި އ.ދ.ގެ އެހެން ގައުމުތަކުގެ ބޮޑު ތާއީދެއް މިކަމަށް އޮންނަ ކަމަށެވެ.

ފަލަސްތީނަކީ މިހާރު އދ. ގެ 'އޮބްޒާވާ ސްޓޭޓަސް'ގެ ގައުމެކެވެ.

އދ.ގެ ފުރިހަމަ މެމްބަރަކަށް ފަލަސްތީނު ހެދުމާ ގުޅޭގޮތުން ސަލަމާތީ މަޖިލީހުގައި ނަގާފައިވާ ވޯޓުގައި އެންމެ ގައުމަކުން ދެކޮޅަށް ވޯޓުލާފައިވުމުގެ ސަބަބުން ހިތާމަފާޅު ކުރާކަން ޔޫއޭއީގެ ގަރާރުގައި ވަނީ ފާހަގަ ކޮށްފަ އެވެ.

މީގެ އިތުރުން ފަލަސްތީނުގައި ހިނގަމުންދާ ހަމަނުޖެހުމަށް ދެމިގެންދާނެ އަދި ދެމެހެއްޓެނިވި ހައްލެއް ހޯދޭނީ 1967ގެ ކުރީގެ ބޯޑަރުތަކުގެ މައްޗަށް އެކުލެވިފައިވާ، އިރުމަތީ ގުދުސް ވެރިރަށެއްގެ ގޮތުގައި ކަނޑައެޅިފައިވާ، މިނިވަން އަދި މުސްތަގުއްލު ފަލަސްތީނު ދައުލަތެއް ގާއިމުކުރެވިގެން ކަމަށް ވެސް ގަރާރުގައި ބަޔާންކޮށްފައިވެ އެވެ.

މި ގަރާރާ އެކު ފަލަސްތީނަށް ލިބޭނެ ހައްގުތައް:

 ނަމަވެސް މި ގަރާރުން، އދ. އަށް ހުށަހަޅާ އެއްވެސް ގަރާރަކަށް ވޯޓުލުމުގެ ހައްގެއް ނުލިބޭނެ އެވެ.