ދެ އިމްރާނުގެ މި މައްސަލައިގައި ހިޔާލު ދެ ބައިވެއްޖެ

އިއްޔެ ރޭ ސޯޝަލް މީޑިއާގައި އާއްމުވީ، ކުރީގެ ހޯމް މިނިސްޓަރު އިމްރާން އަބްދުﷲގެ ކާރުކޮޅުގައި ޕިކަޕެއް ޖެހި ގެއްލުންވުމުން، އުފެދުނު ނުތަނަވަސްކަން ފިނިކުރައްވަން،  ހެންވޭރު ދެކުނު ދާއިރާގެ އިންތިހާބީ މެންބަރު އިމްރާން ލަތީފް އުޅުއްވާތަނެވެ. ޕިކަޕުގެ ޑްރައިވަރު ކައިރީ ބަހައްޓަވައިގެން މިނިސްޓަރު އިމްރާން ކައިރިން އޭނާ އެދިވަޑައިގެންނެވީ މާފުކުރުމަށެވެ.

"އަޅުގަނޑު ޝެއިހް އިމްރާން ކައިރިން މި އެދެނީ މި ބޭބެއަށް މާފުކޮށްދެއްވާށޭ. މާފުކޮށްދެއްވަން ބޭނުން ނޫން ނަމަ، މި ބޭބެގެ ފަރާތުން ލިބުނު ގެއްލުމަށް ދާ ހަރަދު އަޅުގަނޑު އަމިއްލައަށް ދީފާނަމޭ،" ވީޑިއޯގައި އިންތިހާބީ މެމްބަރު ވިދާޅުވެ އެވެ.

"ފަގީރު ނިކަމެއްޗެއްގެ އަތުން މި ކަހަލަ ކަމެއް ވީމާ މާފުކޮށްދެއްވާށޭ."

އެކަމަކު ކުރީގެ މިނިސްޓަރުގެ މޫނުމަތިން ފެނުނީ ހިތްހަމަނުޖެހުމެވެ.

އެނގިފައިވާ ގޮތުގައި ކާރު އެކްސިޑެންޓުވުމާ އެކު މިނިސްޓަރު ފުލުހަށް ގުޅުއްވި އެވެ. އިންތިހާބީ މެމްބަރު އިމްރާން އެތަނަށް ވަޑައިގެންނެވީ ފުލުހުންގެ އިންތިޒާރުގައި އެ މީހުން މަޑުކޮށްގެން ތިއްބަ އެވެ.

މި ވީޑިއޯ ސޯޝަލް މީޑިއާގައި އާއްމުވުމާ އެކު މީހުންގެ ހިޔާލު ދެ ބައިވި އެވެ. އެއްބަޔަކު، އިންތިހާބީ މެމްބަރުގެ އަމަލަށް ތައުރީފްކުރި އިރު އަނެއް ބަޔަކު ގަބޫލުކުރާ ގޮތުގައި އެއީ އޭނާ އަދާކުރައްވަން ޖެހިވަޑައިގަންނަވާ ޒިންމާއެއް ނޫނެވެ.

"މައްސަލައެއް ޖެހުނީމައި އެ މައްސަލަ ހައްލު ކުރާނީ ފުލުހުން. އެއީ ޒިންމާދާރު ގޮތަކީ. މެމްބަރު އިމްރާނު މާފު ހޯދަން ޖެހޭ އެއްވެސް ހައިސިއްޔަތެއް ނެތް،" ސޯޝަލް މީޑިއާގައި ހިޔާލު ތަފާތުކުރި މީހަކު ބުންޏެވެ.

"މަގުމަތީގެ ގަވައިދުތަކަށް ހުރުމަތްތެރިކޮށް ނުހިތާ މިގޮތަށް ވާ ގެއްލުމުގެ ޒިންމާ ނަގަން ޖެހޭނެ."

އެ ވީޑިއޯ ޝެއާކޮށް އެހެން މީހަކު ބުނިގޮތުގައި މަންޒަރު ވީޑިއޯކޮށް އާއްމު ކުރުމުގެ މަގްސަދަކީ އަނެއް މީހާ ބަދުނާމުކުރުމެވެ. އިމްރާންގެ ޕާޓީ، އަދާލަތުން ވެސް ދެކެނީ އެގޮތަށެވެ.

އެ ޕާޓީން މިއަދު އެކްސްގައި ބުނީ އިންތިހާބީ މެމްބަރުގެ މަގްސަދަކީ، ޕިކަޕް ޑްރައިވަރަށް ނިސްބަތްކޮށް ނިކަމެތި ބަސް ބޭނުންކޮށް، ސޯޝަލް މީޑިއާގައި ޑްރައިވަރާއި އިމްރާން ފަލީހަތް ކުރެއްވުންކަމެވެ. އަދި އެކަން އެ ޕާޓީން ކުށްވެރިކުރި އެވެ.

އަދާލަތު ޕާޓީން ބުނިގޮތުގައި މެމްބަރު އިމްރާން މަސައްކަތް ކުރެއްވީ، މަގުމަތީގައި ހިނގާ އެކްސިޑެންޓްތައް ފުލުހަށް ރިޕޯޓް ކުރުމުގެ ގާނޫނީ ޒިންމާ އޮތް އިރު، އެ އަދާކުރުމަށް ހުރަސް އެޅުއްވުމަށެވެ. އަދި ސިޔާސީ ގޮތުން ހިޔާލުތަފާތުވާ މީހުންނާ މަގުމަތިން ދިމާކޮށް، އާޑަފުރައްސާރަ ކުރުމަކީ މުޖުތަމައުގެ މަސްލަހަތު ގެއްލިގެންދާނެ ކަމެއް ކަމަށް ބުންޏެވެ.

އިންތިހާބީ މެމްބަރުގެ އަމަލަށް ތައުރީފްކުރި މީހުން ދެކޭގޮތުގައި އޭނާ އެ ނެންގެވީ ފަރުދީ ޒިންމާއެކެވެ.

"ރައްޔިތުންގެ މަސްލަހަތު ހިމެނޭ ކަންކަމުގައި ރައްޔިތުންގެ މަޖިލީހުގެ މެމްބަރުންނަށް ބަސް ކިޔޭނެ،" އެކްސްގައި މީހަކު ލިޔުނެވެ.

އެހެން މީހަކު ބުނިގޮތުގައި މައްސަލައެއް ޖެހިގެން އުޅޭ ތަނަށް ވަޑައިގެން، އެތަން ފިނިކުރައްވަން އުޅުއްވުމަކީ ރިވެތި ސިފައެއް ކަމަށާއި އެކަމަކު އެކަން ގަބޫލު ނުކުރައްވައި، މިނިސްޓަރު އިމްރާން ކޯފާ އިސްކުރައްވާފައި ހުންނެވުމަކީ ވަރަށް އައިބު ކަމެއް ކަމަށް އެމީހުން ބުންޏެވެ.