ކުޑަގިރި ޕިކްނިކް އައިލެންޑް. ކުރިއަށް ވުރެ ފުރިހަމައަށް އެތަން ތަރައްގީ ކުރާނެ ކަމަށް ސަރުކާރުން ބުނި (ފޮޓޯ/ ރައީސް އޮފީސް)
މިހާރަށް ވުރެ ފުރިހަމައަށް ކުޑަގިރި ތަރައްގީ ކުރާނަން: ހީނާ
މާލޭގައި ދިރިއުޅޭ މީހުން ޕިކްނިކް ދިއުމަށް މިދިޔަ ސަރުކާރުން ހެދި ކުޑަގިރި، މިހާރަށް ވުރެ ފުރިހަމައަށް ތަރައްގީ ކުރާނެ ކަމަށް ސަރުކާރުން ބުނެފި އެވެ.
ވީ ކިހިނެއް؟- މިދިޔަ އަހަރުގެ ފެބްރުއަރީ މަހުގެ ތެރޭގައި ކުޑަގިރި ހުޅުވާފައިވަނީ، ޕިކްނިކް ދާ މީހުންނަށް ހާއްސަކޮށްގެން، ގިނަ ހިދުމަތްތަކަކާ އެކު އެވެ. އެކަމަކު ސަރުކާރުގެ ތަރުޖަމާނު ހީނާ ވަލީދު މިރޭ އެކްސްގައި ވިދާޅުވީ، މިހާރު ހުރި ވަސީލަތްތައް މަދުކަމާއި ހުރި ދަތިތަކާ ގުޅިގެން ޝަކުވާ ލިބެމުންދާ ކަމަށެވެ.
"ލިބެމުންދާ ޝަކުވާތަކަށް ހައްލެއް ހޯދުމުގެ ގޮތުން ކުޑަގިރި މިހާރަށް ވުރެ ފުރިހަމައަށް ރައްޔިތުންނަށް ސަރުކާރުން ތަރައްގީ ކުރާނެ،" ހީނާ ވިދާޅުވި އެވެ.
އޭނާ ވިދާޅުވި ގޮތުގައި އެ ރަށް އަބަދުވެސް އޮންނާނީ މާލޭގެ ރައްޔިތުންނަށް ހާއްސަ ތަނެއްގެ ގޮތުގަ އެވެ.
ކުޑަގިރި ހުޅުވުމުގެ މައިގަނޑު އަމާޒަކީ މާލެ ސަރަހައްދުގައި ދިރިއުޅޭ އާންމުންނާއި އާއިލާތަކަށް ހިތްގައިމު މާހައުލެއް ހޯދައިދިނުމެވެ. އަދި ޕާޓީތަކާއި އެކި މުނާސަބަތާ ގުޅޭ އިވެންޓުތައް ވެސް އެތަނުގައި ބޭއްވެ އެވެ.