އެންމެ ފަހުން ލިބުނު ކަރަންޓު ބިލުތައް ބޮޑުކަމަށް ބުނެ އާންމުން ދަނީ ޝަކުވާ ކުރަމުން (ދައުރު ފޮޓޯ)
ބިލުތަކުގައި މައްސަލައެއް ނެތް؛ ބޮޑުވީ ކަރަންޓު ހަރަދު: ޔުޓިލިޓީ ކުންފުނިތައް
ރޯދަމަހުގެ ކަރަންޓާއި ފެން ބިލުތައް، އާންމު މަސްމަހުގައި ހުންނަ މިންވަރަށް ކެޕްކުރައްވާނެ ކަމަށް ރައީސް މުހައްމަދު މުއިއްޒު ވިދާޅުވި ނަމަވެސް، ބިލުތައް އާދަޔާހިލާފަށް ބޮޑުކަމަށް އާންމުން ޝަކުވާ ކުރަން ފެށުމާ އެކު ޔުޓިލިޓީ ކުންފުނިތަކުން ބިލުކުރި ގޮތް ދިފާއުކޮށްފި އެވެ.
ވީ ކިހިނެއް؟ - ހުސްވި ރޯދަމަހުގެ (މާޗު މަހުގެ) ކަރަންޓު ބިލު ބޮޑުވުމުގެ ޝަކުވާ އާންމުން އަންނަނީ ސޯޝަލް މީޑިއާގައި ކުރަމުންނެވެ.
އެގޮތުން ބައެއް ގޭބިސީތަކަށް ފޮނުވި ކަރަންޓު ބިލުތައް، އެހެން މަސްތަކާ އަޅާބަލާއިރު ތިން، ހަތަރު ގުނަ ބޮޑު ކަމަށް ބައެއް މީހުން ބުނެ އެވެ.
މިމަހުގެ ކަރަންޓު ބިލް ބޮޑުވާހަކަ ހަމަބުނެލީ އިނގޭ....
— Hucen🇲🇻🇵🇸 (@Ra86hU) April 27, 2024
މިދިޔަ މަހު ކުޑަކުރިބައި މިމަހު ދަމައިގަތީ...
މީތި ކަޑައޭ..!@MMuizzu @TeamFenaka
އަހަރަމެން ގޭގައި (ފީއަލީގައި ހުންނަ) ދިރިއުޅެނީ ދެ މީހުން. އެއީ މަންމަ އަދި ދައްތަ.
— Shaihan Zareer 🎈❓ (@ShaihanZareer) April 27, 2024
ކުރީ މަސްތަކު ކަރަންޓު ބިލަށް އަރަނީ 700 ކޮންމެ ވެސް ވަރެއް.
މި މަހުގެ ކަރަންޓު ބިލު އައިއިރު އޮތީ، 2000 އަށް ވުރެ ބޮޑު ބިލެއް.
މަތިބަރު ސަރުކާރުގެ ޚަރަދު ފޫބައްދަން ރައްޔިތުން “ފެލަނީ”!
ރައީސް އޮފީހުން މިއަދު ބޭއްވި ނޫސްވެރިންގެ ބައްދަލުވުމުގައި ސްޓެލްކޯ އާއި ފެނަކައިން ވެސް ވަނީ އެ ކުންފުނިން ބިލުކުރި ގޮތް ދިފާއުކޮށްފަ އެވެ.
އެނގުން މުހިންމު - ރައީސް މުހައްމަދު މުއިއްޒު، 4 މާޗުގައި ބ. އޭދަފުށީގައި ބޭއްވި ޖަލްސާއެއްގައި ވިދާޅުވީ ކޮންމެ ރޯދަމަހަކު ކަރަންޓާއި ފެން ބިލު އެހެން މަސްތަަކަށް ވުރެ ބޮޑުވާތީ އެކަމުގެ ސަބަބުން ކުރިމަތިވާ ތަކުލީފުތަކުގެ ޝަކުވާ ލިބޭ ކަމަށެވެ.
"މިފަހަރު އެހެނެއް ނުވާނެ. އާންމު މަހެއްގައި އެ ހުންނަ ރޭޓުގައި ކެޕްކޮށްފައި، މާނައަކީ އެޔަށްވުރެ މައްޗަކަށް ނުދާނެއޭ. އާންމު މަހެއްގައި ހުންނަ ވަރަށް ފެން ބިލާއި ކަރަންޓު ބިލު ހުންނާނީ،" ރައީސް ވިދާޅުވި އެވެ.
ރައީސް އިތުރަށް ވިދާޅުވީ:
-
ފެނަކަ އާއި ސްޓެލްކޯއަށް އަދި އެމްޑަބްލިއުއެސްސީއަށް އެކަން އެގޮތަށް ކުރަން ދަންނަވާފައިވާނެ
-
ފެނާއި ކަރަންޓު ބިލުކުރާއިރު އެކަން އެގޮތަށް ހަމަޖެހޭނެ ކަމުގެ ޔަގީންކަން އެ ދެ ކުންފުނިން ވެސް ވަނީ ދީފައި
-
ކުރިއަށް އޮތް ރޯދަ މަހުން ފެށިގެން ރޯދަމުހު ކިތަންމެ ލޯޑު ބޮޑުވިޔަސް ބިލަށް އިތުރަކަށް އެއްޗެއް ނުނަގާނަން
-
ސްޓެލްކޯއިން ފެނުގެ ހިދުމަތް ރަށްތަކަށް ދޭން ނަގާ 30ރ. ގެ ޗާޖު އުވާލާނެ ކަމުގެ ޔަގީންކަން ވެސް ވަނީ ދީފައި
'ބިލުކުރާ މުއްދަތު ރޯދަމަހަށް ބަދަލެއް ނުކުރެވޭނެ'
ރޯދަމަހުގެ ކަރަންޓާއި ފެން ބިލުތައް، އާންމު މަސްމަހުގައި ހުންނަ މިންވަރަށް ކެޕްކުރައްވާނެ ކަމަށް ރައީސް މުއިއްޒު މީގެ ކުރިން ވިދާޅުވެފައިވާތީ، އެކަމާ ބެހޭ ގޮތުން ނޫސްވެރިން ވަނީ މިއަދުގެ ބައްދަލުވުމުގައި ސުވާލުކޮށްފަ އެވެ.
ސްޓެލްކޯގެ މެނޭޖިން ޑިރެކްޓަރު ހުސައިން ފަހުމީ ވިދާޅުވީ ބިލިން ސައިކަލް (ބިލު ކުރާ މުއްދަތު) އޮންނަ ގޮތުންނާއި ކަސްޓަމަރުންގެ އަދަދު ގިނަކަމުން ރޯދަމަހުގެ ފެށޭ ދުވަހާއި ނިމޭ ދުވަހު ރީޑިން ނެގުމަކީ ފަސޭހަ ކަމެއް ނޫން ކަމަށެވެ.
ފަހުމީ ވިދާޅުވި ގޮތުގައި ޖުމްލަ ގޮތެއްގައި ބިލު ކުރާ މުއްދަތު ރޯދަމަހާ ދިމައެއް ނުވެ އެވެ.
"އިސްވެ ނުވަތަ ފަސްވެ އެކަހަލަ ގޮތަކަށް ރަމަޟާން މަސް މި އަންނަނީ. އެހެންވީމަ އެއްވެސް މަހަކަށް އަޅުގަނޑުމެން ނީންނާނެ ސީދާ ރޯދަމަހުގެ އެކަކުން ފެށިގެން 30އަށް ބިލުކުރެވިފައި. އެހެންވީމަ ބިލިން ޕީރިއަޑު އެޖަސްޓު ކުރުމުގެ ދަތިތަކެއް އެބަ އާދޭ،" ފަހުމީ ވިދާޅުވި އެވެ.
އޭނާ ވިދާޅުވީ ރޯދަމަހަކީ އާންމު މަސްމަހާ އަޅާބަލާއިރު ކެއުމާއި އެހެނިހެން ހަރަދުތައް ބޮޑުވާ މަހަކަށް ވާތީ، ސަރުކާރުގެ އަމާޒަކަށް ވެފައި އޮތީ އެ ހަރަދުތައް ކުރަން މަގުފަހިކޮށްދިނުން ކަމަށެވެ.
"އެ ކޭޝްފްލޯ އެޖަސްޓް ވުމަށް އެންމެ ބޮޑަށް މަގުފަހިކޮށްދެވޭނީ ރަމަޟާން މަހު ލިބޭ ބިލަށް ލުޔެއް ދީގެން ކަމަށް އަޅުގަނޑުމެން ގަބޫލުކުރާތީ އަދި ޕޮލިސީ ލެވެލްގައި މަޝްވަރާ ވެސް ކޮށްފައިވާތީ އެގޮތަށް އަމަލުކޮށްފައިވާނީ،" ފަހުމީ ވިދާޅުވި އެވެ.
ހޫނު ގަދަވުމާ އެކު ބޭނުންކުރި ވަރު ވެސް ބޮޑު: ފެނަކަ
ފެނަކަ ކޯޕަރޭޝަންގެ މެނޭޖިން ޑިރެކްޓަރު މުއާޒު މުހައްމަދު ރަޝީދު ވިދާޅުވީ ރީޑިން ނެގުމުގައި އެއްވެސް މައްސަލަ ނެތް ކަމަށާއި ބިލުކޮށްފައިވާނީ ޔުޓިލިޓީ ރެގިއުލޭޓަރީ އޮތޯރިޓީ (ޔޫއާރުއޭ)އިން ކަނޑައަޅާފައިވާ މިންގަނޑުތަކާ ވެސް އެއްގޮތަށް ކަމަށެވެ.
"ފާހަގަކުރެވިފައި އެބަހުރި، ރޯދަމަހާ ގުޅިގެން ކޮންސަމްޕްޝަން (ކަރަންޓު ބޭނުންކުރި މިންވަރު) ވަރަށް ބޮޑަށް އިތުރުވެގެން ގޮސްފައި މި އޮތީ. އެ ވެދާނެ ރޯދަމަހާ އަދި ހޫނު މޫސުމާ ގުޅިގެން، ވަރަށް ބޮޑަށް ރާއްޖޭގެ ހޫނުމިން މައްޗަށް ދިއުމާ ގުޅިގެން އަޅުގަނޑުމެންނަށް ވެސް ފާހަގަކުރެވޭ ކޮންސިއުމްކުރި އަދަދު ވަރަށް ބޮޑަށް އިތުރުވެފައި މި އޮތީ،" މުއާޒު ވިދާޅުވި އެވެ.
"ޖުމްލަކޮށް އަޅުގަނޑު ދަންނަވާލަން ބޭނުންވަނީ، ކޮންސިއުމް ކުރާ އަދަދު އިތުރުވެގެން ގޮސް، މި ބިލުތައް ބޮޑުވެގެން ގޮސްފައި މި ހިރީ. މި ކަންކަމަށް ސަމާލުކަން ނޫނީ ރައްޔިތުން ހޭލުންތެރިކަން އިތުރުކުރުމަށްޓަކައި ތަފާތު މަސައްކަތްތަކެއް ކުރަން ޖެހޭ."
ކޮމެންޓް (4)
މޮޔަނުގޮވާ މޮހެދޭ
އަލިބެ...
އިއްސެ
ރަތްބެ