ފަލަސްތީނުގެ ހައްގުގައި ރާއްޖެ: މީގެ 40 އަހަރު ކުރިން ރާއްޖެއިން ސޮއިކުރި މުއާހަދާއަކީ އެކަމަށް ހުޅުވުނު ދޮރެއް

އިއްޔެއަކީ އިންސާނީ ހައްގުތަކާ ގުޅޭ މުއާހަދާއެއްގައި ރާއްޖެއިން ފުރަތަމަ ސޮއިކުރިތާ 40 އަހަރު ފުރުނު ދުވަހެވެ. އަދި އެއީ ފަލަސްތީނުގެ ރައްޔިތުންގެ ހައްގުގައި ބައިނަލްއަގުވާމީ ފެންވަރުގައި އަޑު އުފުލަން ރާއްޖެއަށް ހުޅުވުނު ދޮރެއް ވެސް މެ އެވެ.

ވީ ކިހިނެއް؟ - ކުރީގެ ފޮރިން މިނިސްޓަރު ޑރ. އަހުމަދު ޝަހީދު ގަބޫލުކުރައްވާ ގޮތުގައި ގަތުލު އާއްމު ހުއްޓުވުމާ ގުޅޭ މުއާހަދާގައި 24 އެޕްރީލް 1984ގައި ރާއްޖެއިން ސޮއިކުރީ ވެސް ލުބުނާނުގައި އުޅުނު ފަލަސްތީނުގެ ރެފިއުޖީންގެ އެތައް ސަތޭކަ ބަޔަކު ގަތުލުކުރި ސަބްރާ އާއި ޝަތީލާ ގަތުލު އާންމަށް ފަހު އެވެ.

މިއީ ލުބުނާންގެ ހަތިޔާރު އެޅި ނަސާރާއިންގެ ބަޔަކު ކުރި ކަމެއް ނަމަވެސް އެ އަނިޔާވެރިކަމަށް އިޒްރޭލް ސިފައިންގެ އެއްބާރުލުން ލިބުނެވެ.

ތަފްސީލް: ޝަހީދު ވިދާޅުވި ގޮތުގައި އިޒްރޭލުން ފަލަސްތީން ރައްޔިތުންނާ ދެކޮޅަށް ހިންގާ އަނިޔާވެރިކަމާ ދެކޮޅަށް ބައިނަލްއަގުވާމީ ކޯޓުގައި ކުރިއަށް ދާ މައްސަލަތަކުގައި ރާއްޖެއަށް ބައިވެރިވެވެނީ 1982ގައި ސޮއިކުރި ބައިނަލްއަގުވާމީ ތިން މުއާހަދާގެ ސަބަބުންނެވެ. 

އެ ފަހަރު ސޮއިކުރީ:

އިޒްރޭލުން ހުއްޓުމެއް ނެތި ފަލަސްތީނަށް ދެމުންދާ ހަމަލާތަކާއި ނަސްލު ނައްތާލަން ހިންގަމުންދާ އަމަލުތަކަށް އިންސާފު ހޯދަން، ބައިނަލްއަގްވާމީ ކޯޓަށް ދެ މައްސަލައެއް ވަނީ ހުށަހަޅާފަ އެވެ. އެ ދެ މައްސަލައަށް ވެސް ދިވެހި ސަރުކާރުން ތާއީދުކުރެ އެވެ.

ޝަހީދު ވިދާޅުވި ގޮތުގައި ކޯޓަށް ހުށަހަޅާފައިވާ އެ ދެ މައްސަލައަށް ތާއީދު ކުރުމުގެ ފުރުސަތު ރާއްޖެއަށް ލިބުމުން، ކުރީގެ ރައީސް އިބްރާހިމް މުހައްމަދު ސޯލިހާއި ރައީސް މުހައްމަދު މުއިއްޒުގެ ސަރުކާރުން ވެސް ވަނީ އެ ފުރުސަތުގެ ބޭނުން ހިފައިފަ އެވެ.

ކުރީގެ ރައީސް މައުމޫން އަބްދުލްގައްޔޫމުގެ ސަރުކާރުގައި ފޮރިން މިނިސްޓަރުކަން ކުރެއްވި ޝަހީމް ގަބޫލުކުރައްވާ ގޮތުގައި، ބައިނަލްއަގްވާމީ ކޯޓުގައި ފަލަސްތީނަށް ތާއީދު ކުރުމުގެ ފުރުސަތު ދިވެހި ސަރުކާރަށް ލިބުނީ، މީގެ 40 އަހަރު ކުރިން، އޭރުގެ ރައީސް މައުމޫން އެޅުއްވި މި އާދަޔާހިލާފު ފިޔަވަޅުގެ ސަބަބުންނެވެ.

އޭނާ ވިދާޅުވި ގޮތުގައި އޭރުގެ ސަރުކާރުން އެ މުއާހަދާތަކުގައި ސޮއިކުރީ 1982ގައި ފަލަސްތީނުގެ މުސްލިމުންނާ ދެކޮޅަށް ލުބުނާންގައި ހިންގި ބޮޑު ގަތުލުއާއްމާ ގުޅިގެންނެވެ.

'ސަބްރާ އަދި ޝަތީލާ ގަތުލުއާއްމު'ގެ ނަމުގައި މަޝްހޫރުވެފައިވާ އެ ގަތުލު އާއްމުގައި ފަލަސްތީނާއި ލުބުނާނުގެ 700-3،500 މީހުން މަރާލި އެވެ.