ރައްޔިތުންގެ މަޖިލީހުގެ ޖަލްސާއެއްގެ ރިޔާސަތުގައި މަޖިލިހުގެ ރައީސް މުހައްމަދު އަސްލަމް: ހަތަރު ދައުރަށް ފަހު އޭނާއަށް ވަނީ ގޮނޑި ގެއްލިފައި (ފޮޓޯ/ މަޖިލިސް)
އަސްލަމްގެ ބޮޑުބޭބެގެ ނަސޭހަތް: ކޮންމެ ކަމަކަށް ވެސް ނިމުން އަންނާނެ. އެކަމަކު ތިއީ އައްޑޫގެ ވަރުގަދަ ތަނބެއް
އާދިއްތަދުވަހު އޮތް ރައްޔިތުންގެ މަޖިލިހުގެ އިންތިހާބުގައި ސަރުކާރާއި ޕީއެންސީން އެމްޑީޕީގެ ބައެއް އިސް މެމްބަރުން ކަޓުވާލަން ހާއްސަ މަސައްކަތްތަކެއް ކުރި އެވެ. އޭގެ ތެރެއިން އެންމެ ބޮޑު އަމާޒަކީ މަޖިލިހުގެ މިހާރުގެ ރައީސް މުހައްމަދު އަސްލަމެވެ.
ސަރުކާރާއި ޕީއެންސީގެ އެ މަސައްކަތް ކާމިޔާބުވި އެވެ. ރައްޔިތުންގެ މަޖިލިހުގައި އައްޑު އަތޮޅު ތަމްސީލްކުރައްވަން 2004ގައި ފެއްޓެވި ފަހުން ބޭއްވި އެއްވެސް އިންތިހާބަކުން، މީގެ ކުރިން، އަސްލަމް ބަލިވެފައެއް ނެތެވެ. އެހެންކަމުން އޭނާއަކީ އައްޑޫގެ މައި ރަށް ނުވަތަ އަވަށް، ހިތަދޫގެ ވެސް ސިޔާސީ އެންމެ ނުފޫޒު ގަދަ އެއް ބޭފުޅެވެ.
ރައްޔިތުންގެ މަޖިލިހުގައި 20 އަހަރަކީ ރާއްޖޭގެ ނިސްބަތުން ވަރަށް ދިގު މުއްދަތެކެވެ. އަސްލަމަކީ އެހާ ދިގު މުއްދަތެއްގައި އައްޑޫ ސިޓީ ތަމްސީލްކުރެއްވީ ހަމައެކަނި މެމްބަރު ވެސް މެ އެވެ.
ފުރަތަމަ ފަހަރަށް އަސްލަމަށް ގޮނޑި ގެއްލުމުގެ ހިތާމަ އޭނާގެ އިތުރުން އެމްޑީޕީ އާއި އޭނާގެ އަމިއްލަ އާއިލާއަށް ވެސް އެބަ އޮތެވެ. އެކަން ބައްޕަ ފަރާތު ބޮޑުބޭބެ އަދި ދީނީ އިލްމުވެރިޔާ ހަސަން ލަތީފް މޫސާ، އިއްޔެ ފޭސްބުކްގައި ކުރެއްވި ޕޯސްޓުން ވެސް އެނގެ އެވެ.
މަދީނާގެ އިސްލާމިކް ޔުނިވަސިޓީން ކިޔަވާވިދާޅުވެގެން ހުންނެވި އަދި އައްޑޫ ސިޓީގެ ތައުލީމީ ދާއިރާގައި ވެސް އިސް ހިދުމަތްތަކެއް ކުރެއްވި ހަސަން އޭނާގެ ކޮއްކޮއަށް ދެއްވި ނަސޭހަތުގައި ވިދާޅުވީ "ކޮންމެ ކަމަކަށް ވެސް ނިމުމެއް އަންނާނެ" ކަމަށެވެ.
އެހެންކަމުން "ދަރިފުޅުގެ މަޖްލިސްގެ ދައުރު ނިމުނީ އެވެ،" ހަސަން ލިއުއްވި އެވެ.
އެކަމަކު އޭނާ ވިދާޅުވި ގޮތުގައި މިދިއަ ދިގު މުއްދަތުގައި ރައްޔިތުންގެ މަޖިލިހުގައި އަސްލަމް ކުރެއްވި މަސައްކަތަށް ތައުރީފް ހައްގެވެ. އެ މަސައްކަތްތަކުގެ ސަބަބުން އަސްލަމް ހިމެނޭނީ އައްޑޫގެ ބިޔަ ތަނބުތަކުގެ ތެރޭގައި ކަމަށް ވެސް ވިދާޅުވި އެވެ.
ތިޔައީ "އައްޑޫގެ ތާރީޚުގައި ރަން އަކުރުން ނަން ފަވާލެވޭނެ ދަރިއެކެވެ،" ހަސަން ލިއުއްވި އެވެ.
އަސްލަމަށް މުހާތަބުކުރައްވާ ހަސަން ބޭނުންކުރައްވަނީ 'ދަރިފުޅެ'ވެ. އެ އާއިލާއާ ކައިރި އައްޑޫ މީހަކު 'ދައުރު'އަށް ބުނީ އަސްލަމް ދެކެ ހަސަން ވަރަށް ލޯބިވާނެ ކަމަށެވެ. އަދި އެ އާއިލާގެ ގުޅުން ވެސް އެހާމެ ވަރުގަދަވާނެ ކަމަށް އޭނާ ބުންޏެވެ.
ހަސަންގެ ޕޯސްޓްގައި ދުނިޔޭގެ އާދަތަކުގެ މަތިން ވެސް ހަނދާންކޮށްދެއްވި އެވެ. އޭނާ ވިދާޅުވި ގޮތުގައި ރައްޔިތުންގެ މަޖިލިހުގައި އަސްލަމް ކުރެއްވި މަސައްކަތުގެ ތެރެއިން މަޖިލިހުގެ ރައީސްގެ ހައިސިއްޔަތުން ކުރެއްވި މަސައްކަތް މާ ފުރިހަމަ އެވެ.
"މިފަދަ ކަންކަމަށް ހަސަދަވެރިވާ ބަޔަކު ވެސް ތިބޭނެ އެވެ. އެކަމާ ހުރެ ހަމަނިދި ނުނިދޭ ބަޔަކު ވެސް ތިބޭނެ އެވެ،" ހަސަން ވިދާޅުވި އެވެ.
މަޖިލިހުގެ ރިޔާސަތަށް އަސްލަމް އިންތިހާބުކުރީ އެ މަގާމުގައި ހުންނެވި ކުރީގެ ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލަ ވެއްދުމުން އިސްތިއުފާ ދެއްވުމުންނެވެ. އެމްޑީޕީގެ ތެރޭގައި ބޮޑު ބައިބައިވުމެއް އުފެދުނު އިރު އަސްލަމް ހުންނެވީ އޭރުގެ ރައީސް އިބްރާހިމް މުހައްމަދު ސޯލިހުގެ ފަޅީގައި، އެމަނިކުފާނުގެ އިސް އެހީތެރިއެއްގެ ގޮތުގަ އެވެ.
ހަސަންގެ ޕޯސްޓް ނިންމާލެއްވީ ހިންދީ ލަވައެއްގެ ބައިތަކުންނެވެ.
"ރުކުޖާނަ ނެހީ ތޫ ކަހީނ ހާރުކޭ: ކާނޓޯންޕޭ ޗަލްކޭ މިލޭނގެ ސާއޭ ބަހާރުކޭ."
މާނައަކީ: (ކަމަކުން) ނާކާމިޔާބުވުމުން ހުއްޓި ނުހުންނާށެވެ. ރަބީއު މޫސުމުގެ ހަމަޖެހުމާއި އުފާވެރިކަން ހާސިލުވާނީ (ހަރީފު މޫސުމުގެ) ކަށިތަކުގެ މަތީގައި ހިނގާފައި ގޮސްގެންނެވެ.
ކޮމެންޓް (5)
އޮޑައްސައު
ސާސް
ސައީދު
މޫސަ
ރުކުޖާނަނެހީ