ރާއްޖޭގައި އުޅޭ ފަލަސްތީނުގެ ޕްރޮފެސަރުގެ އާއިލާއަށް މި ދަނީ އެހީވަމުން: އައިއޭސީ

އިޒްރޭލުގެ ހަމަލާތަކުން ސުންނާފަތި ކޮށްފައިވާ ފަލަސްތީނުގެ ގާޒާގައި ތާށިވެފައިވާ އާއިލާއަކަށް އެހީވަމުން އަންނަ ކަމަށް އިންޓަނޭޝަނަލް އެއިޑް ކެމްޕޭން (އައިއޭސީ) އިން މިރޭ ބުނެފި އެވެ.

ވީ ކިހިނެއް؟ - އިސްލާމިކް ޔުނިވާސިޓީ އޮފް މޯލްޑިވްސް (އައިޔޫއެމް)ގެ ލެކްޗަރާއެއްގެ ގޮތުގައި ރާއްޖޭގައި މަސައްކަތް ކުރައްވާ ފަލަސްތީނުގެ ޕްރޮފެސަރު ޑރ. ހަސަން އަލް ކުރުދީގެ އާއިލާއަށް އެހީވަމުން އަންނަ ކަމަށް އައިއޭސީ އިން ބުނީ، އެ އާއިލާ ޑރ. ކުރުދީ ގާތަށް ރާއްޖެ އަންނަން ބޭނުންވާ ކަމަށް ބުނެފައިވަނިކޮށެވެ.

އެ އާއިލާ ދިރިއުޅެމުން އަންނަނީ ގާޒާގެ ރަފަހުގަ އެވެ.

ހަނގުރާމައިގެ ތެރެއިން ނުކުތުމަށް އާއިލާގެ ފަރާތުން އެހީތެރިކަމަށް އެދުނީ ޑރ. ކުރުދީގެ އަންހެން ދަރިފުޅު މިންނާ އަލް ކުރުދީ އެވެ. އޭނާ ވަނީ ފައިސާ އެއްކުރަން އެހީވެދޭ 'ގޯ ފަންޑް މީ'ގައި އެކަމަށް ޕޭޖެއް ހުޅުވައިފަ އެވެ.

ތަފްސީލް - އެކަމާ ގުޅޭގޮތުން އައިއޭސީ އިން މިރޭ ނެރުނު ބަޔާނެއްގައި ބުނީ ޑރ. ކުރުދީގެ އާއިލާ ގާޒާ އިން މިސުރަށް ނެރުމަށް ކުރަން ޖެހޭ މަސައްކަތްތައް އެ ޖަމިއްޔާއިން ކުރަމުން އަންނަ ކަމަށެވެ.

ބުނީ ކީކޭ؟ "އަދި މިކަމަށް ދާނެ ހުރިހާ ހަރަދެއް ވެސް އައިއޭސީއިން ކުރަން ހަމަޖެހިފައިވާ ކަމަށް ޑރ. ކުރުދީއާ އެކު 24 މާޗު ވަނަ ދުވަހު ބައްދަލުވެ، ވާނީ ދަންނަވާފައި،" އެ ބަޔާނުގައިވެ އެވެ.

އައިއޭސީ އިން ބުނީ 18 މާޗުގައި ޑރ. ކުރުދީގެ އާއިލާއަށް ކާބޯތަކެތީގެ އެހީތެރިކަން ވެސް އެ ޖަމިއްޔާ އިން ފޯރުކޮށްދިން ކަމަށެވެ.

އޮކްޓޫބަރު 2023ގައި ހަނގުރާމަ ފެށި ފަހުން މިގޮތަށް ގާޒާ އިން މިސުރަށް އެހެން އާއިލާއެއް ގެންގޮސްދިންކަން ވެސް އައިއޭސީގެ ބަޔާނުގައި ފާހަގަކޮށްފައިވެ އެވެ.

"މިކަހަލަ މައުލޫމާތުތައް އަޅުގަނޑުމެން ވަގުތުން ވަގުތަށް އާންމުނުކުރާ ސަބަބަކީ، ބައެއް މައުލޫމާތުތަކީ ވަރަށް ބޮޑަށް ޒާތީ ދިރިއުޅުމާއި އިއްޒަތާއި ކަރާމާތާ ގުޅުންހުރި ކަންކަން ކަމުގައި ވާތީ،" އެ ބަޔާނުގައިވެ އެވެ.

އެނގުން މުހިންމު - ޑރ. ކުރުދީގެ 18 އަހަރުގެ ދަރިފުޅު މިންނާގެ 'ގޯ ފަންޑް މީ' ޕޭޖުގައި ބުނެފައިވާ ގޮތުގައި އެ އާއިލާގެ މެމްބަރުން ދިރިތިބީ އެތައް ފަހަރަކު މަރާ ކުރިމަތިލައިގެންނެވެ. ބޮން އަޅައި މިންނާގެ ގެ ފުނޑުފުނޑު ކޮށްލާފައިވާއިރު މިހާރު އެ މީހުން ތިބީ ރަފަހުގެ ޓެންޓެއްގައި ކަމަށް ބުންޏެވެ.

މިސްރުގެ ޓްރެވަލް އެޖެންސީއެއް މެދުވެރިކޮށް ރަފަހު އިން މިސްރަށް މީހުން އެތެރެ ކުރެވެނީ މިހާރު ބޮލަކަށް 10،000 ޑޮލަރު ދައްކައިގެންނެވެ.

މިންނާ ބުނިގޮތުގައި އާއިލާގައި ހިމެނޭ އޭނާގެ މަންމަ އާއި ކޮއްކޮމެންނާ އެކު ރަފަހު އިން ނުކުތުމަށް 54،000 ޑޮލަރު ބޭނުންވެ އެވެ. 

ޑރ. ކުރުދީ ވެސް މިހާރު ހުންނެވީ އޭނާގެ އާއިލާ ރަފަހުން ނެރެވޭތޯ މަސައްކަތް ކުރުމަށްޓަކައި މިސްރުގަ އެވެ.