ހައިވޭ އިން ފައިބައިގެން ދާ މަގުގައި ހުރި ސޯލާ ޕެނަލްތަކުގައި ޖެހި މިއަދު ހިނގި އެކްސިޑެންޓް. މި އެކްސިޑެންޓުގައި އަނިޔާވި މީހާއަށް ދަނީ ހުޅުމާލެ ހޮސްޕިޓަލުގައި ފަރުވާދެމުން.
އެކްސިޑެންޓެއްގައި އަނެއްކާވެސް ސޯލާ ޕެނަލްތަކަށް ގެއްލުންވެއްޖެ
ހައިވޭއިން ފައިބައިގެން ހުޅުމާލޭގެ މިދިލި މަގުން ދުއްވާފައި ދިޔަ ކާރެއް، މަގުގެ އެއްފަރާތުގައި ހުރި ސޯލާ ޕެނަލް ސްޓްރަކްޗާގައި ޖެހި، އަނެއްކާ ވެސް އެކްސިޑެންޓެއް ހިނގައިފި އެވެ.
ވީ ކިހިނެއް؟ - ފުލުހުން މީޑިއާތަކަށް ފޮނުވި މެސެޖެއްގައިވާ ގޮތުން މި އެކްސިޑެންޓް ހިނގި ކަމުގެ މައުލޫމާތު ފުލުހުންނަށް ލިބިފައިވަނީ މިއަދު ހެނދުނު 8:45 އެހާކަންހާއިރެވެ. އެގޮތުން:
-
މި އެކްސިޑެންޓުގައި ކާރު ދުއްވަން އިން ޑްރައިވަރަށް އަނިޔާވި؛ އޭނާއަށް ހުޅުމާލެ ހޮސްޕިޓަލުގައި ދަނީ ފަރުވާ ދެމުން
-
މި މައްސަލަ ފުލުހުން ދަނީ ތަހުގީގު ކުރަމުން
ފާހަގަކޮށްލެވޭ - ރާއްޖޭގައި މިހާތަނަށް ހިންގާ އަވިން ހަކަތަ އުފައްދާ އެންމެ ބޮޑު މަޝްރޫއުގެ ދަށުން މާލެ-ހުޅުމާލެ ހައިވޭ އާއި ހައިވޭއިން ފައިބައިގެން ދާ މަގުގައި ހަރުކޮށްފައިވާ ސޯލާ ޕެނަލްތަކަށް މީގެ ކުރިން ވެސް އެކްސިޑެންޓުތަކުގައި ގެއްލުން ލިބިފައިވެ އެވެ. އެގޮތުން:
-
މިދިޔަ ސެޕްޓެމްބަރު މަހު ހައިވޭގެ ހަތަރު ލޭނު އޮންނަ ސަރަހައްދުން ދުއްވާފައި ދިޔަ ކާރެއް ސޯލާ ޕެނަލްތަކުގެ ސްޓްރަކްޗާގައި ޖެހުނު
-
އެ ހާދިސާގައި ސޯލާ ޕެނަލް ހަރުކޮށްފައިވާ ހޮޅިތަކަށް ގެއްލުންވެ، ބައެއް ޕެނަލްތައް ބަނޑިވެފައިވޭ
އެނގުން މުހިންމު - ސޯލާ ޕެނަލް މަޝްރޫއުގެ މަސައްކަތް ނިންމައި ސޯލާ ޕެނަލްތައް ބޭނުންކުރާކަށް އަދި ނުފަށަ އެވެ.
ވޯލްޑް ބޭންކުގެ ހިލޭ އެހީގައި ތައިލޭންޑުގެ އެންސިސް ކުންފުންޏާ ހަވާލުކޮށްގެން ހުޅުމާލެ-މާލެ ހައިވޭގައި ގާއިމުކުރާ ސޯލާ ނިޒާމުގެ ދަށުން:
-
ދުވާލަކު 5 މެގަވޮޓުގެ ސޯލާ ހަކަތަ އުފައްދާނެ
-
އަހަރެއްގެ މައްޗަށް 7.3 މިލިއަން ކަރަންޓު ޔުނިޓު އުފައްދާނެ
-
ތެލަށް ކުރާ ހޭދައިން 20 މިލިއަން ރުފިޔާއާ ހަމައަށް ކޮންމެ އަހަރަކު ސަލާމަތް ކުރެވޭނެ
-
މިއީ މިހާތަނަށް ރާއްޖޭގައި އެންމެ ގިނަ ސޯލާ ޕެނަލް ހަރުކޮށްގެން ގާއިމުކުރާ ނިޒާމު
-
ސޯލާ ޕެނަލްތަކުން އުފައްދާ ކަރަންޓު ސްޓެލްކޯއަށް ވިއްކާ ރޭޓަކީ ޔުނިޓަކަށް 10.09 ސެންޓު (1.681ރ.)
ގުޅުންހުރި - މާލެ-ހުޅުމާލެ ހައިވޭގެ އަރިމަތީގައި ޖަހާފައިވާ ސޯލާ ޕެނަލްތަކުގެ ސަބަބުން އެ މަހު މިހާރު ފެންނަނީ ވަރަށް ހާސްކަން ބޮޑު ތަނެއްގެ ގޮތުގައި ކަމަށް ވިދާޅުވެ، އެ ސޯލާ ޕެނަލްތައް އެތަނުން ނަގައި ރާއްޖޭގެ އެހެން ދެ ރަށަކަށް ބަދަލުކުރައްވާނެ ކަމަށް ރައީސް މުހައްމަދު މުއިއްޒު ވަނީ ރިޔާސީ ކެމްޕޭނުގެ ތެރޭގައި ވިދާޅުވެފަ އެވެ.
އެކަމުގެ ރައްދުގައި މިދިޔަ ސަރުކާރުގެ އެންވަޔަރަމެންޓް މިނިސްޓްރީން ބުނެފައިވަނީ، މާލެ-ހުޅުމާލެ ހައިވޭގައި ސޯލާ ޕެނަލް ހަރުކުރަން ނިންމީ ކުރީގެ ރައީސް އަބްދުﷲ ޔާމީން ކަމަށެވެ. އަދި އެ ސަރުކާރުގައި މަޝްރޫއު ކުރިއަށް ގެންދަން ނިންމި އިރު ރައީސް މުއިއްޒަކީ އެ ސަރުކާރުގެ ކެބިނެޓްގެ ވަޒީރެއްކަން ފާހަގަކޮށްފައި ވެސްވެ އެވެ.