ހައިވޭގައި ހަރުކޮށްފައި ހުރި ސޯލާ ޕެނަލްތަކަށް ގެއްލުން ވެފައިވާ ތަން ފެންނަ ވީޑިއޯއަކުން ނަގާފައިވާ ސްކްރީން ޝޮޓެއް (ވީޑިއޯ/މިދުއަމް، އެކްސް)
ހުޅުލޭ-ހުޅުމާލޭ ހައިވޭގައި ޓެކްސީއެއް ސޯލާ ޕެނަލްތަކުގައި ޖެހި ގެއްލުން ވެއްޖެ
މާލެ-ހުޅުމާލެ ހައިވޭގެ ހަތަރު ލޭނު އޮންނަ ސަރަހައްދުން ދުއްވާފައި ދިޔަ ކާރެއް، އެ ސަރަހައްދުގައި ހަރުކޮށްފައި ހުރި ސޯލާ ޕެނަލްތަކުގެ ސްޓްރަކްޗާގައި ޖެހި މިއަދު ހެނދުނު އެކްސިޑެންޓެއް ހިނގައިފި އެވެ.
ވީ ކިހިނެއް؟ - ފުލުހުން ބުނީ ހުޅުމާލެ އިން މާލެއަށް ދަތުރުކުރި ޓެކްސީއެއް ކޮންޓްރޯލު ނުވެ ގޮސް، ސޯލާ ޕެނަލްތަކުގައި ޖެހި، އެކްސިޑެންޓް ހިނގިކަމުގެ ރިޕޯޓު ލިބުނީ ހެނދުނު 7:10 ހާއިރު ކަމަށެވެ.
ތަފްސީލް - އެ އެކްސިޑެންޓުގައި މީހަކަށް އަނިޔާއެއް ނުވާ ކަމަށް ފުލުހުން ބުންޏެވެ.
ސޯޝަލް މީޑިއާގައި އާންމުވެފައިވާ ފޮޓޯތަކުން ފެންނަ ގޮތުގައި:
-
ހަތަރު ލޭން އޮންނަ ސަރަހައްދުގެ މެދުގައި މިހާރު ހަރުކޮށްފައި ހުރި ސޯލާ ޕެނަލްތަކުގެ ސްޓްރަކްޗާގައި ޓެކްސީ ޖެހުމުން، އޭގެ ބައެއް ޕެނަލްތައް ހުރީ ބަނޑިވެފައި
-
އެއްވެސް އެއްޗެއް ވެއްޓިފައެއް ނުވޭ
-
ޓެކްސީއަށް ގެއްލުން ލިބިފައިވޭ
އެނގުން މުހިއްމު - މިއީ ރާއްޖޭގައި މިހާތަނަށް ހިންގާ އަވިން ހަކަތަ އުފައްދާ އެންމެ ބޮޑު މަޝްރޫއުގެ ދަށުން ހަރުކުރި ސޯލާ ޕެނަލްތަކަށް ގެއްލުމެއް ލިބުނު ފުރަތަމަ ފަހަރެވެ. މި މަޝްރޫއުގެ މަސައްކަތް ނިންމައި ސޯލާ ޕެނަލްތައް ބޭނުންކުރާކަށް އަދި ނުފަށަ އެވެ.
ވޯލްޑް ބޭންކުގެ ހިލޭ އެހީގައި ތައިލޭންޑުގެ އެންސިސް ކުންފުންޏާ ހަވާލުކޮށްގެން ހުޅުމާލެ-މާލެ ހައިވޭގައި ގާއިމުކުރާ ސޯލާ ނިޒާމުގެ ދަށުން:
-
ދުވާލަކު 5 މެގަވޮޓުގެ ސޯލާ ހަކަތަ އުފައްދާނެ
-
އަހަރެއްގެ މައްޗަށް 7.3 މިލިއަން ކަރަންޓު ޔުނިޓު އުފައްދާނެ
-
ތެލަށް ކުރާ ހޭދައިން 20 މިލިއަން ރުފިޔާއާ ހަމައަށް ކޮންމެ އަހަރަކު ސަލާމަތް ކުރެވޭނެ
-
މިއީ މިހާތަނަށް ރާއްޖޭގައި އެންމެ ގިނަ ސޯލާ ޕެނަލް ހަރުކޮށްގެން ގާއިމުކުރާ ނިޒާމު
-
ސޯލާ ޕެނަލްތަކުން އުފައްދާ ކަރަންޓު ސްޓެލްކޯއަށް ވިއްކާ ރޭޓަކީ ޔުނިޓަކަށް 10.09 ސެންޓު (1.681ރ.)