ބިދޭސީ އަންހެނަކު ލައްވައި ހަށިވިއްކުވި ދިވެހި ފިރިހެނަކު ހައި ކޯޓުގައި ވެސް ކުށްވެރިވެއްޖެ

ކެންޔާ އަންހެނަކު ލައްވައި ހަށި ވިއްކުވި މައްސަލައެއްގައި ދިވެހި ފިރިހެނަކު ހަތް އަހަރަށް ޖަލަށް ލާން ކްރިމިނަލް ކޯޓުން ކުރި ހުކުމަށް ހައި ކޯޓުން ވެސް މިއަދު ތާއީދުކޮށްފި އެވެ.

އެ މައްސަލައިގައި ޖަލު ހުކުމެއް އިއްވާފައި ވަނީ، ސ.ހިތަދޫ / ސައުތުކްރޯސް، މޫސާ މުންތަސިމްގެ މައްޗަށެވެ.

ވީ ކިހިނެއް؟ - ދައުލަތުން ބުނެފައިވަނީ، ޑިސެމްބަރު 2016 ގައި "ވަން އެންޑް އޯލް" ގެސްޓް ހައުސްގެ ކޮޓަރިއެއްގެ ތެރޭގައި ކެންޔާ އަންހެނަކު ލައްވައި ފައިސާއަށް ހަށިވިއްކުމުގެ އަމަލު މޫސާ މުންތަސިމް ހިންގުވާފައިވާ ކަމަށެވެ. އެހެންކަމުން އޭނާގެ މައްޗަށް އުފުލީ މީހަކު ލައްވާ ހަށިވިއްކުވުމުގެ ކުށުގެ ދައުވާ އެވެ.

ކްރިމިނަލް ކޯޓުން އެ މައްސަލައިގައި ނިންމީ އޭނާގެ މައްޗަށް ދައުވާ ސާބިތުވާ ކަމަށެވެ. އަދި ކުށުގެ އަދަބެއްގެ ގޮތުން، އޭނާ ހަތް އަހަރަށް ޖަލަށް ލާން 2017 ގައި ހުކުމް ކުރި އެވެ.

ތަފްސީލް - މައްސަލަ ހައި ކޯޓުގައި އިސްތިއުނާފުކޮށް، މޫސާ މުންތަސިމްގެ ފަރާތުން ފާހަގަކުރި އެއް ނުކުތާއަކީ، ހަށިވިއްކި މީހާގެ ހެކިބަސް މައްސަލައިގެ ބަލައިގަނެ، އެފަރާތަކީ މައްސަލައިގެ ވިކްޓިމެއް ކަމަށް ކަނޑައެޅުން ގޯސް ކަމަށެވެ. އަދި އެކަށީގެންވާ ޝައްކެއް ނެތް މިންވަރަށް ދައުވާ ސާބިތުނުވާ ކަމަށް ވެސް ބުންޏެވެ.

ނަމަވެސް ހައި ކޯޓުން ބުނީ، ރާވައި އިންތިޒާމު ކުރެވިގެން ހިންގާ ބޮޑެތި ކުށްތަކުގައި ގިނަ ފަހަރަށް ހެކި ނުވަތަ ގަރީނާ ލިބެން ނެތުމުން، ކުށުގެ ބައިވެރިންގެ ހެކިބަހަކީ އެ ހެކިބަހުން އެކަނި ޖިނާއީ މައްސަލަ ސާބިތުކުރުމަށް ފުދޭ ދަލީލެއް ކަމުގައި ނުވިޔަސް، އެ ހެކިބަހަށް ތާއީދު ލިބޭ އެހެން ދަލީލުތަކާއި ގަރީނާތަކާ އެކު ޖިނާއީ މައްސަލަ ސާބިތުކުރުން ހުއްދަކުރާ ކަމަށެވެ. މައްސަލަ ސާބިތުކުރުމަށް ދައުލަތުން ހަމައެކަނި ހުށަހެޅީ ހަށި ވިއްކި މީހާގެ ހެކިބަސް ނޫން ކަމަށާއި އޭނާގެ ބަހާ ގުޅޭ އެހެން ގިނަ ހެކިތަކެއް ހުށަހެޅިކަން ވެސް ކޯޓުން ފާހަގަކުރި އެވެ.

ހައި ކޯޓުގެ ނިންމުން - "ހަށިވިއްކުމަކީ އިސްލާމީ ޝަރީއަތުގައި ހިމެނޭ ބޮޑެތި ފާފަތަކުގެ ތެރެއިން ޒިނޭކުރުން ވެސް އޭގައި ހިމެނިދާނެ ކުށަކަށް ވެފައި މި ބާވަތުގެ ކުށްތަކަކީ އާންމުކޮށް ކުށުގެ ބައިވެރިންގެ މެދުގައި އެކަހެރި މާހައުލުގައި ކުރެވޭ ކުށްތަކެއް ކަމުގައިވާތީ އާއި މިބާވަތުގެ ކުށުގެ ވެށީގެ ތެރޭގައި ތިބޭނީ އަދުލުވެރިކަން ގެއްލިފައިވާ ފާސިގުން ކަމުގައި ތުހުމަތުކުރެވޭ ބަޔަކު ކަމުގައި ވެދާނެތީ، މިބާވަތުގެ ކުށުގެ ބައިވެރިއެއްގެ ހެކިބަހަށް ބުރަދަންލިބޭ އެހެނިހެން ގަރީނާއާ އެކު އެ ހެކިބަސް ޝަރީއަތަށް ގަބޫލު ކުރެވިދާނެއެވެ." 

ހުކުމް - އެހެންކަމުން، މައްސަލަ ބެލި ތިން ފަނޑިޔާރުން އިއްތިފާގުން ހުކުމް ކުރީ، އެ މައްސަލައިގައި ކްރިމިނަލް ކޯޓުން ކުރި ހުކުމް ރަނގަޅު ކަމަށާއި އެ ހުކުމަށް ބަދަލުގެންނަން ޖެހޭ ސަބަބެއް ނެތް ކަމަށެވެ.