މިނިސްޓަރުގެ ގޮވާލުން: ބޭރުން ކިޔަވައިގެން ރާއްޖެ އައިސް ހިދުމަތް ކޮށްދީ

ރާއްޖެއިން ބޭރުން ތައުލީމް ހާސިލް ކުރަމުންދާ ދިވެހި ދަރިވަރުން ވެސް، ކިޔަވައި ނިމިގެން ރާއްޖެ  އައިސް ގައުމަށް ހިދުމަތް ކުރުމަށް އެޑިއުކޭޝަން މިނިސްޓަރު ޑރ. އިސްމާއިލް ޝަފީއު ރޭ އިލްތިމާސް ކުރައްވައިފި އެވެ.

ވީ ކިހިނެއް؟ - މިނިސްޓަރު ޝަފީއު މިގޮތަށް އިލްތިމާސް ކުރެއްވީ ޔުނައިޓެޑް އަރަބް އެމިރޭޓްސް (ޔޫއޭއީ)ގައި ދިރިއުޅޭ ދިވެހި ދަރިންވަރުންނަށް އަމާޒުކޮށް އިސްލާމް އަދި ދިވެހި މާއްދާ އޮންލައިންކޮށް ކިޔަވައިދިނުމަށް ސަރުކާރުން ފެށި ޕައިލެޓް ޕްރޮގްރާމް، 'ރިވެލި' އިފްތިތާހު ކުރުމަށް ދުބާއީގައި ބޭއްވި ހާއްސަ ރަސްމިއްޔާތުގަ އެވެ.

ތަފްސީލު - ތާޖް ދުބާއީ ހޮޓެލްގައި ބޭއްވި މި ރަސްމިއްޔާތުގައި އެ ޕްރޮގްރާމް އިފްތިތާހުކޮށްދެއްވުމުގެ ކުރިން ވާހަކަ ދައްކަވަމުން މިނިސްޓަރު ޝަފީއު ވިދާޅުވީ މި ޕްރޮގްރާމަކީ ޔޫއޭއީގައި ދިރިއުޅޭ ބެލެނިވެރިންގެ އެދުމުގެ މަތިން ފެށި ކަމަކަށްވާއިރު، އޭގެން ދައްކުވައި ދެނީ އެ ބެލެނިވެރިން ވެސް ދަރިވަރުން ތަރުބިއްޔަތު ކުރަން ބޭނުން ވަނީ  "ދިވެއްސެއްގެ ގޮތުގައި" ކަމަށެވެ. އިސްލާމީ ރިވެތި އުސޫލުން ގައުމަށް ލޯބި ޖެހިފައިވާ ދަރިންތަކެއް ތަރުބިއްޔަތު ކުރަން ބޭނުންވާކަން ބެލެނިވެރިންގެ އެ އެދުމުން އެނގޭ ކަމަށް ޝަފީއު ވިދާޅުވި އެވެ.

"ކޮންމެ ކުއްޖަކަށް ވެސް ރާއްޖޭގެ ތާރީހު، ދިވެހި އަބްތޯލުންގެ އަގުހުރިމއަގުބޮޑު ޒިކުރާ އަދި ދިވެހި ދިދައިގެ ފުން މާނަތައް ކޮންމެ ދަރިވަރަކަށް ވެސް އެނގުމަކީ މުހިންމުކަމެއް،" އެއީ، ކޮންމެ ގައުމެއްގައި ދިވެހިން ވަޒަންވެރިވެގެން ތިބި ނަމަވެސް އުގެނެން ޖެހޭ ކަންކަންކަން ފާހަގަކުރައްވާ މިނިސްޓަރު ވިދާޅުވި އެވެ.

އެއާއެކު ޝަފީއުގެ އޮތް ކަންބޮޑުވުން އޭނާ ހިއްސާ ކުރެއްވި އެވެ. އެއީ އެކި އެކި ސްކޮލާޝީޕްތަކުގައި ރާއްޖެއިން ބޭރުން ކިޔެވުމަށް ފަހު ދިވެހި ދަރިވަރުން ދިވެހި ގައުމަށް ހިދުމަތް ނުކުރާ މައްސަލަ އެވެ.

"ވަރަށް ގިނަ ދަރިވަރުން ރައީސުލްޖުމްހޫރިއްޔާގެ ސްކޮލަޝިޕްގައި، ހައި އެޗީވާޒް ސްކޮލަޝިޕްގައި އަދި އެހެނިހެން ދައުލަތުގެ ސްކޮލިޝަޕްތަކުގައި ވެސް މަތީ ތައުލީމް ހާސިލްކޮށްގެން ރާއްޖެއަށް އަނބުރާ ނާދޭ. މިއީ، ވަރަށް ބޮޑު ދެރައެއް. ވަރަށް ބޮޑު ގެއްލުމެއް،" މިނިސްޓަރު ވިދާޅުވި އެވެ.

"ބޭރު ދުނިޔެއިން ވެސް ތަޖުރިބާ އާއި ތައުލީމް ހާސިލުކުރުމަށް ފަހު ރާއްޖެއަށް އެނބުރި އައިސް، ރާއްޖެއަށް ހިދުމަތް ކުރުމަކީ ކޮންމެ ކުއްޖެއްގެ އަޒުމެއް ކަމުގައި، ފަހުރެއް ކަމުގައި ކަނޑައަޅަން ޖެހޭ."

މިނިސްޓަރުގެ ވާހަކައަށް ފަހު، 'ރިވެލި' ޕްރޮގްރާމް އިފްތިތާހު ކޮށްދެއްވީ ރައީސް މުހައްމަދު މުއިއްޒު އެވެ. މި ރަސްމިއްޔާތުގައި ފޮރިން މިނިސްޓަރު މުސާ ޒަމީރާއި ރާއްޖެއިން ޔޫއޭއީއަށް ކަނޑައަޅާފައި ހުންނެވި ސަފީރު، އެމްބަސަޑާ އެެޓް ލާޖް އަދި ޕީއެންސީގެ ނައިބު ރައީސް މުހައްމަދު ހުސައިން ޝަރީފް ވެސް ވަހަކަ ދެއްކެވި އެވެ.

މިނިސްޓަރު ޒަމީރުގެ ވާހަކައިގައި، މި ހިދުމަތް އެހެން ގައުމުތަކުގައި ބޭއްވުމަށް ޕްރޮގްރާމް ފުޅާ ކުރަން ސަރުކާރުން ނިންމާފައިވާ ކަމަށް އޭނާ ރޭ އިއުލާން ކުރެއްވި އެވެ.