ޕީއެންސީގެ ކެންޑިޑޭޓުން ތިއްބާ ރައީސް ވަކި ބޭފުޅުން ނެރޭ މައްސަލަތަކެއް

ކުރިއަށް އޮތް ރައްޔިތުންގެ މަޖިލިސް އިންތިހާބުގައި ވާދަކުރަން ޕީޕީއެމް-ޕީއެންސީގެ ޓިކެޓް ލިބުނު ކެންޑިޑޭޓުންނަށް ތާއީދުނުކޮށް ރައީސް މުހައްމަދު މުއިއްޒު އަމިއްލަ ގޮތުން ސަރުކާރުގެ ކެންޑިޑޭޓުން ނެރެމުންދާ ކަމުގެ އަޑުތައް ގަދަވެ އެ ޕާޓީ ތެރޭ މައްސަލަ ގޯސްވެއްޖެ އެވެ. 

ވީ ކިހިނެއް؟ - މިހާތަނަށް ދެ ދާއިރާއަކުން އެގޮތަށް ކެންޑިޑޭޓުން ވާދަ ކުރާ ކަމުގެ ކަންބޮޑުވުން ޕީއެންސީގެ ކެންޑިޑޭޓުންގެ ކެމްޕެއިން ޓީމުތަކުން އަންނަނީ ފާޅު ކުރަމުންނެވެ. އޭގެ ތެރޭގައި ހިމެނެނީ:

ތަފްސީލު - ޕީއެންސީން ޕްރައިމަރީއަކަށް ހުޅުވާލުމުން އެންމެ ކެންޑިޑޭޓަކު ކުރިމަތިލުމުން ޕާޓީގެ ޓިކެޓް ކަށަވަރުވެފައި ވަނީ، ރައީސް މުއިއްޒުގެ ރިޔާސީ ކެމްޕެއިންގައި ވެސް އެ މަނިކުފާނާ އެކު ކޮންމެ ރަށަކަށް ވަޑައިގެން ވަރަށް އަރިސްކޮށް މަސައްކަތް ކުރެއްވި އިބްރާހިމް ސަނާހް (ސަންޓޯ) އެވެ. ރައީސް މިދިޔަ އަންގާރަ ދުވަހު ތ. އަތޮޅަށް ފެއްޓެވި ދަތުރުގައި ބައިވެރިވުމަށް ސަނާހުއަށް ދައުވަތު ދީފައެއް ނުވެ އެވެ.

ސަނާހްގެ ކެމްޕެއިންގައި އުޅުއްވާ ބައެއް ފަރާތްތަކުން ޝޯޝަލް މީޑިއާގައި ތުހުމަތުކޮށްފައިވާ ގޮތުގައި ސަރުކާރުން އުޅެނީ އަމިއްލަ ގޮތުން ވާދަ ކުރައްވާ އެ ދާއިރާގެ މިހާރުގެ މެންބަރު އަބްދުﷲ ރިޔާޒުގެ ބޭބެ، އަހުމަދު ރިޔާޒަށް ތާއީދުކޮށްގެން ނެރުމަށެވެ. އެ ވާހަކަތަކަށް ބާރުދޭ ވީޑިއޯއެއް ވެސް ޝޯޝަލް މީޑިއާގައި ދަނީ ދައުރުވަމުންނެވެ.

ޝޯޝަލް މީޑިއާގައި ދައުރުވަމުންދާ ވީޑިއޯގައި ރައީސްގެ ތ. އަތޮޅު ދަތުރުގައި ބައިވެރިވެވަޑައިގެންނަވާ މެންބަރު އަބްދުﷲ ރިޔާޒު ވެސް ފެނެ އެވެ. ރިޔާޒުގެ އަރިހުގައި  އެ ބައްދަލުވުމުގައި ރައީސްގެ އެންމެ އަރިސް ބޭފުޅުންގެ ތެރޭގައި ހިމެނިވަޑައިގަންނަވާ ރައީސް އޮފީހުގެ ދެ މިނިސްޓަރުން ކަމުގައިވާ އާދަމް ރަމީޒް އާއި އަބްދުﷲ ނަސީރުވެސް ފެނެ އެވެ. އޭގެ އިތުރުން އަމިއްލަ ގޮތުން ވާދަކުރައްވާ ރިޔާޒުގެ ބޭބެ އަހުމަދު ރިޔާޒު ވެސް އެ ބައްދަލުވުމުގައި އިންނެވި އެވެ.

"ދެން އަދި ތިމަރަފުށީ ކައުންސިލް މެމްބާސް މީޓިންގަ ވެސް ރައީސް ދަންނަވާނެ، ރައީސް ތާއީދު އޮތީ ރިޔާޒަށް ކަން. ދެން އޭގެ އިތުރުން އަޅުގަނޑަށް އަންގާފައި އޮތީ، ދެން ހުރި ކެންޑިޑޭޓަށް [ސަނާހު]އަށް ގުޅާފަ ހުރިހާ ކަމެއް ހުއްޓާލަން ވެސް، ނަންގަންނާށޭ،" އެ ވީޑީއޯގައި ރަމީޒު ވިދާޅުވާ އަޑު އިވެ އެވެ.

ރަމީޒު ވިދާޅުވި ގޮތުގައި އޭނާ އަށާއި އަބްދުﷲ ނަސީރަށް ރައީސް 'ދީފައި އޮތް އިންސްޓްރަކްޝަންއަކީ'  އެމަނިކުފާނު ތާއީދު އޮތް ކެންޑިޑޭޓަކީ އަހްމަދު ރިޔާޒު އެވެ.

އަހްމަދު ރިޔާޒަކީ، ނިމުނު އެމްޑީޕީ ސަރުކާރުގައި އެޑިއުކޭޝަން މިނިސްޓްރީގެ ސްޓޭޓް މިނިސްޓަރުކަން ވެސް ކުރެއްވި ބޭފުޅެކެވެ. އަދި މީގެ ފަހުން ތިމަރަފުށީ ދާއިރާއާ ގުޅޭ ކަންކަމުގައި މުއާމަލާތް ކުރާނީ ރިޔާޒު މެދުވެރިކޮށް ކަމަށް ވެސް ރަމީޒު ވިދާޅުވެ އެވެ.

ސަނާހު 'ދައުރު'އަށް ވިދާޅުވީ، އޭނާގެ ސަމާލުކަމަށް އެ ވީޑިއޯ އައިސްފައިވާ ކަމަށާއި 'ވެގެން އުޅޭ ގޮތެއް ނޭނގޭ' ކަމަށެވެ. އަދި ޕީއެންސީގެ ޓިކެޓަށް ވެސް އޭނާ ކުރިމަތިލީ ރައީސްގެ އެދިވަޑައިގަތުމަށްކަން ފާހަގަކުރައްވައި، ސަނާހު ވިދާޅުވީ އެ ޕްރައިމަރީގައި ވާދަ ކުރުމުގެ ފުރުސަތު އެމްއެންޕީގެ ތެރެއިން އަހުމަދު ރިޔާޒަށް ވެސް އޮތް ކަމަށެވެ.

"ނަމަވެސް އެއްވެސް ބޭފުޅަކު ވާދަ ނުކުރެއްވީމަ، ޓިކެޓް ލިބުނީ. ޓިކެޓް ލިބުނު ކަމުގެ ލިޔުން ވެސް ވަނީ ލިބިފައި. އަދި ނަން ނެގުމަށް އެއްވެސް މީހަކު އަންގާފަ އެއްވެސް ނުވޭ. އަޅުގަނޑު މިހުރީ ލިބުނު ޓިކެޓާ އެކު ހަމަ ކުރިމަތިލާ ގޮތަށް،" އޭނާ ވިދާޅުވި އެވެ.

ގައްދޫ ދާއިރާގެ ޕީއެންސީ ޓިކެޓް، ޕްރައިމަރީގައި ވާދަކޮށް ކާމިޔާބު ކުރެއްވީ މަހުމޫދު ޝަފީގް (މަހާ) އެވެ. މި މަހު ފަސް ވަނަ ދުވަހު ޕީއެންސީން ވަނީ އެ ޕާޓީގެ މަޖިލިސް ޓިކެޓް އެ ދާއިރާއަށް ލިބުނުކަމުގެ ލިޔުން ވެސް ހަވާލުކޮށްފަ އެވެ. 

ޕްރައިމަރީގެ ޓިކެޓަށް ސްޕޯޓްސް މިނިސްޓްރީގެ ޑެޕިއުޓީ މިނިސްޓަރު މުހައްމަދު އަލީ ވެސް ޝައުގުވެރިކަން ފާޅުކުރެއްވި އެވެ. ނަމަވެސް ފަހުވަގުތު އޭނާ ޕްރައިމަރީގައި ވާދަނުކުރައްވަ އެވެ. އެގޮތުން:

އެ ދާއިރާގެ ޕީއެންސީގެ ޓިކެޓް ލިބިވަޑައިގެންނެވި މަހުމޫދު ޝަފީގު 'ދައުރު'އަށް ވިދާޅުވީ ރައީސް މުހައްމަދު މުއިއްޒުގެ ފުރިހަމަ ތާއީދާއި ސަޕޯޓް އޭނާއަށް އެބަ އޮތް ކަމަށާއި އަދި އެ ޔަގީންކަން ވެސް އެމަނިކުފާނު ދެއްވާފައިވާ ކަމަށެވެ.

ސަރުކާރެއްގެ މަގާމެއްގައި ހުރެ ސަރުކާރު ހިންގާ ޕާޓީގެ ކެންޑިޑޭޓާ ދެކޮޅަށް އިންތިހާބުގައި ނިކުތް ނަމަވެސް މުހައްމަދު އަލީއަށް އަދި މިހާތަނަށް އެއްވެސް ފިޔަަވަޅެއް އަޅާފައި ނުވާކަމަށް މަހުމޫދު ޝަފީގު ފާހަގަކުރެއްވި އެވެ.

އޭނާ ތުހުމަތު ކުރެއްވި ގޮތުގައި ސަރުކާރުގެ މިނިސްޓަރުން ވެސް މުހައްމަދު އަލީއަށް އަންނަނީ ކެމްޕެއިންކޮށްދެއްވަމުންނެވެ.

ޕީއެންސީގެ އެތެރޭގެ މަސްދަރުތަކުން 'ދައުރު'އަށް އެނގިފައިވާ ގޮތުގައި ކުރިއަށް އޮތް ދުވަސްތަކުގައި ރައީސް މުއިއްޒުގެ ތާއީދާ އެކު ސަރުކާރު ކެންޑިޑޭޓުންގެ ގޮތުގައި އިތުރު ކެންޑިޑޭޓުން މަޖިލިސް އިންތިހާބުގައި ވާދަ ކުރުމަކީ އެކަށީގެންވާ ކަމެކެވެ.

މިކަމާ ގުޅޭ ގޮތުން ޕީއެންސީގެ ރަސްމީ ބަހެއް ހޯދުމަށް މަސައްކަތް ކުރި ނަމަވެސް، އެ ޕާޓީގެ ބަހެއް އަދި ނުލިބެ އެވެ.