ރޯދަ ނިމުމުން އާ މާރުކޭޓުގެ މަސައްކަތް ފަށާނެ: ރައީސް

މާލޭ ލޯކަލް މާރުކޭޓާއި ދަތުރުވެރިންގެ މާރުކޭޓު އަދި މަސް މާރުކޭޓު ހިންގަން އަޅާ ޒަމާނީ އިމާރާތުގެ މަސައްކަތް އަންނަ އޭޕްރީލް މަހު ފަށާނެ ކަމަށް ރައީސް މުހައްމަދު މުއިއްޒު ވިދާޅުވެއްޖެ އެވެ.

ވީ ކިހިނެއް؟ - އެކި ދާއިރާތަކުގައި ރައްޔިތުންގެ ހުރި ކަންބޮޑުވުންތައް ހިއްސާކޮށް ރައީސް އާ ކުރާ ސުވާލުތަކަށް އެމަނިކުފާނު ދެއްވާ ޖަވާބު އާންމުންނާ ހަމައަށް ގެނެސްދިނުމަށް ސަރުކާރުން ކުރިއަށްގެންދާ 'ރައީސްގެ ޖަވާބު' ސިލްސިލާގައި ހއ. ބާރަށަށް ނިސްބަތްވާ އަބްދުﷲ އިބްރާހިމް ވަނީ ލޯކަލް މާރުކޭޓުގެ ސާފުތާހިރުކަމުގެ މައްސަލަ އަށް ހައްލެއް ގެނެސްދިނުމަށާއި މާރުކޭޓު ވިޔަފާރީގައި ބިދޭސިންގެ ބާރު އޮންނާތީ އެކަމާ ކަންބޮޑުވުް ފާޅުކޮށް، އެ މައްސަލަތަކަށް ހައްލު ގެނެސްދިނުމަށް ސަރުކާރުން ކުރާނެ ކަންތަކާ ބެހޭގޮތުން ރައީސް އާ ސުވާލުކޮށްފަ އެވެ.

ތަފްސީލް - އެ ސުވާލުތަކަށް ޖަވާބު ދެއްވަމުން ރައީސް މުއިއްޒު ވިދާޅުވީ މާލޭ ދަތުރުވެރިންގެ މާރުކޭޓާއި ލޯކަލް މާރުކޭޓަކީ އެކަށީގެންވާ ފެންވަރުގައި ހުރިތަންތަން ނޫން ކަމަށެވެ.

މާރުކޭޓުތައް ހިންގަން އާ އިމާރާތެއް އެޅުމަށް ސަރުކާރުން ދޭންޖެހޭ ހުރިހާ ހުއްދަ އެއް މިހާރު މާލޭ ސިޓީ ކައުންސިލަށް ދީފައިވާކަމަށް ރައީސް ވިދާޅުވި އެވެ.

"...އެ ދެ މާރުކޭޓުގެ ބަދަލުގައި މިހާރު ލޯކަލް މާރުކޭޓު އެ ހުރިތަނުގައި އެންމެ ޒަމާނީ ފެންވަރުގައި، ދުނިޔޭގެ އެންމެ ރަނގަޅު ފެންވަރުގައި މާރުކޭޓުތައް ހުންނަ ފެންވަރުގެ އިމާރާތެއް އަޅާފައި އެތަނުގައި މަސްމާރުކޭޓުވެސް އަދި ލޯކަލް މާރުކޭޓު، ދަތުރުވެރިންގެ މާރުކޭޓުގައި ވިއްކާތަކެތި ވިއްކޭކަހަލަ ޖާގަވެސް ހިމެނޭގޮތަށް 4 ބުރީގެ މާރުކޭޓު އިމާރާތެއް އަޅަން،" ރައީސް ވިދާޅުވި އެވެ.

މާރުކޭޓު އިމާރާތް ހަދާނީ ޕާކިން ޖާގަ ވެސް ހިމެނޭގޮތަށެވެ.

ރައީސް ވިދާޅުވީ އާ އިމާރާތާއެކު މާރުކޭޓުގެ ސާފުތާހިރުކަން ކުޑަވުމުގެ މައްސަލައަށް ހައްލު އަންނާނެ ކަމަށާއި އާ އިމާރާތަކީ ޖާގަ ތަނަވަސް ތަނަކަށް ވާނެ ކަމަށެވެ.

"އެ މާރުކޭޓުގެ މަސައްކަތް އޭޕްރީލް މަހުގެ ތެރޭގައި ރޯދަ މަސް ނިމިގެން [ފެށޭނެ]،"

އެތަން ހަދާނީ މިހާރުގެ ލޯކަލް މާރުކޭޓު ހުރިތަނުގައި، އެ އިމާރާތް ރޫޅާލުމަށްފަހު ކަމަށް ވެސް ރައީސް ވިދާޅުވި އެވެ. 

ފާހަގަ ކުރެވޭ - އާ މާރުކޭޓު އިމާރާތެއް އެޅުމަކީ ރައީސް މުއިއްޒު މާލޭ މޭޔަރުކަމުގައި ހުންނެވިއިރު ކުރިއަށް ގެންދަން ރޭވި މަޝްރޫއެކެވެ. ސަރުކާރުން ބޭނުންވާ ހުއްދަތައް ނުލިބިގެން އޭރު އެ މަސައްކަތްތައް އޮތީ ހުއްޓިފަ އެވެ.