ދިގުރަށު ކުނިގޮނޑުން ފެނުނު ކުއްޖާގެ މަންމައަށް ދައުވާކޮށްފި

އދ. ދިގުރަށުގައި ކުއްޖަކު ވިހެއަކުމަށް ފަހު ކޮތަޅަކަށް ލާފައި ކުނިގޮނޑަށް އެއްލާލި ސްރީ ލަންކާގެ އަންހެން މީހާގެ މައްޗަށް ދައުވާ ކުރަން ޕްރޮސެކިއުޓާ ޖެނެރަލްގެ އޮފީހުން ކްރިމިނަލް ކޯޓަށް އިއްޔެ ފޮނުވައިފި އެވެ.

ވީ ކިހިނެއް؟ - މިދިޔަ މަހުގެ 3 ވަނަ ދުވަހު ހެނދުނު، ދިގުރަށު ކުނިގޮނޑަށް ކޮތަޅަކަށް ލާފައި އެއްލާލާފައިވާ ކުއްޖަކު ވަނީ ފެނިފަ އެވެ. ކުއްޖާގެ މަންމަ، ހިރަންޏާ ކުމުދުމާލި ޑި އަލްވިސް ހައްޔަރުކޮށްފައިވަނީ ލަންކާއަށް ފުރަން އެއާޕޯޓަށް ގޮސް ހުއްޓަ އެވެ. އަންހެން މީހާ ޝަރީއަތް ނިމެންދެން ބަންދުކޮށްފައި ވާއިރު، ޕީޖީން އޭނާގެ މައްޗަށް ދައުވާ ކުރަން ކޯޓަށް ފޮނުވީ އިއްޔެ އެވެ.

ތަފްސީލް - ޕީޖީން ވަނީ ހިރަންޏާގެ މައްޗަށް ތިން ދައުވާއެއް ކޮށްދިނުމަށް އެދިފަ އެވެ.

ހިރަންޏާގެ މައްޗަށް ދައުވާކޮށްދިނުމަށް އެދި ޕީޖީން ހުށަހެޅި މައްސަލާގައި ބުނެފައިވަނީ:

ކުއްޖާ ވިހެއުމަށް ފަހު، ފާހާނާތަށި ތެރެއިން ކުއްޖާ ނަގައި ކޮތަޅުތަކަކަށް ލައިގެން ގެންގޮސް، ދިގުރަށު ފަރީދީ މަގަށްވާގޮތަށް ހަދާފައި ހުންނަ ފަން ކޮށިގަނޑުގެ ބޭރުގައި ހުރި ކުނިވާ ބާވަތުގެ ކުނި އެޅުމަށް ހާއްސަކޮށްފައިވާ ފެހި ޑަސްބިނަށް ކުއްޖާގެ ހަށިގަނޑު އެއްލާލައި ކުއްޖާގެ ފުރާނައަށް ގެއްލުންވާނެހެން ކުއްޖާއާ މެދު އަމަލުކޮށް، ކުއްޖާ މަރާލާފައިވާ ކަމަށް ވެސް ބުނެފައިވެ އެވެ.

މީގެ އިތުރުން، ހިރަންޏާ ބަލިވެއިނީއްސުރެ، ކުއްޖާގެ ސިއްހަތު ސަލާމަތުން ބެހެއްޓުމުގެ ގޮތުން އަޅަން ޖެހޭ ރައްކާތެރިކަމުގެ ފިޔަވަޅުތައް އަޅާފައި ނުވާ ކަމަށާއި އެފަދަ ފިޔަވަޅެއް އެޅުމުގެ ބަދަލުގައި ބަލިވެއިންކަން ސިއްރުކޮށް، ވިހަން އުޅޭކަން އެނގުމުން ހޮސްޕިޓަލަށް ނުގޮސް، ވިހެއުމަށް ސިއްހީ ފަރުވާ ލިބޭ ތަނަކަށް ދިއުމުގެ މަގު ފަހިވެފައިވަނިކޮށް އެ ފުރުސަތުގެ ބޭނުން ކޮށްފައި ނުވާ ކަމަށް ވެސް ޕީީޖީން ބުންޏެވެ.