މަހެއް ނުވެ ޝަހީބު ތަރުޖަމާނުކަމުން ވަކިކޮށް، ފޮރިން މިނިސްޓްރީއަށް ބަދަލުކޮށްފި

ރައީސް އޮފީހުގެ ތަރުޖަމާނަކަށް އައްޔަން ކުރިތާ މަސް ދުވަސް ނުވެ، މުހައްމަދު ޝަހީބު އެ މަގާމުން ވަކިކޮށް، ފޮރިން މިނިސްޓްރީއަށް ބަދަލުކޮށްފި އެވެ.

ވީ ކިހިނެއް؟ - ރައީސް އޮފީހުގެ ވެބްސައިޓުގައި ސަރުކާރު މަގާމުތައް ފެންނަ ޕޭޖްގައި ޝަހީބު މިހާރު ހިމަނާފައި ވަނީ، ފޮރިން މިނިސްޓްރީގެ ސްޓޭޓް މިނިސްޓަރުގެ މަގާމުގަ އެވެ.

ތަފްސީލު - ރައީސް އޮފީހުގެ ތަރުޖަމާނަކަށް ވެސް ޝަހީބު ހުންނެވީ ސްޓޭޓް މިނިސްޓަރު ފެންވަރުގަ އެވެ.

ޝަހީބު ތަރުޖަމާނަކަށް އައްޔަންކޮށްފައި ވަނީ 13 ޑިސެމްބަރުގަ އެވެ.

ޝޯޝަލް މީޑިއާ ޕެލްޓް ފޯމު، އެކްސްގައި ރައީސް އޮފީހުގެ ތަރުޖަމާނު ބޭނުންކުރުމަށް ހާއްސަކޮށްފައިވާ އައިޑީން ވެސްް ޝަހީބުގެ ނަމާއި ފޮޓޯ މިހާރު ވަނީ އުނިކޮށްފަ އެވެ.

ކުރީގެ ރައީސް އަބްދުﷲ ޔާމީންގެ ސަރުކާރުގައި ބްރޯޑްކާސްޓިން ކޮމިޝަނުން މީޑީއާތައް ޖޫރިމަނާ ކުރި އިރު، އެ ކޮމިޝަންގެ ރައީސް އަކަށް ހުންނެވި ޝަހީބު ތަރުޖަމާނަކަށް އައްޔަން ކުރުމާ އެކު، ބައެއް ފަރާތްތަކުން ފާޑުކިޔުން ވެސް އަމާޒުވި އެވެ. އަދި ނޫސްވެރިންގެ ބައްދަލުވުމުގައި ވެސް އޭނާ އަމަލު ކުރައްވާ ގޮތުން ނޫސްވެރިންގެ ކަންބޮޑުވުންތައް ހުއްޓެވެ.

ޝަހީބުގެ މަގާމު ބަދަލުކޮށްފައި މިވަނީ، ނޫސްވެރިންގެ ހުރި ބައެއް ކަންބޮޑުވުންތައް އެ ނޫސްވެރިންގެ ފަރާތުން ރައީސް މުހައްމަދު މުއިއްޒާ ވެސް މިދިޔަ ހަފްތާގައި ހިއްސާކޮށްފައި ވަނިކޮށެވެ.