ސޯލިހް މޮރިޝަސްއަށް ފޮނުއްވި ސިޓީ ސަރުކާރުން އާންމުކޮށްފި؛ ކަނޑުން ބައެއް ދޫކޮށްލާނެ ވާހަކައެއް ނެތް

ރާއްޖޭގެ ދެކުނުން އޮންނަ ޗާގޯސް ރަށްތަކަށް މޮރިޝަސްގެ ސިޔާދަތީ ބާރު ހިނގާކަން ރާއްޖޭން ބަލައިގަނެ، އޭރުގެ ރައީސް އިބްރާހިމް މުހައްމަދު ސޯލިހް މޮރިޝަސްގެ ބޮޑުވަޒީރު ޕްރަވިންދް ކުމާރު ޖުގްނައުތާއަށް މިދިޔަ އަހަރު ފޮނުއްވި ސިޓީ ސަރުކާރުން މިއަދު އާންމުކޮށްފި އެވެ.

ވީ ކިހިނެއް؟ - މިއީ އެ އަހަރުގެ ޖޫން މަހު ރުވާންޑާގައި ބޭއްވި ކޮމަންވެލްތުގެ ގައުމުތަކުގެ ވެރިންގެ ސަމިޓުގެ ހަވާސާގައި އޭރުގެ ރައީސް ސޯލިހާއި މޮރިޝަސްގެ ބޮޑުވަޒީރާ ދެމެދު ބޭއްވެވި ބައްދަލުކުރެއްވުމުގައި ކުރެއްވި މަޝްވަރާތަކާ ހަވާލާދެއްވައި، މިދިޔަ އަހަރުގެ 22 އޮގަސްޓްގައި ފޮނުއްވި ސިޓީ އެކެވެ.

އޭރު އިދިކޮޅުގައި ތިބި މި ސަރުކާރުގެ އިސް ފަރާތްތަކުން ތުހުމަތުކުރީ، ރާއްޖެ އާއި ޗާގޯސްއާ ދެމެދުން ފުށުއަރާ ކަނޑުގެ ސަރަހައްދު ބަހަން، އެކަމާ ބެހޭ ބައިނަލްއަގުވާމީ ޓްރައިބިއުނަލް (އިޓްލޮސް) އިން މިދިޔަ އޭޕްރިލްގައި ނިންމީ، ރައީސްގެ އެ ސިޓީފުޅުގެ ސަބަބުން ކަމަށެވެ. އޭރު އެ ސިޓީ އާއްމު ކުރަން ސަރުކާރުން ދެކޮޅު ހެދި ނަމަވެސް، މިދިޔަ ސެޕްޓެމްބަރު މަހުގެ ތެރޭ އެ ސިޓީ ވަނީ ލީކު ކޮށްލައިފަ އެވެ.

ތަފްސީލް - ރާއްޖޭގެ ކަނޑުގެ ސަރަހައްދުން ގެއްލުނު ކަމަށް ބުނާ ބައި ހޯދުމާ ބެހޭގޮތުން މި ސަރުކާރުން ކުރަމުން އަންނަ މަސައްކަތްތައް ހާމަކޮށް މިއަދު ރައީސް އޮފީހުން ނެރުނު ބަޔާނާއެކު، އެ ސިޓީ ވަނީ އާންމުކޮށްފަ އެވެ.

މިއަދު އާންމުކުރީ މިދިޔަ ސެޕްޓެމްބަރުގައި ލީކުކުރި ސިޓީއާ ހަމަ އެކައްޗެކެވެ. އެ ސިޓީގައި، ރާއްޖޭގެ ކަނޑުން ބައެއް މޮރިޝަސްއަށް ދޫކޮށްލުމާ ގުޅޭ ވާހަކައެއް ނެތް އިރު، އދ.ގެ އާންމު މަޖިލީހުގައި ރާއްޖޭން މޮރިޝަސްއާ އެއްކޮޅަށް ވޯޓު ދިނަސް، އިޓްލޮސްގައި ރާއްޖޭން ވަކާލާތުކުރި ކުރުމަށް އެއްވެސް ބަދަލެއް ނާންނާނެ ކަމަށް ވެސް ބުނެފައި ވެއެވެ.

އެ ސިޓީގައި ބުނެފައިވަނީ:

މި ސިޓީއާ އެކު މިއަދު ރައީސް އޮފީހުން ނެރުނު ބަޔާނުގައި ބުނެފައިވަނީ، އެއީ ޖޫން މަހު ރުވާންޑާގައި ބޭއްވި ކޮމަންވެލްތުގެ ގައުމުތަކުގެ ވެރިންގެ ސަމިޓުގެ ހަވާސާގައި އޭރުގެ ރައީސް ސޯލިހާއި މޮރިޝަސްގެ ބޮޑުވަޒީރާ ދެމެދު ބޭއްވެވި ބައްދަލުކުރެއްވުމުގައި ކުރެއްވި މަޝްވަރާތަކާ ހަވާލާދެއްވައި ފޮނުއްވި ސިޓީއެއް ނަމަވެސް، އެ ބައްދަލު ކުރެއްވުމުގައި މަޝްވަރާ ކުރެއްވި ކަންކަމާ ގުޅޭ ގޮތުން އެއްވެސް އިރެއްގައި އެއްވެސް ލިޔެކިއުމެއް ދެ ގައުމުގެ ދެމެދުގައި ބަދަލުކޮށްފައިވާކަން ރައީސް އޮފީހުގެ ރިކޯޑުތަކުން ފެންނަން ނެތް ކަމަށެވެ.

އަދި، އެ ސިޓީ ފޮނުއްވާފައިވަނީ ވަކި ކަންކަމަކާ ގުޅުވައިގެން އެއްބަސްވެގެންކަން ދޭހަވީ ނަމަވެސް، ދެ ގައުމުގެ ދެމެދުގައި އެއްބަސްވެވުނު ކަންކަމަކީ ކޮބައިކަން އެނގޭނެ ލިޔެކިއުމެއް އަދި އަމަލީ ގޮތުން އެކަން ތަންފީޒުވީކަން އެނގޭނެ އެއްވެސް ރެކޯޑެއް ނުވަތަ ލިޔެކިއުމެއް ވެސް މިހާތަނަށް ބެލި ބެލުމުން ފެންނަން ނެތް ކަމަށް އެ ބަޔާނުގައި ވެ އެެވެ.