ރައީސް މޮރިޝަސްއަށް ފޮނުއްވި ސިޓީ: ކަނޑުން ބައެއް ދޫކޮށްލުމާ ގުޅޭ ވާހަކައެއް ނެތް

ރާއްޖޭގެ ދެކުނުން އޮންނަ ޗާގޯސް ރަށްތަކަށް މޮރިޝަސްގެ ސިޔާދަތީ ބާރު ހިނގާކަން ރާއްޖޭން ބަލައިގަނެ، ރައީސް އިބްރާހިމް މުހައްމަދު ސޯލިހް މޮރިޝަސްގެ ބޮޑުވަޒީރު ޕްރަވިންދް ކުމާރު ޖުގްނައުތާއަށް މިދިޔަ އަހަރުގެ އޮގަސްޓް މަހު ފޮނުއްވި ސިޓީ މިރޭ ލީކުވެއްޖެ އެވެ. އެ ސިޓީގައި، ރާއްޖޭގެ ކަނޑުން ބައެއް މޮރިޝަސްއަށް ދޫކޮށްލުމާ ގުޅޭ ވާހަކައެއް ނެތް އިރު، އދ.ގެ އާންމު މަޖިލީހުގައި ރާއްޖޭން މޮރިޝަސްއާ އެއްކޮޅަށް ވޯޓު ދިނަސް، އިޓްލޮސްގައި ރާއްޖޭން ވަކާލާތުކުރި ކުރުމަށް އެއްވެސް ބަދަލެއް ނާންނާނެ ކަމަށް ވެސް އެ ސިޓީގައިވެ އެވެ.

މައްސަލައިގެ ފެށުން - ރާއްޖެ އާއި ޗާގޯސްއާ ދެމެދުން ފުށުއަރާ ކަނޑުގެ ސަރަހައްދު ބަހަން، އެކަމާ ބެހޭ ބައިނަލްއަގުވާމީ ޓްރައިބިއުނަލް (އިޓްލޮސް) އިން މިދިޔަ އޭޕްރިލްގައި ނިންމި ނިންމާ ގުޅިގެން، ދެކުނުގެ އިގްތިސާދީ ސަރަހައްދުން ބައެއް ގެެއްލުނު ކަމަށް އިދިކޮޅު ފަރާތްތަކުން ބުނެ އެވެ. އެ ފަރާތްތަކުން އެންމެ ބޮޑަށް ބުނަމުން ދިޔަ އެއް ވާހަކަ އަކީ، ރައީސްގެ ސިޓީގެ ސަބަބުން އިޓްލޮސްގެ ނިންމުމަށް އަސަރު ކުރި ކަމަށާއި އެ ނިންމުމުގެ ދަށުން ރާއްޖޭގެ ކަނޑުން ބައެއް "ގެއްލުނީ" ވެސް އެ ސިޓީގެ ސަބަބުން ކަމަށެވެ.

ވީ ކިހިނެއް؟ - ރައީސް ސޯލިހް މޮރިޝަސްގެ ބޮޑުވަޒީރަށް ފޮނުއްވި ސިޓީ ދައްކަން ސަރުކާރުން މީގެ ކުރިން އެކި ފަހަރު މަތިން ދެކޮޅު ހަދާފައި ވިޔަސް، އެ ސީޓީ ވަނީ މިރޭ ސޯޝަލް މީޑިއާގައި އާންމުވެފަ އެވެ. ލީކުވެފައި ވަނީ ރައީސް ފޮނުއްވި ސިޓީކަން ސަރުކާރުގެ އިސް އޮފިޝަލަކު މިރޭ 'ދައުރު'އަށް ކަށަވަރުކޮށްދެއްވި އެވެ.

ތަފްސީލް - މިދިޔަ އަހަރުގެ 22 އޮގަސްޓްގައި ފޮނުއްވި އެ ސިޓީގައި، އެ އަހަރުގެ ޖޫން މަހު ރުވާންޑާގައި ބޭއްވި ކޮމަންވެލްތުގެ ގައުމުތަކުގެ ވެރިންގެ ސަމިޓުގެ ހަވާސާގައި ރައީސް ސޯލިހާއި މޮރިޝަސްގެ ބޮޑުވަޒީރާ ދެމެދު ބޭއްވެވި ބައްދަލުކުރެއްވުމުގައި ކުރެއްވި މަޝްވަރާތަކާ ހަވާލާދެއްވައި ރައީސް ވިދާޅުވެފައި ވަނީ، ޗާގޯސް މޮރިޝަސްއާ ހަވާލުކުރުމަށް އިނގިރޭސިވިލާތަށް ގޮވާލައި އދ.ގެ އާންމު މަޖިލީހުގައި ދެން ނަގާ ވޯޓެއްގައި ރާއްޖޭން މޮރިޝަސްއާ އެއްކޮޅަށް ވޯޓު ދޭނެ ކަމަށެވެ.

އެ ގޮތަށް ނިންމީ، ރައީސްގެ ސިޓީގައި ވިދާޅުވެފައިވާ ގޮތުގައި:

"އަޅުގަނޑު ފާހަގަކޮށްލަން ބޭނުންވަނީ، އަޅުގަނޑުމެންގެ ނިންމުމަށް އަންނަ ބަދަލަކީ، އިންޓަނޭޝަނަލް ޓްރައިބިއުނަލް އޮން ދަ ލޯ އޮފް ދަ ސީ (އިޓްލޮސް)ގައި ވަކާލާތުކުރާ ގާނޫނީ ހަމަތަކާއި ކޮމިޝަން އޮން ދަ ލިމިޓްސް އޮފް ދަ ކޮންޓިނެންޓަލްއަށް ހުށަހެޅި ހުށަހެޅުމަށް އެއްވެސް ގެއްލުމެއް ނުވާ ގޮތަށް ގެންނަ ބަދަލެއް ކަމެވެ. އަދި ރާއްޖޭން ވޯޓު ދޭ ގޮތުގެ ތަފްސީލު ވެސް ހާމަކުރާނަމެވެ،" ސިޓީގައިވެ އެވެ.

"މަނިކުފާނު ރާއްޖެ މެދުވެރިކޮށް ޗާގޯސްއަށް ޒިޔާރަތް ކުރައްވަން ބޭނުންފުޅުވާ ނަމަ، އަޅުގަނޑުގެ ސަރުކާރުން މަނިކުފާނަށް މަރުހަބާ ކިޔައި ކޮންމެ އެހީތެރިކަމެއް ފޯރުކޮށްދިނުމަށް ތައްޔާރެވެ."

އެނގުން މުހިއްމު - އިޓްލޮސް އިން ރާއްޖެ އާއި ޗާގޯސްގެ އިން ވަކިކުރި މައްސަލާގައި ނިންމި ނިންމުމަށް ރައީސްގެ ސިޓީގެ ސަބަބުން އަސަރުކޮށްފައިވާ ކަމަށް ތުހުމަތުކޮށް، އިދިކޮޅު ފަރާތްތަކުން ދަނީ ސަރުކާރަށް ވަރަށް ބޮޑަށް ފާޑުކިޔައި އެ ސިޓީ އާންމުކުރުމަށް ގޮވާލަމުންނެވެ.

އިޓްލޮސްގެ ހުކުމުގައި ރައީސް ސޯލިހާއި މޮރިޝަސްގެ ބޮޑުވަޒީރާ ދެމެދު ކުރެއްވި މުއާމަލާތްތައް ހިމަނާފައި ވިޔަސް، އެ ސިޓީގެ ސަބަބުން ހުކުމަށް އެއްވެސް އަސަރެއް ކޮށްފައެއް ނުވެ އެވެ.

އެ ސިޓީ ހާމަކުރުމަށް ގޮވާލައި އިދިކޮޅު ކޯލިޝަނުން ވަނީ ރައްޔިތުންގެ މަޖިލީހަށް ކުއްލި މައްސަލައެއް ވެސް ހުށަހަޅާފަ އެވެ. ނަމަވެސް، އެ މައްސަލަ ވަނީ ތަޅުމުން ބޭރުކޮށްލާފަ އެވެ.