ވުޒާރާތަކުގެ އާ މެންޑޭޓް މަޖިލީހަށް ފޮނުވައިފި؛ 'މިއީ ކުރިން އަމަލުކުރި ގޮތެއް ނޫން'

މިނިސްޓްރީތަކުގެ މެންޑޭޓަށް މި ސަރުކާރުން ގެނައި ބަދަލުތައް ރައީސް އޮފީހުން މަޖިލީހަށް ފޮނުވާފައި ނުވުން ވެސް ހިމެނޭ ގޮތަށް މައިގަނޑު ދެ ސަބަބާ ހުރެ ވަޒީރުންނަށް ރުހުން ދިނުމަށް މަޖިލީހުގެ މިއަދުގެ ޖަލްސާއަށް ތާވަލް ކުރި މައްސަލަ އަނބުރާ ކޮމިޓީއަށް ފޮނުވާލާފައި ވަނިކޮށް، އެ ބަދަލުތައް ފާސްކުރަން ރައީސް މުހައްމަދު މުއިއްޒު މިއަދު މަޖިލީހަށް ފޮނުއްވައިފި އެވެ.

ވީ ކިހިނެއް؟ - މިއަދުގެ ޖަލްސާ ފެށުމާ އެކު، އެމްޑީޕީއަށް ނިސްބަތްވެވަޑައިގަންނަވާ ތުޅާދޫ ދާއިރާގެ މެންބަރު ނެންނެވި ނިޒާމީ ނުކުތާ ބަލައިގަނެ، މަޖިލީހުގެ ރައީސް މުހައްމަދު އަސްލަމް ފުރަތަމަ އިއުލާން ކުރެއްވި ގޮތުގައި ވަޒީރުންނަށް ރުހުން ދިނުމުގެ މައްސަލަ މިއަދުގެ އެޖެންޑާ އިން "އުނި ކުރުމަށް ނިންމި" ކަމަށެވެ. އަދި އެ ރިޕޯޓު ފުރިހަމަ ނުވާތީ، ގަވައިދާ އެއްގޮތަށް އެ ރިޕޯޓު އެކުލަވާލުމަށް އަލުން އަނބުރާ ކޮމިޓީއަށް ފޮނުވުމަށް ނިންމެވި ކަމަށް އޭނާ ވިދާޅުވި އެވެ.

ތަފްސީލް - އެ ނިންމުން ނިންމާފައި ވަނިކޮށް، ރައީސް އޮފީހުން ނެރެފައިވާ ބަޔާނެއްގައި ވަނީ، މިނިސްޓްރީތަކުގެ މަސައްކަތްތަކަށް ގެނައި ބަދަލުތައް ފާސްކުރަން މިއަދު މަޖިލީހަށް ފޮނުވާފައިވާކަން ހާމަކޮށްފަ އެވެ. ނަމަވެސް، އިތުރު ތަފްސީލެއް ނުދެ އެވެ.

އެނގުން މުހިންމު - މަޖިލީހުގެ ރިޔާސަތުގެ އެ ނިންމުމަކީ ގާނޫނުއަސާސީ އާއި މަޖިލީހުގެ ގައިވާއިދާ ހިލާފު ނިންމުމެއްގެ ގޮތުގައި ބައެއް މެންބަރުން ވަނީ ސިފަކުރައްވާފަ އެވެ.

އެ ނިންމެވުމާ ގުޅިގެން ނިޒާމީ މައްސަލައެއް ނަންގަވައި އެމްޑީއޭއަށް ނިސްބަތްވެވަޑައިގަންނަވާ ކުޑަހުވަދޫ ދާއިރާގެ މެންބަރު އަހްމަދު އާމިރު ވިދާޅުވި ގޮތުގައި:

ގުޅުން ހުރި ކަމެއް - ބަންޑާރަ ނައިބު އަހުމަދު އުޝާމް ވެސް ވަނީ ހަމަ އެ ގޮތަށް ވިދާޅުވެފަ އެވެ. އެގޮތުން، އޭނާ ވިދާޅުވި ގޮތުގައި:

"2018 ވަނަ އަހަރު ވަޒީރުންނަށް މަޖިލީހުގެ ރުހުން ހޯދަން ހުށަހަޅާފައިވަނީ 22 ނޮވެމްބަރު 2018ގައި. މަޖިލީހުން ރުހުން ދީފައިވަނީ 4 ޑިސެމްބަރުގައި. އެ ފަހަރު މެންޑޭޓް ފާސްކުރުމަށް ހުށަހެޅީ ވަޒީރުންނަށް ރުހުން ލިބުނު ފަހުން 13 ޑިސެމްބަރު 2018ގައި،" އުޝާމް 'އެކްސް'ގައި ކުރެއްވި ޕޯސްޓެއްގައި ވިދާޅުވި އެވެ.

"ސިޔާސީ ސަބަބުތަކަށްޓަކާ މަޖިލީހުން އަމަލުކުރަމުން އައި އުސޫލުތަކާއި ހަމަތައް ބަދަލުކުރުމަކީ ދެރަ ކަމެއް."