'ކްލާސާ' ފިހާރަ ތެރޭ މީހަކު މަރާލި މައްސަލާގައި 2 މީހެއްގެ މައްޗަށް ދައުވާކޮށްފި

މިދިޔަ ފެބްރުއަރީ މަހު، 'ކްލާސާ' ފިހާރަ ތެރެއަށް ވަދެ ވަޅިން ދިން ހަމަލާގައި މަރުވި މުހައްމަދު އަހުމަދު ދީދީ (ނައުއްޓެ)ގެ މަރުގެ މައްސަލައިގެ ތުހުމަތުގައި ހައްޔަރުކޮށްފައިވާ ދެ މީހުންގެ މައްޗަށް ތޫނު އެއްޗެއް ބޭނުންކޮށްގެން ގަސްތުގައި މީހަކު މެރުމުގެ ކުށުގެ ދައުވާ އުފުލައިފި އެވެ.

ވީ ކިހިނެއް؟ - މިދިޔަ 24 ފެބްރުއަރީވަނަ ދުވަހުގެ ރޭ 9:30 ހާއިރު މާފަންނު މުރަނގަ މަގުގައި ހުންނަ 'ކްލާސާ' ފިހާރަ ތެރެއަށް ބަޔަކު މީހުންވަދެ އެ ފިހާރަ ތެރޭގައި ހުރި މުހައްމަދު އަހްމަދު ދީދީ، 30،އަށް ތޫނު ހަތިޔާރުން ހަމަލާ ދީ ޒަހަމްކޮށްލާފައިވެ އެވެ. އެ ޒަހަމުތަކަށް އައިޖީއެމްއެޗްގައި ފަރުވާދެމުން ދަނިކޮށް އޭނާ މަރުވެފައިވަނީ މިދިޔަ 27 ފެބްރުއަރީގަ އެވެ.

ތަފްސީލް - ޕްރޮސެކިއުޓަ ޖެނަރަލް (ޕީޖީ)ގެ އޮފީހުން މިއަދު ބުނި ގޮތުގައި، އެ މައްސަލާގެ ތުހުމަތަށް ހައްޔަރުކޮށްފައިވާ ދެ މީހުންގެ މައްޗަށް މިދިޔަ މަހުގެ 30ގައި ދައުވާ ކުރަން ކްރިމިނަލް ކޯޓަށް ވަނީ ހުށަހަޅާފަ އެވެ.

ގަސްތުގައި މީހަކު މެރުމުގެ ކުށުގެ ދައުވާ އުފުލީ:

ޕީޖީ އޮފީހުން ބުނި ގޮތުގައި، މި ދެ މީހުން ވެސް މިހާރު ތިބީ އެ މައްސަލާގައި ޝަރީއަތް ނިމެންދެން ބަންދުގަ އެވެ.

އެނގުން މުހިންމު - މާލޭގައި ސިލްސިލާކޮށް މާރާމާރީތަކެއް ހިންގަމުން ދަނިކޮށް، އެ ކަމުގެ ތުހުމަތުގައި އިބްރާހީމް ފައިހް ނިޒާމު ހޯދަން އެންމެ ފުރަތަމަ އިއުލާންކުރީ މިދިޔަ 15 ފެބްރުއަރީގަ އެވެ. ފައިހް ފޮރުވައިގެން އުޅުނު ކަމުގެ ތުހުމަތުގައި ފަސް މީހަކު ހައްޔަރުކުރި ފަހުން، އޭނާ ވަނީ މާޗު މަހުގެ ތެރޭގައި އަމިއްލައަށް ފުލުހުންނާ ހަވާލު ވެފަ އެވެ.

މިދިޔަ މަހުގެ 6 ވަނަ ދުވަހާ ހަމައަށް އޭނާ ބަންދުގައި ހުރީ ކެފޭއެއްގެ ތެރޭގައި ހިންގި މާރާމާރީތަކާ ގުޅިގެންނެވެ. އޭޕްރީލް މަސް ތެރޭ އޭނާގެ މައްޗަށް އެ މައްސަލާގައި ތިން ދައުވާއެއް އުފުލި އެވެ. އެއީ:

އެ މައްސަލާގައި ޝަރީއަތް ނިމެންދެން ބަންދުކޮށްފައި ހުއްޓައި މިދިޔަ މަހުގެ 6 ވަނަ ދުވަހު އޭނާ ދޫކޮށްލުމުން، ކްލާސާ ފިހާރަ ތެރޭ ހަމަލާދީ މީހަކު މަރާލި މައްސަލައަށް ޖެހިގެން އައި ދުވަހު ހައްޔަރުކުރި އެވެ. އެ ފަހަރު ކޯޓަށް ހާޒިރުކޮށް ޝަރީއަތް ނިމެންދެން ބަންދުކުރަން އަމުރުކޮށްދިނުމުން ކޯޓުން އޭނާ ބަންދުކޮށްފައިވަނީ 45 ދުވަހަށެވެ.

އެ މައްސަލަ ޕީޖީ އޮފީހުން ހައި ކޯޓުގައި އިސްތިއުނާފް ކުރުމުން މިދިޔަ އަންގާރަ ދުވަހު އެ ކޯޓުން އަމުރުކުރީ، އޭނާ އަކީ ޝަރީއަތް ނިމެންދެން ބަންދުގައި ބަހައްޓަން ޖެހޭ މީހެއް ކަމަށެވެ. އެހެންވެ މިދިޔަ ބުރާސްފަތި ދުވަހު ކްރިމިނަލް ކޯޓުން ވަނީ ޝަރީއަތް ނިމެންދެން ފައިހް ބަންދުގައި ބަހައްޓަން އަމުރުކޮށްފަ އެވެ.