އުނިކުރި ފުށިދިއްގަރު މަޝްެރޫއުގެ ފައިސާ ހިމެނީ ހުޅުމާލެ، ގިރާވަރު، ގުޅީފަޅުގެ ތަރައްގީއަށް

ފުށިދިއްގަރު ފަޅުގެ މަޝްރޫއަށް މި ސަރުކާރުން ބަޖެޓުގައި ހިމެނި 400 މިލިއަން ރުފިޔާ ކަނޑާލައި ބަޖެޓުން އެ މަޝްރޫއު އެކީ އުނިކުރީ، ކުރީގެ ސަރުކާރުން ފަށާފައިވާ ހުޅުމާލެ، ގުޅީފަޅު އަދި ގިރާވަރު ފަޅު ތަރައްގީ ކުރުމުގެ މަޝްރޫއަށް ފައިސާ ހިމަނަން ކަމަށް ބަޖެޓް ކޮމިޓީއިން ބުނެފި އެވެ.

ވީ ކިހިނެއް؟ - އެމްޑީޕީގެ ފުރިހަމަ މެޖޯރިޓީ އޮންނަ ބަޖެޓް ކޮމިޓީގެ މުގައްރިރު ކިބިދޫ ދާއިރާގެ މެންބަރު މުހައްމަދު ނާޝިޒް މިރޭ 'ދައުރު'އަށް ވިދާޅުވީ ފުށިދިއްގަރު މަޝްރޫއުގެ ފައިސާ އުނިކޮށް އޭގެ ތެރެއިން 200 މިލިއަން ރުފިޔާ ގޯތި ދީފައިވާ ހުޅުމާލެ، ގުޅީފަޅު އަދި ގިރާވަރު ފަޅު ތަރައްގީ ކުރަން ހިމެނީ ކަމަށެވެ. އަދި ބާކީ 200 މިލިއަން ރަށްރަށުގެ މަޝްރޫއުތަކަށް ބަހާލީ ކަމަށް ވެސް ނާޝިޒު ވިދާޅުވި އެވެ.

"ކޮމިޓީގެ މެޖޯރިޓީ މެންބަރުންނަށް ފެނުނީ ފުށިދިއްގަރު މަޝްރޫއުގެ ފައިސާ މާލެ ސަރަހައްދުގައި މިހާރު ފަށާފައި ހުރި ތަންތަން ތަރައްގީ ކުރަން ހިމަނަން ދެން ރަށްރަށުގެ ތަރައްގީއަށް ހިމަނަން. އެގޮތަށް ރޫހު އޮތީ،" ނާޝިޒު ވިދާޅުވި އެވެ.

ފިނޭންސްގެ ބަސް - ފިނޭންސް މިނިސްޓްރީގެ ޗީފް ފައިނޭންޝިއަލް ބަޖެޓް އެގްޒެކެޓިވް އަހުމަދު ސަރުވަޝް އާދަމް 'ދައުރު'އަށް މިރޭ ވިދާޅުވީ ފިނޭންސުން ބަޖެޓަށް ހުށަހެޅީ: 

ފާހަގަކޮށްލެވޭ - އެހެންކަމުން މިރޭ ކޮމިޓީއިން ފާސްކުރި ބަޖެޓުގައި ފުށިދިއްގަރު ހިއްކުމަށް ހިމެނި ފައިސާ ހުޅުމާލެ އާއި ގުޅީފަޅު އަދި ފުށިދިއްގަރުން ގޯތި ދޭން ހިއްކާ ސަރަހައްދު ނިންމައި އެތަންތަނުގައި އަސާސީ ހިދުމަތްތައް ގާއިމްކުރަން މި ވަނީ ހިމަނައިފަ އެވެ.

މިއީ ސަރުކާރުގެ އެންމެ ބޮޑު މަޝްރޫއު އެމްޑީޕީގެ މެޖޯރިޓީ މަޖިލީހުން ހުއްޓުވުން ކަމަށް ބުނެވިދާނެ އެވެ.

އެނގުން މުހިންމު - ހައުސިން މިނިސްޓަރު ދެއްކެވި ވާހަކަތަކަކާ ވިދިގެން ނިމިދިޔަ އެމްޑީޕީގެ ސަރުކާރުން ދީފައިވާ ބައެއް ގޯތިތައް އަތުލަން މި ސަރުކާރުން އުޅޭ ކަމަށް ބުނެ އެމްޑީޕީގެ މެންބަރުން އަންނަނީ އެކަމާ ކަންބޮޑުވުން ފާޅުކުރަމުންނެވެ. އަދި އެ މައްސަލަ ކޮމިޓީއިން އަންނަނީ ބަލަމުންނެވެ. 

އެމްޑީޕީއިން ބުނެފައި ވަނީ މިހާރު ފަށާފައިވާ މަޝްރޫއުތައް ނުނިންމާ މުޅިން އަލަށް ގިރާވަރުފަޅުގެ މަޝްރޫއު ފެށުމަށް އެ ޕާޓީއިން ތާއީދު ނުކުރާ ކަމަށެވެ.