ޕީޕީއެމް-ޕީއެންސީގެ މަޖިލިސް ޕްރައިމަރީގައި އެމްއެންޕީ އާއި އެމްޑީއޭއަށް ވެސް ވާދަކުރެވޭ ގޮތް ހަދައިފި

މި މަހުގެ 23ގައި ބާއްވާ ޕީޕީއެމް-ޕީއެންސީގެ މަޖިލިސް ޕްރައިމަރީގައި، މި ސަރުކާރު ގެނައުމަށް ރިޔާސީ އިންތިހާބުގެ ދެ ވަނަ ބުރުގައި އެހީތެރިވި އެމްއެންޕީ އާއި އެމްޑީއޭއަށް ވެސް ވާދަކުރުމުގެ ފުރުސަތު ފަހިވާ ގޮތަށް އެ ކޯލިޝަންގެ އުސޫލު ހަދައި މިއަދު އާންމުކޮށްފި އެވެ.

ވީ ކިހިނެއް؟ - ޕީޕީއެމް-ޕީއެންސީން ރޭ ބޭއްވި ޖޮއިންޓް ސެނެޓުގެ ބައްދަލުވުމުގައި ފާސްކުރި އެ އުސޫލު އެ ކޯލިޝަނުން މިއަދު ވަނީ އާންމުކޮށްފަ އެވެ.

ތަފްސީލު - މަޖިލިސް އިންތިހާބުގައި 'ޕްރޮގްރެސިވް ކޮންގްރެސް ކޯލިޝަނުން ވާދަ ކުރާ ކެންޑިޑޭޓުން ކަނޑައެޅުމާ ބެހޭ އުސޫލު'ގެ ނަމުގައި އެކުލަވާލާފައިވާ އެ އުސޫލުގެ ދަށުން، ޕްރައިމަރީގައި ވާދަ ކުރުމުގެ ފުުރުސަތު މިއަދުން ފެށިގެން އަންނަ ހޯމަ ދުވަހުގެ ނިޔަލަށް ވަނީ ހުޅުވާލާފަ އެވެ.

އެ އުސޫލުގެ ތިން ވަނަ މާއްދާގެ (ހ)ގައިވާ ގޮތުން، އެމްއެންޕީ އާއި އެމްޑީއޭގެ މެމްބަރުންނަށް ވެސް މި ޕްރައިމަރީގައި ބައިވެރިވެވޭނެ އެވެ. އެގޮތުން، އެ ނަންބަރުގައި ބުނަނީ:

އެކަމާ ގުޅޭ އިތުރު ތަފްސީލެއް އެ އުސޫލުގައި ބަޔާންކޮށްފައެއް ނުވެ އެވެ. އެހެންކަމުން، އެމްއެންޕީ އާއި އެމްޑީއޭއަށް މި ޕްރައިމަރީގައި ވާދަކުރުމަށް ފުރުސަތު ދޭނީ ކިހާ މިންވަރަކަށް ކަމެއް ނުވަތަ ކިތައް ދާއިރާއަކަށް ކަމެއް އަދި އެ ހާލަތުގައި އެ ދެ ޕާޓީގެ މެންބަރުންނަށް ޕްރައިމަރީގައި ވޯޓު ލެވޭނެ ކަމެއް އަދި ސާފެއް ނޫނެވެ.

މި އުސޫލުގައިވާ ގޮތުން، ޕްރައިމަރީގެ އިންތިޒާމްތައް ކަނޑައެޅުމުގެ އެންމެ އިސް ފަރާތަކީ ޕީޕީއެމް-ޕީއެންސީގެ ލީޑާޝިޕެވެ. އަދި ޕްރައިމަރީއާ ގުޅޭ އެންމެހާ ކޮމިޓީތައް އެކުލަވާލުމުގެ ބާރު ވެސް އޮންނަނީ އެ ލީޑާޝިޕަށެވެ.

ވާދަ ކުރާ ކެންޑިޑޭޓުން ޕްރައިމަރީއަށް ޝަރުތު ހަމަވާކަން ކަނޑައެޅުމުގެ ބާރު ވެސް މި އުސޫލުގެ ދަށުން ދީފައި ވަނީ ލީޑާޝިޕަށެވެ. އެހެންކަމުން ލީޑާޝިޕް ބޭނުންވެއްޖެ ނަމަ، އެ ކެންޑިޑޭޓެއްގެ ކެންޑިޑެސީ ވެސް ބާތިލު ކުރެވޭނެ އެވެ.

ބުނީ ކިކޭ؟ - ރޭގެ ޖޮއިންޓް ސެނެޓު ބައްދަލުވުމަށް ފަހު، ޕީއެންސީގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ނޫސްވެރިޔަކު ކުރި ސުވާލެއްގެ ޖަވާބުގައި، އެ ޕާޓީގެ ޗެއާޕާސަން އަބްދުއްރަހީމް އަބްދުﷲ ވިދާޅުވި:

އެ އެއްބަސްވުމާ ގުޅޭ ތަފްސީލަކަށް އަބްދުއްރަހީމް ރޭ ވަޑައެއްނުގަންނަވަ އެވެ.

ރޭ އަބްދުރައްރަހީމް އިއުލާންކުރެއްވި ގޮތުގައި، ޕްރައިމަރީގައި ވޯޓު ލެވޭނީ، އަންނަ އާދިއްތަ ދުވަހުގެ ނިޔަލަށް ޕީޕީއެމް-ޕީއެންސީގެ މެންބަރުންގެ ގޮތުގައި ތިބި މީހުންނަށެވެ.

ފާހަގަކޮށްލެވޭ ކަމެއް - ޕީޕީއެމް-ޕީއެންސީން މިދިޔަ މަހުގެ 1 ވަނަ ދުވަހު ބުނެފައިވާ ގޮތުން، އެ ދެ ޕާޓީގެ ޕްރައިމަރީ ބޭއްވުމަށް ހަމަޖައްސާފައި އޮތީ، އަންނަ މަހުގެ 20ގަ އެވެ. ކުރިމަތިލުމަށް ހުޅުވާލުމަށް އޮތީ މި މަހުގެ 20 އިން 31 އަށެވެ.

ނަމަވެސް، ރޭ ސެނެޓުގެ ބައްދަލުވުމުގައި އެ ތާރީހުތައް އަވަސް ކުރަން ނިންމީ ކޮން ސަބަބަކާ ހުރެ ކަމެއް އަބްދުއްރަހީމް ރޭގެ ނޫސްވެރިންގެ ބައްދަލުވުމުގައި ހާމަައެއްނުކުރައްވަ އެވެ.