ބޮޑު ލުޔާ އެކު ހިޔާއަށް ފަޒުލްގެ އިލްތިމާސް: ބަރާބަރަށް ކުލި ދައްކާތި

މި ސަރުކާރުން ވައުދުވި ގޮތަށް ހިޔާ ފްލެޓުގެ ކުއްޔަށް ލުއި ގޮތެއް ހަމަޖައްސައިދީފައިވާ ކަމަށާއި ދެން ބަރާބަރަށް ކުލި ދައްކާނެ ކަމަށް އުންމީދު ކުރައްވާ ކަމަށް އާބަންކޯގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު މިއަދު ވިދާޅުވެއްޖެ އެވެ.

ވީ ކިހިނެއް؟ - ރައީސް މުހައްމަދު މުއިއްޒު ކެމްޕެއިންގެ ތެރޭގައި، ހިޔާ ފްލެޓްގެ ފިނިޝިންއަށް ދިޔަ 200،000ރ. ދޭނެ ކަމަށް ވެވަޑައިގެންވި ވައުދު ފުއްދުމަށްޓަކައި، އިތުރު 100،000 ރ.ގެ ހިޔާގެ ކުލިން މިއަދުން ފެށިގެން އާބަންކޯއިން ވަނީ މައާފުކޮށްދީފަ އެވެ.

ބާކީ 100،000ރ. ހަމަކުރުމަށް އިއްޔެ ވަޒީރުންގެ މަޖިލީހުން ވަނީ، ކުރިއަށް އޮތް ހަތް އަހަރަށް ހިޔާގެ ކުލި 3،984.21ރ.އަށް ކުޑަކޮށްފަ އެވެ. އެ އަދަދު ނަގަން ފަށާނީ އަންނަ ޖެނުއަރީ މަހުން ފެށިގެންނެވެ.

ބުނީ ކީކޭ - އާބަންކޯއިން މިއަދު ބޭއްވި ނޫސްވެރިންގެ ބައްދަލުވުމުގައި އެކުންފުނީގެ މެނޭޖިން ޑިރެކްޓަރު ފަޒުލް ވިދާޅުވީ ހިޔާ ފްލެޓު ލިބިފައިވާ ފަރާތްތަކަށް ސަރުކާރުން މި ހަމަޖައްސައިދިނީ ވަރަށް ބޮޑު ލުޔެއް ކަމަށެވެ.

"ކުރިއަށް އޮތް ހަތް އަހަރަށް 3،984.21ރ. [ކުއްޔަކީ]. އަދި މީގެ އިތުރަށް އެ ހަތް އަހަރާ ހަމައަށް މިހާރު އެއް ލައްކަ ރުފިޔާ އެ ކެނޑުނީ. 27 އަހަރުން ދައްކަން އޮތް ލޯނު، 26 އަހަރަށް ބަދަލުވެގެން މި ދިޔައީ ގާތްގަނޑަކަށް،" ފަޒުލް ވިދާޅުވި އެވެ.

"އެހެންވީމަ، މިއީ ވަރަށް ބޮޑު ލުޔެއް މި ލިބުނީ."

ތަފްސީލު - ފަޒުލް ވިދާޅުވީ މިކަން ކުރިއަށް ގެންދާނީ ރައްޔިތުން، ކުންފުންޏަށް އަދި ދައުލަތަށް ވެސް ބުރަ ނުވާ ގޮތަށް ކަމަށެވެ.

"ދެން މުހިންމު ވާހަކައެއް އަޅުގަނޑު ފާހަގަކޮށްލާން ބޭނުން. ކުލި ދައްކަންވާނެ ހުރިހާ ބޭފުޅުން ވެސް މި އަދަދަށް. މިއަށް އަޅުގަނޑު ސްޓްރެސްކޮށްލަން ބޭނުންވޭ. ކުންފުނި ވެސް އޭގެ ޒާތުގައި ރަން [ހިންގޭނީ] ކުރެވޭނީ ހުރިހާ ރައްޔިތުންގެ އެހީތެރިކަމާ އެކީގައި،"

"އަޅުގަނޑު އުންމީދު ކުރަނީ ކުރިއަށް އޮތް ތަނުގައި މި ލުއިތަކާއި ފަސޭހަތަކާ އެކީގައި އެކަންކަން އެ ގޮތަށް ހިނގާނެ ކަމަށް [ކުލި ދައްކާނެ ކަމަށް]."

އެހެންވީމަ ރައްޔިތުންނަށް ވެސް ބުރަނުވާ ގޮތަށް، ކުންފުންޏަށް ވެސް ދައުލަތަށް ވެސް ބުރަ ނުވާ ގޮތަށް މިކަން ކުރިއަށްގެންދާނީ."

އިތުރަށް ކިޔާލަން -

އެނގުން މުހިންމު - ހިޔާ ފްލެޓްތަކުގައި މީހުން ދިރިއުޅެން ފަށާފައިވާ ތަންތަނުގެ ތެރެއިން 2345 ފްލެޓަކުން ކުލި ދައްކަމުން ނުދާ ކަމަށް އޮކްޓޫބަރު 2022 ގައި އާބަންކޯއިން ވަނީ ބުނެފަ އެވެ.