ރައީސް މުއިއްޒު، ކެމްޕެއިން ތެރޭ ހިޔާ ފްލެޓް ސަރަހައްދުގައި ބޭއްވި ކެމްޕޭން ހަރަކާތުގެ ތެރެއިން. (ފޮޓޯ/ ޕީޕީއެމް)
200،000ރ. ހަމަކުރަން ހިޔާގެ ކުލިން ލައްކައެއް މައާފުކޮށްފި
ރައީސް މުހައްމަދު މުއިއްޒު ކެމްޕެއިންގެ ތެރޭގައި ހިޔާ ފްލެޓްތަކުގެ ފިނިޝިންއަށް، އެތަންތަން ލިބުނު މީހުން ހަރަދުކުރި 200،000ރ. އަނބުރާދޭނެ ކަމަށް ވެވަޑައިގެންވި ވައުދު ފުއްދުމަށްޓަކައި، އިތުރު 100،000ރ. ހިޔާ ފްލެޓްތަކުގެ ކުލިން މިއަދުން ފެށިގެން މައާފުކޮށްފައިވާ ކަމަށް އާބަންކޯއިން ދެންމެ އިއުލާންކޮށްފި އެވެ.
އެނގުން މުހިންމު - ބާކީ 100،000ރ. ހަމަ ކުރުމަށް އިއްޔެ ވަޒީރުންގެ މަޖިލީހުން ވަނީ، ކުރިއަށް އޮތް ހަތް އަހަރަށް ހިޔާ ފްލެޓްތަކުގެ ކުލި 3،984.21ރ.އަށް ކުޑަކޮށްފަ އެވެ.
ވީ ކިހިނެއް؟ - އިއްޔެ ވަޒީރުންގެ މަޖިލީހުގެ އެ ނިންމުން އިތުރަށް ތަފްސީލުކޮށްދިނުމަށް ހިޔާ ފްލެޓްގެ ބެލެނިވެރި ކުންފުނި، އާބަންކޯއިން މިއަދު ވަނީ އެ އޮފީހުގައި ނޫސްވެރިންގެ ބައްދަލުވުމެއް ބާއްވައިފަ އެވެ.
ތަފްސީލު - އެ ނޫސްވެރިންގެ ބައްދަލުވުމުގައި އެ ކުންފުނީގެ މެނޭޖިން ޑިރެކްޓަރު އިބްރާހިމް ފަޒުލް ވިދާޅުވީ ވަޒީރުންގެ މަޖިލީހުގެ ނިންމުމާ އެކު ގާތްގަނޑަކަށް 200،000ރ.ގެ ޑިސްކައުންޓެއް ލިބޭނެ ކަމަށެވެ. އެއީ:
-
ކުރިއަށް އޮތް އަހަރުގެ ކުލިން 100،000ރ. މައާފު ކުރުމަށްޓަކައި، މިހާރު ދައްކަމުން އަންނަ 5،300ރ. އިން 3،984.21ރ. އަށް ކުޑަ ކުރުމަށް
-
ބާކީ 100،000ރ. ޖުމްލަ ކުލިން މައާފު ކުރުމަށް
"ބައެއް ދިމަދިމާލުގައި އެބަ އުޅޭ މައުލޫމާތުތައް [އާންމުންނަށް] އޮޅޭ ގޮތަށް. އެހެން ނަމަވެސް، އިއްޔެގެ ނިންމުމާ ގުޅިގެން، ހިޔާގެ ކޮންމެ ފްލެޓަކަަށް [މަހު ކުއްޔަށް] 3،984.21ރ. ކުރިއަށް އޮތް ހަތް އަހަރު ދުވަހަށް. އެއީ މި އަންނަ އަހަރު ޖެނުއަރީ މަހުން ފެށައިގެން ކުލި ދައްކާ ގޮތަށް ފާސްވެގެން މިއައީ،" ފަޒުލް ވިދާޅުވި އެވެ.
ވަޒީރުންގެ މަޖިލީހުގެ ނިންމާ އެކު، 2.5 މިލިއަން ރުފިޔާގެ އަގު އަރާ ހިޔާ ފެލެޓްގެ އަގުން 200،000ރ. މައާފުވީ ކަމަށް އޭނާ ވިދާޅުވި އެވެ.
"ދެން ސުވާލު އުފެދޭ ކަމަކީ މި އަދަދު [ދެ ލައްކަ ރުފިޔާ] ހަމައެއް ނުވޭ. [ބާކީ] އެ 100،000ރ.ގެ ވާހަކަ އެބަ ދެކެވޭ، އެކި ދިމާ ދިމާލުން. އެ 100،000ރ. ރުފިޔާއަކީ މިއަދުން ފެށިގެން މައާފުވެގެން އަންނަ އަދަދެއް،" އިއްޔެ ސަރުކާރުން ހާމަ ނުކުރާ އެ ނިންމުން ހާމަ ކުރައްވަމުން ފަޒުލް ވިދާޅުވި އެވެ.
ފާހަަގަކޮށްލެވޭ ކަމެއް - ހަތް އަހަރު ދުވަހަށް މިހާރު ދައްކަމުން އަންނަ 5،300ރ.ގެ ރޭޓުން ޖެހެނީ ޖުމްލަ 445،200ރ. އެވެ. މިހާރު ކުލި ކުޑަ ކުރި 3،984.21ރ.ގެ ރޭޓުން ޖެހެނީ 334،673ރ. އެވެ.
އެހެން ކަމުން ކުރިން ހަތް އަހަރުން ދައްކަން އޮތް ކުލިން 110،526ރ. މައާފުވީ އެވެ. އޭގެ އިތުރުން، މިއަދު މައާފު ކުރި 100،000 ރ.އާ އެކު ޖުމްލަ 210،526ރ. ކުޑަވީ އެވެ.
ފަޒުލް މިއަދު ވިދާޅުވީ އެ އަދަދު މައާފު ކުރި ނަމަވެސް ކުންފުންޏަށް މާލީ ބުރައެެއް ނެތް ކަމަށެވެ.
ކޮމެންޓް (5)
އާދަނު
ސަންދާނު
ހަސަނު
ކުއްޔެއް ނޫން
ޝަޒީ