މިނިސްޓަރު ފައިސަލްގެ ތަގުރީރާ އެކު އޭނާގެ 'ފެންވަރާ މެދު' ސުވާލު އުފައްދަނީ

ޓޫރިޒަމް މިނިސްޓަރު އިބްރާހިމް ފައިސަލް ރޭ ދެއްވި ތަގުރީރަކާ ގުޅިގެން އޭނާގެ 'ފެންވަރާ މެދު' ސުވާލު އުފައްދައި އާންމުންގެ ގިނަ ބައެއްގެ ފާޑުކިޔުންތައް އަމާޒުވެއްޖެ އެވެ.

ވީ ކިހިނެއް؟ - ރާއްޖޭގެ އިގްތިސާދުގެ މައި ސިނާއަތް ކަމަށްވާ ފަތުރުވެރިކަމުގެ ކަންކަން ބެލެހެއްޓުމުގެ ޒިންމާ، އޭގެ ކުރިން މާ ގިނަ ތަޖުރިބާތަކެއް ހޯއްދަވާފައި ނުވާ ފައިސަލްއާ ހަވާލުކުރުމުން ވެސް ގިނަ ބައެއްގެ ފާޑުކިޔުން އަމާޒުވި އެވެ.

ވެރިކަންކުރާ މައި ޕާޓީ، ޕީއެންސީގެ ޗެއާޕާސަން އަދި ރައީސް މުހައްމަދު މުއިއްޒުގެ ސްޕެޝަލް އެޑްވައިޒަރު އަބްދުއްރަހީމް އަބްދުﷲގެ ދަރިކަލުން ފައިސަލްއަށް ޓޫރިޒަމް މިނިސްޓްރީ ހަވާލުކުރީ ނުފޫޒުން ކަމަށާއި އޭނާ އަކީ އެ މިނިސްޓްރީ ހިންގުމުުގެ ގާބިލްކަން އަދި ތަޖުރިބާ ވެސް ނެތް މީހެއް ކަމަށް ބުނެ ފާޑުކިޔުންތައް އަމާޒުވި އެވެ.

އެ ފާޑުކިޔުންތައް އެހެން އޮއްވައި ބޯޓިން އެސޯސިއޭޝަނުން ރޭ ބޭއްވި ރަސްމިއްޔާތެއްގައި މިނިސްޓަރު ދެއްކެވި ވާހަކައަށް ވަނީ ފާޑުކިޔުން އަމާޒުވެފަ އެވެ.

ތަފްސީލް - ދާއިރާގެ މުހިއްމު އިވެންޓެއްގައި، ފައިސަލް ވާހަކަ ދެއްކެވިއިރު "ފެންވަރު ނެތް" ކަމަށް ބުނަމުން ދާއިރު، އޭނާގެ ތައުލީމީ ފެންވަރާ މެދު ވެސް ބައެއް މީހުން ވަނީ ސުވާލު އުފައްދައިފަ އެވެ.

އިނގިރޭސި ބަހުން ކުރިއަށް ގެންދެވި އެ ވާހަކަ ބަހުގެ ގަވައިދަށް ނުފެތުނު ނަމަވެސް މައްސަލައެއް ނެތް ކަމަށާއި، ދިވެއްސަކަށް އިނގިރޭސިބަހުން ފުރިހަމައަށް ވާހަކަ ދައްކަން ނޭނގުމަކީ މައްސަލައެއް ނޫން ނަމަވެސް، ފަތުރުވެރިކަމުގައިި ދުނިޔޭގެ އެއް ވަނަ މަންޒިލުގެ ގޮތުގައި ރާއްޖެ އޮތްއިރު، އެ ދާއިރާގެ ކަންތައް ބަލަހައްޓަން ހުންނެވި އެންމެ އިސް ވެރިޔާގެ 'ފެންވަރު ދަށްވުމަކީ' ކަންބޮޑުވުމެއް އަދި ލަދުގަންނަން ޖެހޭ ކަމެއް ކަމަށް ބުނެ ގިނަ ބަޔަކު ވަނީ ކަންބޮޑުވުން ފާޅުކޮށްފަ އެވެ.

ގުޅުން ހުރި ކަމެއް - މީގެ ކުރިން ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވެސް، ޓޫރިޒަމް މިނިސްޓަރު ދިވެހި ބަހުން ވާހަކަދެއްކެވިއިރު ވެސް އޭނާގެ ފެންވަރާ މެދު ފާޑުކިޔުން އަމާޒުވި އެވެ. އެެ ބައްދަލުވުމުގައި ފައިސަލް ވާހަކަ ދެއްކެވީ ދިވެހިންނެވެ.