މަޖިލީހުގެ ޖަލްސާ ފަށަން އެމްޑީޕީން ހުރަސްއަޅައި ހަމަނުޖެހުން ހިންގައިފި

އަންނަ އަހަރަށް ލަފާކުރާ ދައުލަތުގެ ބަޖެޓާއި މި އަހަރު އިތުރަށް ހިނގާ ހަރަދުތައް ހިމެނޭ ސަޕްލިމެންޓްރީ ބަޖެޓު ހުށަހެޅުމަށް މިއަދު ބާއްވާން ތާވަލުކޮށްފައި އޮތް މަޖިލީހުގެ ޖަލްސާ ފެށިޔަ ނުދީ އެމްޑީޕީގެ މެމްބަރުން މަޖިލިސް ކުރާ ގޭގެ ތަޅުމުގައި އިހުތިޖާޖުކޮށް، ރިޔާސަތުގެ މޭޒުދޮށުގައި ހަމަނުޖެހުން ހިންގައިފި އެވެ.

އެނގުން މުހިންމު - މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތް ކަމުގެ މައްސަލަ، އެ ގަރާރު ކުރިއަށް ގެންދާ ޖަލްސާގެ ރިޔާސަތު ބަލަހައްޓަވަން ޖެހިވަޑައިގަންނަވާ މަޖިލީހުގެ ނައިބު ރައީސް އީވާ އަބްދުﷲ ސަލާމުގައި ހުންނެވުމުން މާދަމާއަށް ފަސްކޮށް، ބަޖެޓް ހުށަހެޅުމަށް މިއަދަށް ތާވަލްކޮށްފައިވާ ޖަލްސާއަށް ފިނޭންސް މިނިސްޓަރު އިބްރާހިމް އަމީރު ވަޑައިނުގަންނަވާނެކަން ސަރުކާރުން ވަނީ ރޭ ހާމަކޮށްފަ އެވެ.

އެމްޑީޕީން ރޭ ވަނީ މިއަދުގެ ޖަލްސާގެ އެޖެންޑާގައި، ބަޖެޓުގެ ކުރިން ނަޝީދުގެ މައްސަލަ ކުރިއަށް ގެންދަން ހިމަނައިދިނުމަށް މަޖިލީހުގެ އިދާރާގައި އެދިފަ އެވެ.

ވީ ކިހިނެއް؟ - އަމީރު ބަޖެޓް ހުށަހަޅުއްވަން މަޖިލީހަށް ވަޑައިނުގެންނެވިޔަސް، މަޖިލީހުގެ ރައީސް މުހައްމަދު ނަޝީދާއި ނައިބު ރައީސް އީވާ އަބްދުﷲ ނެތް ހާލަތުގައި އާންމުކޮށް ރިޔާސަތު ބަލަހައްޓަވައި ވިލުފުށީ ދާއިރާގެ މެމްބަރު ހަސަން އަފީފް ރިޔާސަތުގައި އިންނަވައިގެން ޖަލްސާ ފައްޓަވަން މިއަދު ހެނދުނު 9 ޖެހިއިރު މަސައްކަތް ކުރެއްވި އެވެ.

ނަމަވެސް، އެމްޑީޕީގެ މެމްބަރުން ވަނީ ރިޔާސަތު މޭޒުދޮށަށް ވަޑައިގެން، އެ ތަނުގައި އިހުތިޖާޖުކޮށް، ހަމަނުޖެހުން ހިންގާފަ އެވެ. ތާޅަފިލި ފުމޭ އަޑު ވެސް އޭރު އިވެ އެވެ.

ތަފްސީލް - މަޖިލީހުގެ އިދާރާ އިން އާންމުކޮށްފައިވާ ލައިވް އިން ފެންނަ ގޮތުގައި:

މަޖިލީހުގެ އިދާރާ އިން އާންމުކުރާ ލައިވް ފީޑް މިހާރު ކަނޑާލާފައި ވާއިރު، މަޖިލީހުގެ ޖަލްސާ ދެން ކުރިއަށް ގެންދެވޭނެ ކަމަކަށް ނުބެލެވެ އެވެ.

ފާހަގަކޮށްލެވޭ ކަމެއް - ވެރިކަން ކުރާ މައި ޕާޓީ، އެމްޑީޕީގެ ޕާލިމަންޓްރީ ގްރޫޕުން ނިންމާފައި ވަނީ ނަޝީދުގެ އިތުބާރު ނެތް ކަމުގެ މައްސަލަ ނުނިންމާ ނަމަ، މަޖިލީހުގެ އެއްވެސް މަސައްކަތަކަށް އެއްބާރުލުން ނުދިނުމަށެވެ. އެގޮތުން، ނަޝީދުގެ މައްސަލަ ނުނިންމައި އިންތިހާބީ ރައީސް ޑރ. މުހައްމަދު މުއިއްޒު ހުވާކުރުމަށް މަޖިލީހުގެ ޖަލްސާ ބޭއްވިދާނެ ކަމާ މެދު ވެސް އެމްޑީޕީން ވަނީ ސުވާލު އުފައްދައިފަ އެވެ.

ނަޝީދުގެ އިތުބާރުގެ މައްސަލައިގައި ޖަލްސާ ބޭއްވޭނޭ މަގެއް ހޯދުމަށް އެމްޑީޕީން މިހާރު ވަނީ އެ މައްސަލަ ސުޕްރީމް ކޯޓަށް ވެސް ހުށަހަޅައިފަ އެވެ. މައްސަލަ ވަނީ އެ ކޯޓުން ބަލައިގެންފަ އެވެ.