ރަކީދޫ ސްކޫލުގައި 16 އަހަރު ފަހުން 3 ކުދިންނާ އެކު ކިޔަވައިދޭން ފަށައިފި

މީގެ 16 އަހަރު ކުރިއްސުރެ ބަންދުކޮށްފައި ހުންނަ ވ. ރަކީދޫ ސްކޫލު، ސެޓެލައިޓް ސްކޫލަކަށް ބަދަލު ކުރުމަށް ފަހު މިއަދު އެ ތަނުގައި ކިޔަވައިދޭން ފަށައިފި އެވެ.

ވީ ކިހިނެއް؟ - ރާއްޖޭގައި މިހާރު އެންމެ އާބާދީ މަދު ރަށުގެ ގޮތުގައި އޮތް ރަކީދު އަކީ އިއްޔެއާ ހަމައަށް ރާއްޖޭގައި ތައުލީމު ފޯރުކޮށްނުދޭ ހަމައެކަނި ރަށެވެ. ނަމަވެސް، އެ ރަށުގައި ސެޓެލައިޓް ސްކޫލެއް ގާއިމުކޮށް މިދިޔަ އަހަރުގެ ޖެނުއަރީ މަހު ކިޔަވައިދޭން ފަށަން ސަރުކާރުން ނިންމި ނަމަވެސް، ތަފާތު ސަބަބުތަކާ ހުރެ އެކަން އޮތީ ނުވެފަ އެވެ.

ތަފްސީލު - އެޑިއުކޭޝަން މިނިސްޓްރީން ބުނީ، ތިން ދަރިވަރުންނާ އެކު މިއަދު އެ ސްކޫލުގެ ކިޔެވުން ފަށާފައިވާ ކަމަށެވެ. ސެޓެލައިޓްކޮށް ކިޔަވާނީ، ރަށުގެ ސްކޫލަށް ހާޒިރުވެ، އޮންލައިންކޮށެވެ. ކިޔަވައިދޭ ކްލާސް ގުޅިފައި ހުންނާނީ މާލޭގެ ސްކޫލަކާ އެވެ.

އެއާ އެކު:

އެނގުން މުހިއްމު - މިދިޔަ އަހަރު ނެގި ބޯހިމެނުމުން ދައްކާ ގޮތުގައި، އާބާދީގައި 100 މީހުން ހަމަނުވާ ހަމައެކަނި ރަށެއްގެ ގޮތުގައި އޮތީ ރަކީދު އެވެ. މިހާރު އެ ރަށުގައި އުޅެނީ 76 މީހުންނެވެ. އޭގެ ތެރެއިން 14 މީހުންނަކީ ބިދޭސީންނެވެ.