މަކުނޫދުގައި ގޭސް ސިލިންޑަރެއް ގޮވުމާ ގުޅިގެން ފުލުހުން ހަރަކާތްތެރިވަނީ. (ދައުރު ފޮޓޯ)
ެމަކުނުދޫގައި ގޭސް ސިލިންޑަރެއް ގޮވުން ތަހުގީގު ކުރަން ފުލުހުންގެ ފޮރެންސިކް ޓީމެއް ހިނގައްޖެ
ހދ. މަކުނުދޫގައި މިއަދު ހަވީރު އެއްޗެއް ގޮވައި ދެ މީހަކު މަރުވުމާ ގުޅިގެން އެކަން ތަހުގީގު ކުރުމަށް ފޮރެންސިކް ޓީމެއް އެ ރަށަށް ހިނގައްޖެ އެވެ.
ކިހިނެއް؟ - މިއަދު ހަވީރު މަކުނުދޫގައި ގޭސް ސިލިންޑަރެއް ގޮވައި މަރުވީ، އެ ރަށުގެ އެއާޕޯޓުގެ މަސައްކަތް ކުރަން ގޮސް އުޅުނު އިންޑިއާގެ ދެ މީހުންނެވެ. އެގޮތުން:
-
ގޭސް ސިލިންޑަރެއް ކަމަށް ބެލެވޭ އެއްޗެއް ގޮވައި ހިނގި އެ ހާދިސާގައި އެ މީހުންގެ ހަށިގަނޑުގެ ބައިތައް އެތައް ފޫޓު ދުރަކަށް ބުރައިގެން ދިޔަ؛ ގޮވީ ކޮން ކަހަލަ ގޭސް ސިލިންޑަރެއް ކަމެއް އަދި ސާފެއް ނުވޭ
-
ގޮވުމުގެ އަޑާ އެކު، މުޅި ރަށަށް ދިޔައީ ގުޑުން އަރައިގެން
ތަފްސީލު - ފުލުސް އޮފީހުން މިރޭ ބުނި ގޮތުގައި، އެ ހާދިސާ ތަހުގީގު ކުރުމަށް އެ ރަށަށް ދިޔައީ އެ އަތޮޅު ކުޅުދުއްފުށީގައި ތިބޭ ފުލުހުންނެވެ.
"އަޅުގަނޑުމެންގެ ތަހުގީގު އަދި ފޮރެންސިކް ފުލުހުން މިހާރު ދަނީ މަކުނުދޫގައި ހަރަކާތްތެރިވަމުން،" ފުލުހުންގެ މީޑިއާ އޮފިޝަލަކު ވިދާޅުވި އެވެ.
ގުޅުން ހުރި ކަމެއް - މަކުނުދޫގެ އިތުރުން، މީގެ ދެ ދުވަސް ކުރިން ކުޅުދުއްފުށީ އެއާޕޯޓުގައި ވެސް ގޭސް ސިލިންޑަރެއް ގޮވައި ތިން މީހަކު ވަނީ ޒަހަމްވެފަ އެވެ. އޭގެ ތެރެއިން އެކެއްގެ ހާލު ސީރިއަސްއިރު އޭނާއަށް ފަރުވާ ދެމުން ދަނީ އައިސީޔޫގަ އެވެ.
އެނގުން މުހިއްމު - އިންތިހާބީ ރައީސް ޑރ. މުހައްމަދު މުއިއްޒު ވަނީ، އެ ދެ ހާދިސާ ވެސް ތަހުގީގުކޮށް، މަސައްކަތުގެ ރައްކާތެރިކަން ޔަގީން ކުރުމަށް ކަމާ ގުޅޭ އިދާރާތަކަށް މިރޭ ގޮވާލައްވާފަ އެވެ.
ރައްޔިތުންގެ މަޖިލީހަށް ހުށައަޅާފައިވާ، މަސައްކަތުގެ މާހައުލުގެ ސަލާމަތާއި ސިއްހީ ރައްކާތެރިކަމުގެ ބިލުގެ މަސައްކަތް އަވަސްކޮށްދެއްވުމަށް މެމްބަރުންގެ އަރިހުން އެ މަނިކުފާނު އެދިވަޑައިގެންނެވި އެވެ.