ބާރުގަދަ އަޑަކާ އެކު މުޅި މަކުނުދުއަށް ލޮޅުން؛ އާދައިގެ ގޮވުމެއް ނޫން

މިއަދު ހަވީރު 4:30 ހާއިރު، އަލީ ޝަރީފް ހުރީ އޭނާގެ ރަށް، ހދ. މަކުނުދޫގައި އެ ރަށުގެ ބަނދަރާ ކައިރީގައި ހުންނަ އޭނާގެ ކެފޭގައި މީހަކަށް ކޮފީ ތައްޔާރުކުރާށެވެ. ކުއްލިއަކަށް ފެނުނީ ބާރުގަދަ އަޑަކާ އެކު، އޭނާގެ ކެފޭ ފޫއަޅުވާލާފައި ދަގަނޑުގަނޑެއް އެ ތަނުގެ އެތެރެއަށް ވަތް ތަނެވެ.

އަލީގެ ކައިރިން 3 ފޫޓެއްހާ ދުރުމިނުގައި، ކެފޭގެ ބިތްގަނޑު ފޫ އަޅުވާލާފައި އެއްޗެއް ވަނުމުން އޭނާ ހީކުރީ އެ ތަނުގެ ތެރެއިން އެއްޗެއް ގޮވީކަމަށެވެ. އެކަމަކު ގޮވުމުގެ އަޑު އެއަށް ވުރެ މާ ގަދަ އެވެ. މުޅި ސަރަހައްދު ދިޔައީ ލޮޅުން އަރައިގެންނެވެ.

ހަދަން ހުރި ކޮފީ ތަށި ބަހައްޓާފައި ބޭރަށް ނުކުތް އިރު، ކެފޭގެ ބޭރުގައި ހުރި ބައެއް ޖޯލިތައް ވެސް ހުރީ ހަލާކުވެފަ އެވެ. އެ ތަނުގައި އިން އެކެއްގެ އަތުގައި ކޮންމެވެސް އެއްޗެއް ޖެހި، ހުރީ ލޭކޮށާލާފަ އެވެ. އިސާހިތަކު މިއީ އާދައިގެ ގޮވުމެއް ނޫންކަން އެ މީހުންނަށް އެނގުނެވެ.

"މުޅި ހިސާބު ގުޑައިގެން ދިޔައީ. އަަހަރެމެން ތިބީ ދާނެ ނުދާނެ ތަނެއް ނޭނގިފައި. އަޑު އައީ ކޮން ދިމާއަކުން ކަމެއް އޭރު އެކަކަށް ވެސް ނޭނގުނު،" މިއަދު ހަވީރު މަކުނުދޫގައި ބާރުގަދަ އެއްޗެއް ގޮވައި ދެ މީހަކު މަރުވި ހާދިސާއާ ގުޅޭ ގޮތުން އަލީ ކިޔައިދިނެވެ.

ގޭސް ސިލިންޑަރެއް ކަމަށް ބެލެވޭ އެއްޗެއް ގޮވީ، މަކުނުދޫ ބަނދަރު ސަރަހައްދުގައި ހުންނަ މަސްމާރުކޭޓުގެ ކައިރީގަ އެވެ. އެ ތަނުގައި އެ ރަށުގެ ނަރުދަމާގެ މަސައްކަތާއި އެއާޕޯޓަށް ބޭނުންވާ ބައެއް ސާމާނު ބަހައްޓާފައި ހުރެ އެވެ. ގޮވި ސިލިންޑަރު ހުރީ އިމާރާތުގެ ބޭރުގަ އެވެ. އޭރު އެ ތަނުގެ ކައިރީގައި، އެއާޕޯޓުގެ މަސައްކަތް ކުރާ އިންޑިއާގެ ދެ މުވައްޒަފުން ތިއްބެވެ.

ބާރުގަދަ ގޮވުމުގެ ޝިކާރައަކަށްވީ އެ ދެ މީހުންނެވެ. މަންޒަރު ދުށް މީހުން ބުނި ގޮތުގައި، މަރުވި މީހުންގެ ހަށިގަނޑުގެ ބައިތަކާއި ސިލިންޑަރުގެ ބައިތައް އެތައް ސަތޭކަ ފޫޓަށް ބުރައިގެން ދިޔަ އެވެ.

އަލީގެ ކެފޭ ވެސް ހުންނަނީ، ހާދިސާ ހިނގި ތަނާ 500 ފޫޓެއްހާ ދުރުގައި އެއްގަމުގަ އެވެ.

"ދާނެ ނުދާނެ ތަނެއް ނޭނގިފައި ތިއްބާ ދެން އަހަރެމެންނަށް ފެނުނީ، ބަނދަރުމަތީގައި ހުންނަ އެސްޓީއޯގެ ގުދަނުގެ ތެރެއިން ނުކުތް އަންހެނަކު ރޮއިގަތް ތަން. އޭނާއަށް ފެނުނީ އެ ތަނުގެ ދޮރުމަތީގައި އޮތް މީހެއްގެ ފައެއް،" އަލީ ކިޔައިދިނެވެ.

އެސްޓީއޯގެ ގުދަނާއި ހާދިސާ ހިނގި ތަނާ ވެސް 200 ފޫޓެއްހާ ދުރުމިން ހުރެ އެވެ. އަދި އެއަށް ވުރެ ދުރުން، ރަށުތެރޭގައި ހުންނަ ގެއެއްގެ ދޮރުމައްޗަށް ވެސް މީހެއްގެ ހަށިގަނޑުގެ ބައެއް ވިއްސައިގެން ގޮސްފައި އޮތެވެ.

"ގުނަވަންތަކާއި ސިލިންޑަރުގެ ބައިތައް ރަށުތެރެއަށް އައިސްފައި ހުރި ގޮތުން އަހަރެމެންނަށް ލަފާ ކުރެވެނީ، ގޮވުމާ އެކު ވަރަށް މަތިމަތިން އެ އެއްޗެހިތައް ބުރައިގެން އައިސްފައި ހުރީ ކަމަށް،" އަލީ ކިޔައިދިނެވެ.

މަކުނުދުއިން ވާހަކަ ދެއްކި ބައެއް މީހުން ބުނި ގޮތުގައި، ބާރުގަދަ އަޑާ އެކު، ލޮޅުމުގެ އަސަރު މުޅި ރަށަށް ކުރި އެވެ. ބަނދަރާ ކައިރީގައި ހުންނަ ބައެއް ގެތަކުގެ ބިއްލޫރިތަކާއި ބޮކި ފަދަ އެއްޗެހި ތަޅައިގެން ދިޔަ އެވެ. އެ ރަށް ކައިރީގައި އޮންނަ ފަޅުރަށެއް ކަމުގައިވާ ހުރާގައި ތިބި މީހުންނަށް ވެސް ލޮޅުމުގެ އަސަރު ކުރި ކަމަށްވެ އެވެ.

މަރުވި އިންޑިއާގެ ދެ ރައްޔިތުން ފިޔަވައި އިތުރު ބައެއްގެ ފުރާނައަށް އެ ހާދިސާގައި ގެއްލުން ނުވި ނަމަވެސް، އެ ވަގުތު ބަނދަރުމަތީގައި ތިބި އެތައް ބަޔަކަށް ޒަހަމްނުވެ ދިޔައީ ކިރިޔަ ކިރިޔާ އެވެ. ވާހަކަ ދައްކާލި ކޮންމެ މީހަކު ވެސް ބުނަނީ، ބުރައިގެން ދިިޔަ ދަގަނޑުކޮޅުތަކުން ގައިގާ ނުޖެހުނީ ކިރިޔާ ކަމަށެވެ.

ހާދިސާ ހިނގި ތަން އެންމެ ރަނގަޅަށް ފެނުނީ، އެ ވަގުތު ރަށުގެ ފަޅުތެރޭގައި އޮތް މުދާ އުފުލާ ދޯންޏެއްގައި ތިބި މީހުންނަށެވެ. ގޭސް ސިލިންޑަރު ކައިރީގައި ދެ މީހަކު ތިބި ތަން އެ މީހުންނަށް ފެނުނެވެ. އެކަމަކު ގަދަ އަޑާ އެކު، އެ މީހުންނަށް ވެސް ދެން ފެނުނީ، ބުރައިގެން އައި ދަގަނޑު އެތިކޮޅުތައް ދޯނީގެ ބިއްލޫރިތަކުގައި ޖެހި ތަޅައިގެން ދިޔަ ތަނެވެ. ދޯނީގެ ބައިތައް ނެއްޓުނު ތަނެވެ.

"ބުނާނެ އެއްޗެއް ވެސް ނޭނގިފައި މި ތިބީ. އަދިވެސް އެބަ ތުރުތުރު އަޅާ،" ހާދިސާ ހިނގި ވަގުތު ބަނދަރުމަތީގައި ހުރި މަކުނުދޫގެ މީހަކު، ނަން ނުޖަހާ ގޮތަށް ވާހަކަދައްކަމުން ބުންޏެވެ.