މުއިއްޒު އަލްޖަޒީރާއަށް ދެއްވި އިންޓަވިއުގައި ވާހަކަ ދައްކަވަނީ
މި ސަރުކާރުގެ 'ވައްކަންތައް' ވެސް ބަލާނަން؛ އެއްވެސް ކަމެއް ނުފޮރުވާނަން: މުއިއްޒު
އެމްއެމްޕީއާރުސީގެ ބޮޑު ހިޔާނާތް ހިންގި ކުރީގެ ރައީސް އަބްދުﷲ ޔާމީންގެ ސަރުކާރަށް ވުރެ މިހާރުގެ ރައީސް އިބްރާހިމް މުހައްމަދު ސޯލިހްގެ ވެރިކަމުގައި ހިންގި ކަމަށް ތުހުމަތު ކުރެވޭ ވައްކަންތައް ގިނަ ކަމަށް ވިދާޅުވެ، ދެ ސަރުކާރުގައި ވެސް ހިންގާފައިވާ ކަމަށް ބުނާ އެފަދަ މައްސަލަތައް ބަލާނެ ކަމުގެ ޔަގީންކަން އިންތިހާބީ ރައީސް ޑރ. މުހައްމަދު މުއިއްޒު މިއަދު ދެއްވައިފި އެވެ.
ވީ ކިހިނެއް؟ - މުއިއްޒު މިގޮތަށް ވިދާޅުވީ ގަތަރުގެ އަލް-ޖަޒީރާ ޗެނަލްއަށް ދެއްވި އިންޓަވިއުއެއްގައި ނޫސްވެރިޔާ ކުރި ސުވާލަކަށް ޖަވާބު ދެއްވަމުންނެވެ.
"އަޅުގަނޑަށް ހީވަނީ، އަޅުގަނޑުމެން [ޔާމީންގެ ސަރުކާރުގެ] އެފަދަ ހުރިހާ މައްސަލައެއް ބަލާނަން. [އެކަމަކު] މި ސަރުކާރުގައި އެފަދަ މާ ގިނަ [ހިޔާނާތުގެ] މައްސަލަ އެބަހުރި،" ޔާމީންގެ ސަރުކާރުގައި ހިންގި ކޮރަޕްޝަންތަކާއި އެ މަނިކުފާނަށް އެކަމާ ގުޅިގެން ކޮށްފައިވާ ދައުވާތަކަކީ ޕީޕީއެމްއަށް ފިލާވަޅުތަކެއް ލިބުނު ކަމެއްތޯ އަލް-ޖަޒީރާގެ ނޫސްވެރިޔާ އެހުމުން، އެ ސުވާލަށް ސީދާ ޖަވާބެއް ނުދެއްވައި މުއިއްޒު ވިދާޅުވި އެވެ.
ތަފްސީލު - އެ ސުވާލަށް ޖަވާބު ދެއްވަމުން މުއިއްޒު އިތުރަށް ވިދާޅުވީ:
-
މަޖިލީހުގައި އެމްޑީޕީގެ މެންބަރުން ވެސް އެ ބޭފުޅުންގެ އަމިއްލަ ސަރުކާރުގެ ވައްކަމުގެ ވާހަކަތައް ދިޔައީ ދައްކަމުން
-
ރައްޔިތުންގެ ފައިސާއިން މިއިން ދުވަހަކު ވައްކަން ނުކުރާ ވަރަށް ވައްކަންކޮށްފައިވާ ކަމަށް އެ މެންބަރުން ވެސް އެބަ ވިދާޅުވޭ
"މިސާލަކަށް ކޮވިޑްގެ ބަލިމަޑުކަމުގައި އެތައް ބިލިއަން ރުފިޔާ ވަނީ ގެއްލިފައި. އެއްވެސް މީހަކަށް ނޭނގެ [އެ ފައިސާތަކަށް] ވީ ގޮތެއް. [މި ސަރުކާރުން ފައިސާ ދައްކާފައި ގަތް] ވެންޓިލޭޓަރުތައް އަންނާނެ ކަމަށް ބެލެވުނު ނަމަވެސް، އަދިވެސް އެއެއް ނާދޭ. އެކަން ވީ ގޮތެއް ވެސް ނޭނގެ. މިއީ އެއް މިސާލު އަދި،" މިދިޔަ މަހު ބޭއްވި އިންތިހާބުގެ ނަތީޖާއަށް ފަހު، ބައިނަލްއަގުވާމީ މީޑީއާއަކަށް ދެއްވި ފުރަތަމަ އިންޓަވިއުގައި މުއިއްޒު ވިދާޅުވި އެވެ.
"އެހެންވީމާ، [އަޅުގަނޑުގެ] ސަރުކާރަކީ ވަރަށް ޒިންމާދާރު ސަރުކާރެއްކަން ކަށަވަރުކޮށް، މި ހުރިހާ ކަމެއް އަޅުގަނޑު ބަލާނަން."
މުއިއްޒު ވިދާޅުވި ގޮތުގައި، އެ މަނިކުފާނު ސަރުކާރު ވެގެން ދާނީ، ވައްކަމުން އެއްކިބާވެފައިވާ، 'ސާފު ސަރުކާރަކަށެ'ވެ. އަދި އެއްވެސް ކަމެއް މީޑިއާއަށާއި ރައްޔިތުންނަށް ނުފޮރުވާނެ ކަމުގެ ޔަގީންކަން ވެސް ދެއްވި އެވެ.
ޔާމީންގެ ސަރުކާރުގައި ހިންގި އެމްއެމްޕީއާރުސީގެ ހިޔާނާތުން ގެއްލުނު ފައިސާ ހޯދަން މަސައްކަތް ކުރައްވާނެ ކަމަށް، އިންތިހާބީ ރައީސްގެ ގޮތުގައި 'ދައުރު'އަށް ދެއްވި އިންޓަވިއުގައި ވެސް މުއިއްޒު ވަނީ ވިދާޅުވެފަ އެވެ.
އެ ހިޔާނާތާއި ޔާމީން މިނިވަންކުރުމާ ގުޅޭ ގޮތުން މުއިއްޒު ދައްކަވާފައިވާ ވާހަކަތަކާ ގުޅިގެން އަލް-ޖަޒީރާގެ ނޫސްވެރިޔާ ކުރި ސުވާލަށް ޖަވާބު ދެއްވަމުން މުއިއްޒު ވިދާޅުވީ:
-
ޔާމީންގެ މައްޗަށް އުފުލާފައިވަނީ ސިޔާސީ ދައުވާތަކެއް؛ އެ މަނިކުފާނުގެ ވެރިކަމުގައި މިނިވަން ޝަރުއީ ދާއިރާއެއް ގާއިމްކޮށްދިނުމުން ޔާމީން މިނިވަންކުރުން އޮންނާނީ ފަނޑިޔާރުންގެ އަތްމަތީގައި
-
އެމްއެމްޕީއާރުސީގެ ހިޔާނާތުން ގެއްލުނު އެއްވެސް އެއްޗެއް މި ސަރުކާރަށް ހޯދައެއް ނުދެވުނު؛ ދައުލަތަށް ގެއްލުނު 'އެސެޓްތައް' މުއިއްޒުގެ ސަރުކާރެއްގައި ބާރު ސްޕީޑެއްގައި ހޯދާނެ
-
އެކަން ކުރުމަށް ބޭނުންވަނީ އާ ގާނޫނުތަކެއް ނޫން، އިހްލާސްތެރިކަން
ކޮމެންޓް (5)
ބިންބި
ހޯދާބަލާ
ފިލާ
ޙަސަންތަކުރުބެ
ޙަސަން