ގާޒާގެ ހޮސްޕިޓަލުތަކުގައި މަސައްކަތް ކުރާ ގިނަ ބަޔަކަށް، ދިވެހިންގެ އެހީގައި ކެއުންތައް ބަހަނީ (ފޮޓޯ/އިންޓަނޭޝަނަލް އެއިޑް ކެމްޕޭން)
ގާޒާގައި ސިއްހީ ހިދުމަތް ދޭ 1،500 މީހުންނަށް ދިވެހިންގެ އެހީގައި ކާންދެނީ
އިޒްރޭލުގެ ހަމަލާތަކުން ސުންނާފަތި ވަމުންދާ ފަލަސްތީނުގެ ގާޒާގެ ހޮސްޕިޓަލުތަކުގައި މަސައްކަތް ކުރާ 1،500 މުވައްޒަފުންނަށް، ދިވެހިންގެ އެހީގައި ކެއުމުގެ ހިދުމަތް ދޭން ފަށައިފި އެވެ.
ވީ ކިހިނެއް؟ - އިޒްރޭލުގެ އުދުވާނީ ހަމަލަތަކުގައި އެތައް ސަތޭކަ ބަޔަކު ޝަހީދުވެފައި ވާއިރު، އެތައް ހާސް މީހުން ދަނީ ޒަހަމްވަމުންނެވެ. އެއާ އެކު، ހާލުގައި ޖެހިފައިވާ ފަލަސްތީނުގެ މީހުންނަށް އެހީވުމަށް، ދިވެހި ޖަމިއްޔާއެއް ކަމަށްވާ އިންޓަނޭޝަނަލް އެއިޑް ކެމްޕޭން (އައިއޭސީ) އިން ވަނީ ފަންްޑު ހުޅުވާލާފަ އެވެ.
މި ފަންޑަށް ދެ ދުވަސް ތެރޭގައި މިހާރު ވަނީ 2.5 މިލިއަނަށް ވުރެ ގިނަ ރުފިޔާ ލިބިފަ އެވެ.
ތަފްސީލް - އައިއޭސީގެ އޮފިޝަލަކު މިއަދު ވިދާޅުވި ގޮތުގައި، އެހީގެ ގޮތުގައި ދިވެހިން ދިން މި ފައިސާއިން މި ވަގުތު އެންމެ އިސްކަމެއް ދެނީ، ހޮސްޕިޓަލުތަކުގައި މަސައްކަތް ކުރާ މީހުންނަށް ކާބޯތަކެތި ފޯރުކޮށްދިނުމަށެވެ. އެގޮތުން:
-
ގާޒާގެ ހޮސްޕިޓަލްތަކާއި ސިއްހީ ފަރުވާ ދޭ ތަންތަނުގައި މަސައްކަތް ކުރާ 1،500 މުވައްޒަފުންނަށް އަންނަނީ ހޮޓްމީލް ފޯރުކޮށްދެމުން
-
އެ ޖަމިއްޔާއިން މިކަން ކުރަނީ ގާޒާގެ ހެލްތު މިނިސްޓްރީއާ ގުޅިގެން
-
ދިވެހިންގެ މި އެހީގެ ސަބަބުން އެ މުވައްޒަފުންގެ މަސައްކަތަށް ބުރުނާރައި ބާރަށް ކުރިއަށް ގެންދެވޭނެ ކަމަށް އެ ތަނުން ގަބޫލު ކުރޭ
"[ގާޒާގެ ހާލަތު އޮތްގޮތުން] ކަންކަން ކުރުމަށް ވަރަށް ދަތި. ނަމަވެސް އަޅުގަނޑުމެން މި މަސައްކަތް ކުރަނީ ހުއްޓާނުލައި މި އެހީތެރިކަން ފޯރުކޮށްދެވޭތޯ މަސައްކަތް ކުރަމުން،" އޮފިޝަލް ވިދާޅުވި އެވެ.
އެނގުން މުހިއްމު - ހަމާސްގެ ހަނގުރާމަވެރިން ކުއްލިއަކަށް މިދިޔަ ހޮނިހިރު ދުވަހު އިޒްރޭލަށް ވަދެގަނެ ދިން ހަމަލާތަކާއި ރޮކެޓްގެ އެތައް ހާސް ހަމަލާއެއްގެ ސަބަބުން އިޒްރޭލްގެ ގިނަ ބަޔަކު މަރުވި އެވެ. އޭގެ ބަދަލު ހިފުމުގެ ގޮތުން އިޒްރޭލުން ގާޒާއަށް ދޭން ފެށި މިސައިލް ހަމަލާތަކުގައި 900އަށް ވުރެ ގިނަ މީހުން ޝަހީދުވެ، 4،500އަށް ވުރެ ގިނަ މީހުން ވަނީ ޒަހަމްވެފަ އެވެ.
އިޒްެރޭލުގެ އުދުވާނީ ހަމަލާތަކުގެ އަމާޒަކަށް ގާޒާގެ ރައްޔިތުން ހަދާ ކޮންމެ ފަހަރަކު، ދިވެހިންގެ ވަރަށް ބޮޑު އެހީތެރިކަމެއް އެ މީހުންނަށް ފޯރުކޮށްދެ އެވެ.
ގައްޒާއަށް އެހީވުމަށް:
-
އެކައުންޓު ނަމްބަރު: 7770000062741
-
އެކައުންޓު ނަން: އިންޓަނޭޝަނަލް އެއިޑް ކެމްޕޭން