ނަހުލާ ބޭނުން ދުވަހަކު މިނިސްޓަރުގެ މަގާމުގައި ހުންނެވޭނެ، ކަނޑާލިޔަސް އެންމެ ރަނގަޅު: ގާސިމް

ރައީސް އިބްރާހީމް މުހަންމަދު ސޯލިހުގެ ސަރުކާރުގެ ޓްރާންސްޕޯޓް މިނިސްޓަރު ކަމުގެ މަގާމުގައި އައިޝަތު ނަހުލާ ބޭނުން ދުވަހެއް ވަންދެން ހުންނެވޭނެ ކަމަށާއި މިސަރުކާރުން ނަހުލާ އެ މަގާމުން ވަކިކުރިޔަސް ނުވަތަ ނަހުލާ އަމިއްލައަށް އިސްތިއުފާ ދެއްވިޔަސް މައްސަލައެއް ނެތް ކަމަށް އޭނާގެ ފިރިކަލުން، ޖުމްހޫރީ ޕާޓީ(ޖޭޕީ)ގެ ރިޔާސީ ކެންޑިޑޭޓް ގާސިމް އިބްރާހިމް މިއަދު ވިދާޅުވެއްޖެ އެވެ.

ވީ ކިހިނެއް؟ ހަތަރު ޕާޓީ އެކުލެވޭ ކޯލިޝަނެއްގެ ތެރެއިން 2018 ވަނަ އަހަރު އެމްޑީޕީއަށް އިންތިހާބު ކާމިޔާބުވުމުން، ޖޭޕީގެ ލީޑަރު ގާސިމްގެ އަނބިކަނބަލުން ނަހުލާ އައްޔަންކުރީ ޓްރާންސްޕޯޓް މިނިސްޓަރުގެ މަގާމަށެވެ.

އަންނަ މަހުގެ 9ގައި އޮންނަ ރިޔާސީ އިންތިހާބުގައި ވެސް ރައީސް އިބްރާހިމް މުހައްމަދު ސޯލިހުގެ ފަހަތްޕުޅުން ކޯލިޝަންގައި ތިއްބެވުމަށް ޖޭޕީއަށް މިސަރުކާރުން ދައުވަތު ދިނެވެ. އެކަމަކު ޖޭޕީން ނިންމީ، މިފަހަރުގެ އިންތިހާބުގައި ވަކިން ވާދަކުރުމަށެވެ. ޖޭޕީގެ ޓިކެޓުގައި ގާސިމް ރިޔާސީ ރޭހަށް ނުކުންނަވައި، ކުރަމުންދާ ކެމްޕެއިންތަކުގައި ނަހުލާ ވެސް ބައިވެރިވެވަޑައިގަންނަވާ އިރު، އޭނާ އަދި ވެސް ހުންނެވީ މި ސަރުކާރުގެ ޓްރާސްޕޯޓް މިނިސްޓަރުގެ މަގާމުގަ އެވެ. 

ތަފްސީލް - ގާސިމް ރިޔާސީ ކެމްޕެއިންއަށް ނ. ލަންދުއަށް މިއަދު ވަޑައިގެން އެ ރަށުގައި ބޭއްވި ޖަލްސާގައި ވަނީ ސަރުކާރަށް ވަރަށް ބޮޑަށް ފާޑުވިދާޅުވެފަ އެވެ. އެ ފާޑުވިދާޅުވުމަށް ފަހު އޭނާ ވިދާޅުވީ މި ސަރުކާރުގެ ޓްރާންސްޕޯޓް މިިނިސްޓަރުގެ މަގާމުގައި، އަނބިކަނބަލުން ހުންނަވާތީ ބައެއް މީހުން ސުވާލު ކުރާ ކަމަށެވެ.

ނަމަވެސް ގާސިމް ވިދާޅުވީ ނަހުލާ މިނިސްޓަރުގެ މަގާމުގައި ހުންނެވިޔަސް، ގާނޫނާ ހިލާފަށް އަންގާ އެންގުންތަކަށް އޭނާ ބޯ ނުލަންބަވާނެ ކަމަށެވެ.

"[ވަކި ކަމެއް ވަކި ގޮތަކަށް] ކުރަން އެންގިޔަސް އަޅުގަނޑަށް ޔަގީން [ނަހުލާ އެކަން] ނުކުރާނެ ކަން. އެހެންވީމާ އޭނާ ހުންނަން ބޭނުންވާ ދުވަހެއް ވަންދެން ހުންނަވާފައި، ވަކިވާން ވެއްޖެއްޔާ ވަކިވާންވީ. ނޫނީ ރައީސް ކަނޑާލާނެ، އެ ނިމުނީ،" ޖޭޕީގެ ރިޔާސީ ކެންޑިޑޭޓް ވިދާޅުވި އެވެ.

ގާސިމް ވިދާޅުވީ ނަހުލާ ބޭނުން ގޮތަކަށް އަމަލު ކުރެއްވުމުގެ ފުރިހަމަ އިހުތިޔާރު އޭނާއަށް އޮންނާނެ ކަމަށެވެ.

"އެބޭފުޅާ އަމިއްލައަށް އިސްތިއުފާ ދެއްވަންޏާ ދެއްވާނެ. އަޅުގަނޑު އެކަމަކާ ނުބެހެން. އެހެން ނަމަވެސް އަޅުގަނޑުންގެ ހަ ދަރީންގެ މަންމަ އެއީ." ގާސިމް ވިދާޅުވި އެވެ.

ގާސިމް ވިދާޅުވީ ނަހުލާ ޓްރާންސްޕޯޓް މިނިސްޓަރުގެ މަގާމުގައި ހުންނެވިއަސް، އޭނާއަށް މާބޮޑު ކަމެއް ކުރެވޭނެ ގޮތަކަށް، މާ ބޮޑު އިހުތިޔާރުތަކެއް ނޯންނަ ކަމަށެވެ.

ގާސިމް ވިދާޅުވީ އޭނާގެ ހިޔާލު ސަރުކާ ހިލާފުވީ: 

ރައީސް ސޯލިހާ އެކު ދެވަނަ ދައުރަކަށް ކޯލިޝަން ނުހަދަން ނިންމީ އެފަދަ ކަންކަން މަޝްވަރާކުރުމެއް ނެތި އަމިއްލަ އަމިއްލައަށް ނިންމުމުން ކަމަށް ގާސިމް ވިދާޅުވި އެވެ. އަދި ވިދާޅުވީ ރައީސް ސޯލިހް މިހާރު ހުންނެވީ ގާނޫނު އަސާސީއާ ހިލާފުވުމުގެ ސަބަބުން 'އަޒުލް'ކޮށް ޝަރީއަތް ކުރަންޖެހޭ ހިސާބުގައި ކަމަށެވެ.