ޖޭޕީގެ ލީޑަރު ގާސިމް ރައީސް ސޯލިހްއާ އެކު. (ފޮޓޯ/ސޯޝަލް މީޑިއާ)
މަޝްވަރާ ނުކޮށް، ހިތު ހުރިހާ ގޮތަަކަށް ކަން ކުރީމާ ދެވަނަ ފަހަރަށް ކޯލިޝަނެއް ނުހެދޭނެ: ގާސިމް
މަޝްވަރާ ނުކޮށް، ބޭނުންހާ ގޮތަކަށް ކަންކުރާ ބަޔަކާ އެކު ދެވަނަ ފަހަރަށް ކޯލިޝަން ނުހެއްދެވޭނެ ކަމަށް ވިދާޅުވެ، މި ސަރުކާރާ އެކު ދެވަނަ ދައުރަކަށް ކޯލިޝަން ނުހަދަން ނިންމައި ރިޔާސީ އިންތިހާބުގައި ވަކިން ވާދަކުރައްވަން ނިންމެވި ސަބަބު ޖުމްހޫރީ ޕާޓީ (ޖޭޕީ)ގެ ލީޑަރު ގާސިމް އިބްރާހިމް މިއަދު ވިދާޅުވެއްޖެ އެެވެ.
ވީ ކިހިނެއް؟ - 2018 ވަނަ އަހަރުގެ ރިޔާސީ އިންތިހާބު މިހާރުގެ ސަރުކާރުން ކާމިޔާބު ކުރީ ޖޭޕީ އާއި އަދާލަތު ޕާޓީ އާއި މޯލްޑިވްސް ރިފޯމް މޫވްމަންޓް (އެމްއާރްއެމް) ހިމެނޭ ކޯލިޝަނަކުންނެވެ. ރައީސް އިބްރާހިމް މުހައްމަދު ސޯލިހް ދެވަނަ ދައުރަކަށް ވާދަކުރައްވަން ނިންމަވައި ކޯލިޝަންގައި ދެމެހެއްޓެވުމަށް އެ ޕާޓީތަކަށް ހުށަހެޅުއްވި ހުށަހެޅުން ޖޭޕީން ގަބޫލެއް ނުކުރެ އެވެ.
ގާސިމްގެ ކެމްޕެއިންގައި މިހާރު ނ. އަތޮޅަށް ކުރައްވަމުން ގެންދަވާ ދަތުރުގައި އެ އަތޮޅު ކެނދިކުޅުދުއަށް މިއަދު ވަޑައިގެން ވާހަކަދައްކަވަމުން ގާސިމް ވިދާޅުވީ، މި ސަރުކާރާ އެކު ކޯލިޝަން ނުހެދީ މަޝްވަރާ ކުރުމެއް ނެތި، ރައީސް ސޯލިހް ބޭނުންފުޅުވާހާ ގޮތަކަށް ކަންތައްތައް ކުރައްވާތީ ކަމަށެވެ.
ތަފްސީލް - އިގްތިސޯދީ ގޮތުން ރާއްޖޭގެ އިނދަޖެހެމުން ދާއިރު، ފުލުފުލުގައި ދަރަނި ނަގަމުން ދިއުމާއި އިންޑިއާ ސިފައިން ރާއްޖޭގައި ތިބުމާ މެދު ކަންބޮޑުވުން ފާޅުކުރައްވައި ގާސިމް ވިދާޅުވީ، އެކަންކަން ކުރަމުންދަނީ ކޯލިޝަނާ މަޝްވަރާ ކުރުމެއް ނެތި ކަމަށެވެ.
ރާއްޖޭގައި ބޭރުގެ ސިފައިން ތިބުމާ ގުޅޭ ގޮތުން ބައެއް ކަންކަން ސާފުކުރަން، ކޯލިޝަންގައި ހިމެނޭ އެމްއާރްއެމްގެ ޒައީމު، ކުރީގެ ރައީސް މައުމޫން އަބްދުލްގައްޔޫމް ފޮނުއްވި ސިޓީފުޅަށް ވެސް ރައީސް ސޯލިހް މިހާތަނަށް ޖަވާބު ދެއްވާފައި ނުވާ ކަމަށް ގާސިމް ވިދާޅުވި އެވެ. މި ފަހަރުގެ އިންތިހާބަށް ރައީސް ސޯލިހާ އެކު ކޯލިޝަން ނުހަދަން ނިންމި އެމްއާރުއެމްގެ ޒައީމު އެ ސިޓީ ފޮނުއްވިތާ މިހާރު ހަަތަރު މަސް ވެއްޖެ ކަމަށް ގާސިމް ވިދާޅުވި އެެވެ.
ރާއްޖޭގެ ސުލުހަ މަސަލަސްކަމާއި ސަލާމަތާއި އިސްތިގުލާލަށް ނުރައްކާވާނެ ނުވަތަ މިނިވަންކަމަށް ބުރުލެއް އަރާފާނެ އެއްވެސް ކަމެއް އަދި ދީނަށް ގުޑުމެއް އަތުވެދާނެ އެއްވެސް ކަމެއް ސަރުކާރުން ކުރަންވާނީ ކޯލިޝަނާ މަޝްވަރާކޮށް، އެއްބަސްވެވޭ ގޮތެއްގެ މަތިން ކަމަށް ކޯލިޝަން އެއްބަސްވުމުގައި އޮންނާނެކަން ގާސިމް ފާހަގަކުރެއްވި އެވެ.
"މިހެން މިކަން އޮއްވައި އަޅުގަނޑުމެންނާ އެއްވެސް ވާހަކައެއް ނުދައްކަވައި އެއްވެސް ހިޔާލެއް ބަދަލު ނުކުރައްވައި ހިތް ޕުޅަށް އެރިވަޑައިގެންނެވިހާ ގޮތަކަށް ވެރިއަކަށް ހުރި މީހާ ކަންތައް ކުރީމާ، އަޅުގަނޑުމެން ދެން ކިހިނެއްތޯ އެ ބޭފުޅާ އެކު ކޯލިޝަން ހަދައިގެން އަނެއްކާ އަނެއް ފަހަރު ދަނީ؟،" ގާސިމް ސުވާލު ކުރެއްވި އެވެ.
ގާސިމް ވިދާޅުވީ، މައްސަލަ އަކީ އިންޑިއާ ނޫން ކަމަށާއި، މައްސަލަ އަކީ ދިވެހި ވެރިންގެ "ހަސްފަސް ނެތްކަން" އަދި "ދޯދިޔާކަން" ކަމަށެވެ. އެހެންވެ، މިހާރު ގައުމު އޮތީ، ނުރައްކަލުގެ ތުންފަތް މަތީގައި "ކުރަފަތެއްގެ މިޔަމަތީގައި" އޮންނަ ފަދައިން ކަމަށް އޭނާ ވިދާޅުވި އެވެ.
ފާހަގަކޮށްލެވޭ ކަމެއް - ދެ ވަނަ ފަހަރަށް ރައީސް ސޯލިހާ އެކު ކޯލިޝަން ނުހެދޭނެ ކަމަށް ވިދާޅުވެ ގާސިމް މިއަދު ވާހަކަދެއްކެވިއިރު، އަންނަ މަހުގެ 9ގައި އޮންނަ ރިޔާސީ އިންތިހާބުގައި ދެވަނަ ބުރަކަށް ދަންދެން މަޑުނުކުރައްވައި ސަރުކާރުގެ ކޯލިޝަނާ ގުޅިވަޑައިގަތުމަށް ރައީސް ސޯލިހް ވަނީ މިފަހުން ގާސިމްއަށް ގޮވާލައްވާފަ އެވެ.