ޔާމީން ކަރެކްޝަންސްގެ ބެލުމުގެ ދަށުން ކޯޓަށް ގެންދަނީ. (ދައުރު ފޮޓޯ/ހުސައިން ސުނޭން)
އިންތިހާބު ބޮއިކޮޓް ނުކުރަން ސެނެޓުން ނިންމި ނިންމުން ޔާމީން ގަބޫލެއް ނުކުރި
ޕީޕީއެމް އިން ރިޔާސީ އިންތިހާބު ބޮއިކޮޓް ކުރުމަށް، އެ ޕާޓީގެ ކެންޑިޑޭޓް، ކުރީގެ ރައީސް އަބްދުﷲ ޔާމީން އެންގެވިޔަސް، އިންތިހާބުގައި ބައިވެރިވާން ޕީޕީއެމް-ޕީއެންސީގެ ޖޮއިންޓް ސެނެޓުން މިއަދު ނިންމި ނިންމުން ގަބޫލުނުކުރައްވާކަން، ޔާމީން ޕީޕީއެމް-ޕީއެންސީގެ ލީޑަޝިޕަށް މިރޭ އަންގަވައިފި އެވެ.
ވީ ކިހިނެއް؟ - ޕީޕީއެމް-ޕީއެންސީގެ އިސް ބޭފުޅުން 'ދައުރު'އަށް ކަށަވަރުކޮށްދެއްވި ގޮތުގައި، ޔާމީން އެ ގޮތަށް އެންގެވީ އަނބިކަނބަލުން ފާތިމަތު އިބްރާހިމް މެދުވެރިކުރައްވައި ދާދި ދެންމެއަކު ފޯނު ކޯލަކުންނެވެ.
ތަފްސީލް - އެ ކޯލުގައި ޔާމީން ވިދާޅުވި ބަސްފުޅު، ޕީޕީއެމް-ޕީއެންސީ ކޯލިޝަން ހިންގެވުމާ ހަވާލުވެ ހުންނެވި އަބްދުއްރަހީމް އަބްދުﷲ ލީޑަޝިޕަަށް އެންގެވުމަށް ލީޑަޝިޕްގެ ބައްދަލުވުމެއް ޕީޕީއެމް-ޕީއެންސީ އޮފީހުގައި ބާއްވަން ތައްޔާރުވަމުން އެބަދެ އެވެ.
"ރައީސް ޔާމީން ވިދާޅުވީ ރައީސް ނިންމެވި ގޮތް ކުރިން އޮންނާނީ ވިދާޅުވެފައި ކަމަށް،" ޕީޕީއެމް-ޕީއެންސީގެ އިސް ބޭފުޅަކު، ނަން ނުޖަހަން ޝަރުތުކޮށް 'ދައުރު'އަށް ވިދާޅުވި އެވެ.
ޔާމީން މިރޭ އެންގެވި އެންގެވުމާ ގުޅޭ ގޮތުން، މިހާރު ކުރިއަށްދާ ލީޑަޝިޕްގެ ބައްދަލުވުމުގައި ގޮތެއް ނިންމާނެ ކަމަށް ބެލެވެ އެވެ. އެ ބައްދަލުވުމުގައި ކޮންމެ ގޮތަކަށް ނިންމިޔަސް، ޕީއެންސީގެ ޓިކެޓުގައި އިންތިހާބުގައި ވާދަކުރެއްވުމަށް، މާލޭގެ މޭޔަރު ޑރ. މުހައްމަދު މުއިއްޒު މާދަމާ އިލެކްޝަންސް ކޮމިޝަނަށް ފޯމު ހުށަހަޅުއްވާނެ ކަމަށް މުއިއްޒުގެ ގާތް ބޭފުޅުންނާއި ޕީޕީއެމް-ޕީއެންސީގެ ބައެއް އިސް ބޭފުޅުން 'ދައުރު'އަށް ވިދާޅުވި އެވެ
މިކަމާ ގުޅޭ ގޮތުން ޕީޕީއެމްގެ ރަސްމީ ބަހެއް އަދި ނުލިބެ އެވެ. ނަމަވެސް، ޔާމީންގެ މެސެޖެއް ލިބިފައިވާކަން، ޕީޕީއެމްގެ ސެކްރެޓަރީ ޖެނެރަލް އަދި ޔާމީންގެ އިންތިހާބީ އެޖެންޓް މުހައްމަދު ތޮލާލް ވެސް 'ދައުރު'އަށް ކަށަވަރުކޮށްދެއްވި އެވެ.
އެނގުން މުހިންމު - އަންނަ މަހުގެ 9 ވަނަ ދުވަހު ބާއްވާ ރިޔާސީ އިންތިހާބު، އެންމެ ބޮޑު އިދިކޮޅު ޕާޓީ ކަމަށްވާ ޕީޕީއެމްއިން ބޮއިކޮޓް ކުރުމަށް، ޔާމީނަށް އިންތިހާބުގައި ވާދަނުކުރެވޭނެ ކަމަށް ސުޕްރީމް ކޯޓުން މިއަދު ހެނދުނު ކުރި ހުކުމަށް ފަހު އެ މަނިކުފާނު އެ ޕާޓީގެ ލީޑަޝިޕަށް އެންގެވި އެވެ.
ޔާމީންގެ އެ އެންގެވުމާ ގުޅިގެން ލީޑަޝިޕްގައި މަޝްވަރާކުރުމަށް ފަހު، އެ ބޭފުޅުން ނިންމެވީ ދެ ޕާޓީގެ ސެނެޓުގެ ވޯޓަށް ދިއުމަށެވެ. އެ ވޯޓުން ނިމުނީ އިންތިހާބު ބޮއިކޮޓް ނުކުރުމަށެވެ. އެގޮތުން:
-
67 ސެނެޓަރުން ވޯޓު ދެއްވީ އިންތިހާބު ބޮއިކޮޓްކުރަން ނުފެންނަ ކަމަށް
-
46 ބޭފުޅަކު ތާއީދުކުރެއްވީ އިންތިހާބު ބޮއިކަޓް ކުރުމަށް
ގުޅުން ހުރި ކަމެއް - އިންތިހާބުގައި ޔާމީނަށް ކުރިމަތި ނުލެއްވޭ ހާލަތެއްގައި، ޕީޕީއެމްއާ އެކުއެކީ ހިންގާ ޕީއެންސީން ކެންޑިޑޭޓަކު ނެރެން ޔާމީން އެންގެވުމުން އެ ޕާޓީން ވާދަކުރެއްވުމަށް ނިންމާފައިވަނީ މާލޭގެ މޭޔަރު މުއިއްޒެވެ.
އޭގެ ފަހުން އިއްޔެ ޕީޕީއެމްގެ އިސް ބޭފުޅުން ވިދާޅުވެފައި ވަނީ މުއިއްޒަކީ 'ޕްލޭން ސީ' ކަމަށާއި، ޔާމީނަށް ވާދަނުކުރެވޭ ހާލަތުގައި 'ޕްލޭން ބީ' އަކީ ޕީޕީއެމްގެ އެހެން ކެންޑިޑޭޓެއް ނެރުން ކަމަށެވެ.
ނަމަވެސް، ޔާމީނަށް އިންތިހާބުގައި ވާދަ ނުކުރެވޭ ނަމަ، ޕީޕީއެމްގެ ފަރާތުން އިންތިހާބުގައި ވާދަކުރާނެ ކެންޑިޑޭޓަކު ހަމަޖެއްސުމަށް އިތުރު ވަގުތު ދިނުމަށް ސުޕްރީމް ކޯޓުގައި ޔާމީންގެ ފަރާތްޕުޅުން އެދުނު އެދުމާ ގުޅޭ ގޮތުން އެ ކޯޓުން ގޮތެއް ނިންމާފައި ނުވާތީ، މިހާރު ވެސް އޮތް ގޮތަށް މާދަމާ މެންދުރު ފަހު 2އަށް ކެންޑިޑެސީ ހުށަހެޅުމުގެ މުއްދަތު ހަމަވާނެ އެވެ.