ޔާމީންގެ ކެންޑިޑެސީ ބަލައިނުގަތުމަށް އީސީން ނިންމައިފި

އިދިކޮޅު މައި ޕާޓީ، ޕީޕީއެމްގެ ރިޔާސީ ކެންޑިޑޭޓް، ކުރީގެ ރައީސް އަބްދުﷲ ޔާމީންގެ ކެންޑިޑެސީ ބަލައިނުގަތުމަށް އިލެކްޝަންސް ކޮމިޝަން (އީސީ)އިން ދެންމެއަކު ނިންމައިފި އެވެ.

ވީ ކިހިނެއް؟ - އެމްއެމްޕީއާރުސީގެ ވައްކަމުގެ މައްސަލައިގައި 11 އަހަރުގެ ޖަލު ހުކުމެއް ތަންފީޒުކުރައްވަމުން ގެންދަވާ ޔާމީންގެ ކެންޑިޑެސީ ފޯމު ޕީޕިއެމްއިން އިލެކްޝަންސް ކޮމިޝަނަށް ހުށަހެޅީ މިއަދު ހެނދުނު އެވެ. އެ ފޯމާ ގުޅޭ ގޮތުން ކޮމިޝަނުން ނިންމި ނިންމުން މިހާރު އީސީން ވަނީ ޓުވިޓާގައި އާންމުކޮށްފަ އެވެ.

ތަފްސީލު -  ކޮމިޝަންގެ ނިންމުމުގައިވާ ގޮތުން، ޔާމީންގެ ކެންޑިޑަސީ ގަބޫލު ކުރެވެން ނެތް ކަމަށް ނިންމީ އެ މަނިކުފާނުގެ މައްޗަށް އައިސްފައިވާ 11 އަހަރުގެ ޖަލު ހުކުމުގެ ސަބަބުންނެވެ.

"މި ހުކުމް ތަންފީޒުކޮށް ނިމިފައި ނުވާކަން، ހަށަހަޅާފައިވާ ކުށުގެ ރިކޯޑަށް ބެލުމުން އެނގެން އޮންނާތީ، ގާނޫނުއަސާސީގެ 109 ވަނަ މާއްދާގެ (ޅ)ގައި ބަޔާންކުރާ ޝަރުތު އަބްދުﷲ ޔާމީންގެ ކިބައިގައި ފުރިހަމަނުވުން،" ކެންޑީޑަސީ ބަލައިނުގަތުމަށް ނިންމި ސަބަބުގެ ގޮތުގައި އީސީގެ ލިޔުމުގައި ބުނެފައިވެ އެވެ.

އެނގުން މުހިންމު - ގާނޫނުއަސާސީގެ 109 ވަނަ މާއްދާގައި ބަޔާން ކުރަނީ، ރައީސަކަށް ހުންނަވާ ބޭފުޅެއްގެ ޝަރުތުތަކެވެ. ޔާމީންގެ ކެންޑިޑެސީ ގަބޫލު ނުކުރަން ނިންމި ނިންމުގައި ހަވާލާދީފައިވާ، އެ މާއްދާގެ (ޅ)ގައި ބުނަނީ:

އީސީގެ މި ނިންމުން މިހާރު ޕީޕިއެމްއާ ހިއްސާކޮށްފައިވާ ކަމަށް އެ ޕާޓީން ވެސް ވަނީ ބުނަފަ އެވެ. 

އެނގުން މުހިންމު - އިންތިހާބުތަކާ ބެހޭ އާންމު ގާނޫނު ބުނާ ގޮތުން:

މިއަދު ހެނދުނު ޔާމީންގެ ފޯމު ހުށަހެޅުމަށް ފަހު، އެ މަނިކުފާނުގެ ރަނިން މޭޓް، ކުރީގެ ނައިބު ރައީސް ޑރ. މުހައްމަދު ޖަމީލު އަހްމަދު ވިދާޅުވީ، ކޮމިޝަނުން ޔާމީންގެ ކެންޑިޑެސީ ބަލައިނުގެންފި ނަމަ، ކޯޓަށް އެ މައްސަލަ ހުށަހަޅުއްވާނެ ކަމަށެވެ.

"އަޅުގަނޑުމެންނަށް ޔަގީންކަން އެބަ އޮތް ޝަރުއީ މަރުހަލާގެ ތެރެއިން ރައީސް ޔާމީންގެ ކެންޑިޑެސީ ކަށަވަރުވާނެ ކަމާ މެދު،" ޖަމީލް ވިދާޅުވި އެވެ.