ފަނޑިޔާރަކު ޗުއްޓީގައި ހުންނެވުމުން ޔާމީންގެ އިސްތިއުނާފް އަޑުއެހުންތައް ބޭއްވޭނެ ދުވަހެއް ނޭނގޭ: އިދިކޮޅު

ވ. އާރަށް ކުއްޔަށް ދޫކުރުމުގައި ހިންގި ހިޔާނާތުގެ މައްސަލައިގައި ކުރީގެ ރައީސް އަބްދުﷲ ޔާމީންގެ މައްޗަށް އިއްވާފައިވާ 11 އަހަރުގެ ޖުލު ހުކުމްގެ އިސްތިއުނާފް އަޑުއެހުންތައް ތާވަލުކުރުން ލަސްްވަމުންދަނީ މައްސަލަ ބައްލަވާ ހައި ކޯޓުގެ ފަނޑިޔާރުންގެ ބެންޗުގައި ހިމެނިވަޑައިގަންނަވާ އެއް ފަނޑިޔާރަކު އާއިލީ ޒިންމާ ޗުއްޓީގައި ހުންނެވުމުން ކަމަށް އެ ކޯޓުން ބުނެފައިވާ ކަމަށް ޕީޕީއެމް/ޕީއެންސީގެ ލީޑަޝިޕުން މިއަދު ބުނެފި އެވެ.

ވީ ކިހިނެއް؟ - ރިޔާސީ އިންތިހާބަށް ނަން ހުށަހަޅަން ހުޅުވާލަން 12 ދުވަހަށް ވެފައި ވާއިރު، ހައި ކޯޓުން އިސްތިއުނާފީ އަޑުއެހުންތައް ތާވަލުކުރަމުން ނުދާ ކަމުގެ ކަންބޮޑުވުންތަކާ އެކު، ޕީޕީއެމް/ޕީއެންސީ ލީޑަޝިޕުން މިއަދު ވަނީ ހައި ކޯޓަށް ގޮސް އެ ކަންބޮޑުވުންތައް ހިއްސާކޮށްފަ އެވެ.

ތަފްސީލް - ހައި ކޯޓުގައި ބޭއްވި ބައްދަލުވުމަށް ފަހު، އެ ބައްދަލުވުމުގައި ބައިވެރިވެވަޑައިގެންނެވި މަޑުއްވަރީ ދާއިރާގެ މެމްބަރު އާދަމް ޝަރީފް ވިދާޅުވީ، އިސްތިއުނާފީ އަޑުއެހުންތައް ލަސްވަނީ ފަނޑިޔާރަކު އާއިލީ ޒިންމާގައި ހުންނެވުމުން ކަމަށް އެ ކޯޓުން ބުނެފައިވާ ކަމަށެވެ.

"އެ ކޮޅުގެ ޖަވާބަކީ މި ވަގުތު އަދި ތާވަލުކުރެވޭކަށް ނެތް ކަމަށް. ސަބަބަކަށް ވިދާޅުވީ ފަނޑިޔާރަކު އާއިލީ ޒިންމާގައި ހުންނެވި ކަމަށް. ނުކުންނެވިހާ އަވަހަކަށް އަޑުއެހުންތައް ތާވަލުކުރާނެ ކަމަށް،" އޭނާ ވިދާޅުވި އެވެ.

މައްސަލައިގެ ފެށުން - އާރަށު މައްސަލައިގައި ޔާމީންގެ މައްޗަށް އުފުލި މަނީ ލޯންޑްރިން އާއި ރިޝްވަތު ގަބޫލުކުރުމުގެ ދައުވާ ސާބިތުވެ، 11 އަހަރަށް ޖަލަށް ލާން 25 ޑިސެމްބަރުގައި ކްރިމިނަލް ކޯޓުން ހުކުމް ކުރި އެވެ.

އެނގުން މުހިންމު - އަންނަ 9 ސެޕްޓެމްބަރުގައި އޮންނަ ރިޔާސީ އިންތިހާބުގައި ވާދަކުރާ ކެންޑިޑޭޓުންގެ ނަން ހުށަހެޅުމަށް މި މަހުގެ 23ގައި ހުޅުވާލާނެ އެވެ. އެ މުއްދަތު އޮންނާނީ އަންނަ މަހުގެ 9ގެ ނިޔަލަށެވެ.

ފަނޑިޔާރުން ޗުއްޓީގައި ތިއްބެވުމުން އަޑުއެހުންތައް ލަސްވަމުން ދާއިރު، އިސްތިއުނާފީ އަޑުއެހުންތައް ދިގުކޮށް ކުރިއަށް ގެންގޮސް ނިންމައިދިނުމަށް ޔާމީން އޮތީ މީގެ ކުރިން ފަނޑިޔާރުންގެ ބެންޗުގައި އެދިވަޑައިގެންފަ އެވެ.