އިންޑިއާގެ އެހީގައި ދިފާއީ ދާއިރާގެ 50 މިލިއަން ޑޮލަރުގެ މަޝްރޫއު އެބަ ހިންގާ: ޝާހިދު

ރާއްޖޭގެ ދިފާއީ ދާއިރާގެ ގާބިލުކަން އިތުރުކުރަން، އިންޑިއާގެ ލައިން އޮފް ކްރެޑިޓްގެ ދަށުން ހިންގާ 50 މިލިއަން ޑޮލަރު (767.5 މިލިއަން ރުފިޔާ)ގެ މަޝްރޫތައް މިހާރު ކުރިއަށްދާ ކަމަށް ފޮރިން މިނިސްޓަރު އަބްދުﷲ ޝާހިދު މިއަދު ވިދާޅުވެއްޖެ އެވެ.

ވީ ކިހިނެއް؟ - މިނިސްޓަރު މިހެން ވިދާޅުވީ އިންޑިއާގެ އެކްސްޓާނަލް އެފެއާޒްގެ ސްޓޭޓް މިނިސްޓަރު ވީ މުރަލީދަރަން ރާއްޖެއަށް ކުރައްވަމުން ގެންދަވާ ރަސްމީ ދަތުރާ ދިމާކޮށް، ދެ ގައުމުގެ ދެމެދުގައި 10 އެއްބަސްވުމެއްގައި ސޮއިކުރަން މިއަދު ހެނދުނު ފޮރިން މިނިސްޓްރީގައި ބޭއްވި ރަސްމިއްޔާތުގައި ވާހަކަދައްކަވަމުންނެވެ.

ބުނީ ކީކޭ؟ - މިއަދު ސޮއިކުރި އެއްބަސްވުންތަކުން ރާއްޖެ އާއި އިންޑިއާއާ ދެމެދުގައިވާ ގާތް ގުޅުން ރަމްޒުކޮށްދޭ ކަމަށް ވިދާޅުވެ، ޝާހިދުގެ ވާހަކައިގައި، އިންޑިއާގެ އެހީތެރިކަމުގެ ދަށުން ކުރިއަށްގެންދާ އަދި ކުރިއަށް އޮތް ތަނުގައި ފަށަން ހަމަޖެހިފައިވާ އެހެނިހެން މަޝްރޫއުތަކަށް ވެސް އަލިއަޅުވާލެއްވި އެވެ. އެގޮތުން، ދިފާއީ ދާއިރާގެ ގާބިލުކަން އިތުރުކުރަން ކުރިއަށްގެންދާ 50 މިލިއަން ޑޮލަރުގެ މަޝްރޫއުގެ ވާހަކަ އޭނާ ފާހަގަކުރެއްވި އެވެ. 

ޝާހިދު އެ މަޝްރޫއުތަކުގެ ތަފްސީލު ނުދެއްވިޔަސް، އުތުރު ތިލަފަޅުގައި ކޯސްޓްގާޑުގެ ބޭހެއް ގާއިމްކުރަން ހިންގާ މަޝްރޫއު ކުރިއަށް ގެންދަނީ އިންޑިއާގެ ކްރެޑިޓް ލައިން މެދުވެރިކޮށެވެ.

އޭގެ އިތުރުން، އިންޑިއާގެ ލޯނާއި އެހީގެ ދަށުން ކުރިއަށްގެންދާ މަޝްރޫއުތަކުގެ ތެރޭގައި ޝާހިދު ފާހަގަކުރެއްވީ:

ރާއްޖޭގެ އެކި ދާއިރާތަކުގެ ތަރައްގީއަށް އިންޑިއާއިން ދެމުން އަންނަ އެހީތެރިކަން ފާހަގަކުރައްވައި އިންޑިއާގެ 'ނެއިބާހުޑް ފަސްޓް' ޕޮލިސީގެ ދަށުން ރާއްޖެއަށް ހާއްސަ އިސްކަމެއް ދިނުމަކީ ރާއްޖެއިން ޝުކުރުވެރިކަމާ އެކު ބަލައިގަންނަ ކަމެއް ކަމަށް ޝާހިދު ވިދާޅުވި އެވެ.

ރާއްޖެ އާއި އިންޑިއާއާ ދެމެދު ވެވޭ އެއްބަސްވުންތަކުގެ ދަށުން ކުރިއަށްގެންދާ މަޝްރޫއުތަކުގެ ސަބަބުން، ދެ ގައުމުގެ ގުޅުން ދުވަހެއް ދުވަހަކަށް އިތުރަށް ހަރުދަނާވެ، ވަރުގަދަވަމުން އަންނަކަން ވެސް އޭނާ ފާހަގަކުރެއްވި އެވެ.