މާލެއިން ސިނަމާލެ ބުރިޖަށް އަރާ ސަރަައްދުގައި ފުލުހުންގެ ކާރެއް ކައިރީ ޓްރެފިކް ފުލުހަކު މަޑުކޮށްލައިގެން: ފުލުހުންގެ ޕިކަޕެއްގައި ޖެހި 43 އަހަރުގެ މީހަކު ވަނީ މަރުވެފައި (ދައުރު ފޮޓޯ/ މުޒައްޔިން ނާޒިމް)
މަރުވި މީހާ ފުލުހުންގެ ޕިކަޕެއްގައި ޖެހުނީ ކާރު ލޭނުން ބާރަށް ދުއްވަނިކޮށް: ޕޮލިސް
މާލެ އާއި ހުޅުމާލެ ގުޅުވައިދޭ ހައިވޭގައި މިދިޔަ ހުކުރު ދުވަހުގެ ރޭ ދަންވަރު ހިނގި އެކްސިޑެންޓްގައި މަރުވި މީހާ ދުއްވި ސައިކަލު ޖެހުނީ މަގުގެ އެއް ފަޅީގައި އޮތް ފުލުހުންގެ ޕިކަޕެއްގައިކަން ފުލުހުން އެންމެ ފަހުން މިރޭ ހާމަކޮށްފި އެވެ. ނަމަވެސް، އެ އިދާރާ އިން ބުނީ އެ މީހާ ދުއްވި ސައިކަލު ޕިކަޕުގައި ޖެހުނީ ކާރު ލޭނުން ވަރަށް ބާރަށް ދުއްވާފައި ދަނިކޮށް ކަމަށެވެ.
ވީ ކިހިނެއް؟ - ޕިކަޕުގައި ޖެހުނު ސައިކަލު ދުއްވަން އިން އުމުރުން 43 އަހަރުގެ އެ މީހާ އެކްސިޑެންޓްގައި މަރުވެފައިވާކަން ފުލުހުން ފުރަތަމަ ހާމަކުރިއިރު، އެ އެކްސިޑެންޓް ހިނގީ ސައިކަލެއް ޕިކަޕެއްގައި ޖެހިގެން ކަމަށް ބުންޏަސް، އެއީ ފުލުހުންގެ ޕިކަޕެއް ކަމެއް ހާމަކޮށްފައެއް ނުވެ އެވެ. އަދި ސައިކަލު އައީ ކާރު ލޭނުން ވަރަށް ބާރަށް ދުއްވާފައި ކަމެއް ވެސް ފުލުހުން އޭރަކު ނުބުނެ އެވެ.
އެ ޕިކަޕަކީ ފުލުހުންގެ އުޅަނދެއް ކަމަށް މިއަދު 'މިހާރު' ނޫހުން ރިޕޯޓުކުރުމުން ފުލުހުން ވަނީ މިކަމާ ގުޅޭ ގޮތުން މިރޭ ބަޔާނެއް ނެރެފަ އެވެ.
-
އިތުރަށް ކިޔާލަން - ހައިވޭގައި ސައިކަލަކާއި ޕިކަޕެއް ޖެހި، މީހަކު މަރުވެއްޖެ
ބުނީ ކީކޭ؟ - އެ ބަޔާނުގައި ފުލުހުން ބުނީ:
-
ފުލުހުންގެ ޕިކަޕް އެ ވަގުތު އެ ތަނުގައި އޮތީ، ހަތަރު ފުރޮޅުލީ އުޅަނދު ދުއްވާ ލޭނުގައި މަގަށް ދަތިވާ ގޮތަށް ކާރެއް ހުއްޓިފައި އޮތުމުން
-
އެ ވަގުތު ފުލުހުން މަސައްކަތް ކުރަމުން އައީ، ދުއްވާ އެހެން އުޅަނދުތަކުގެ ސަލާމަތާއި ރައްކާތެރިކަމަށް އެ ކާރު އެ ސަރަހައްދުން ނެގުމަށް
-
ހުއްޓިފައި އޮތް ކާރު ނެގުމަށް ޕިކަޕު މަޑުކޮށްގެން އޮތީ ވެހިކަލް މަޑުކޮށްފައި އޮތްކަން އަންގައިދޭ ހަތަރު ސިގްނަލް ޖައްސައިގެން
"އެކްސިޑެންޓް ހިނގާފައި ވަނީ އެ ކާރު ނެގުމަށް ފުލުހުންގެ ޕިކަޕެއް މަޑުކޮށްގެން އޮއްވައި އެކްސިޑެންޓްވި ސައިކަލު ބާރު ސްޕީޑްގައި ދުއްވާފައި އައިސް އެ ޕިކަޕްގެ ފަހަތުގައި ޖެހިގެން،" ފުލުހުންގެ ބަޔާނުގައި ބުނެފައިވެ އެވެ.
"މި އެކްސިޑެންޓްގެ މައްސަލަ ފުލުހުން ގެންދަނީ ތަހުގީގު ކުރުމުން."
އެއްގަމު އުޅަނދު ދުއްވުމަށް ކަނޑައަޅާފައިވާ ސްޕީޑަށް ވުރެ ބާރަށް އުޅަނދު ނުދުއްވުމަށާއި ޓްރެފިކް ނިޝާންތަކާ އެއްގޮތަށް އުޅަނދު ދުއްވުމަށް ފުލުހުން އެ ބަޔާނުގައި އިލްތިމާސްކޮށްފައިވެ އެވެ.
ކޮމެންޓް (2)
ލޭން
ޝައި