4 ސެޕްޓެމްބަރު 2021ގެ ރޭގަނޑުގަޑީ ވެމްކޯ މުވައްޒަފުން ކުނިނަގާތަން. ދައުރު ފޮޓޯ

ވެމްކޯ

ވެމްކޯއިން ކުނި ނަގާނީ މަހަކު 34 އަށް ވުރެ ގިނަ ކަރަންޓު ޔުނިޓު ބޭނުންކުރާ ގެތަކުން

އެއަށްވުރެ މަދުން ކަރަންޓު ބޭނުންކުރާ ނަމަ، މީހުން ނޫޅޭ ކަމަށް ބަލާ، އެގޭބިސީއަކަށް ކުނި އުކާލުމުގެ ފީ ނުނަގާނެ ކަމަށް ވެމްކޯއިން ބުނި
ޝަހުދާ މުހައްމަދު
23 މޭ 2023

މާލެ ސަރަހައްދުގެ ކުނި މެނޭޖު ކުރުމުގެ މަސައްކަތް ހަވާލުކޮށްފައިވާ ވެމްކޯ އިން ކުންޏަށް ފީ ނަގާނީ 34 އަށް ވުރެ ގިނަ ކަރަންޓް ޔުނިޓް ބޭނުންކުރާ ގޭބިސީތަކުން ކަމަށް އެ ކުންފުނިން ބުނެފި އެވެ.

ވީ ކިހިނެއް؟ - ވެމްކޯގެ މެނޭޖިން ޑިރެކްޓަރު ޔޫސުފް ސިރާޖު މިހެން ވިދާޅުވީ އިއްޔެ އެންވަޔަރަމެންޓް މިނިސްޓްރީން ބޭއްވި ނޫސްވެރިންގެ ބައްދަލުވުމެއްގައި ކަރަންޓު ބިލާއި ކުނި އުކާލުމުގެ ބިލު އެއްކޮށްލުމާ ބެހޭ ގޮތުން މައުލޫމާތު ދެއްވަމުންނެވެ.

ބުނީ ކީކޭ؟ - ސިރާޖު ވިދާޅުވި ގޮތުގައި:

  • ކުނި އުކާލުމުގެ ބިލް ވަކިން ދައްކަން ނުޖެހޭ ގޮތަށް ކަރަންޓް ބިލުގައި ވަކި 'ލައިން އައިޓަމް' އެއްގެ ގޮތުގައި ހިމަނައިގެން ފީ ނަގަން ފަށާނީ މި މަހުން ފެށިގެން

  • މި އުސޫލުން ފީ ނަގާއިރު ކޮންމެ 'އެކްޓިވް' ކަރަންޓް މީޓަރަކަށް 150ރ.ގެ ފިކްސްޑް ޗާޖެއް ނަގާނެ

  • އެކްޓިވް ކަރަންޓު މީޓަރެއްގެ ގޮތުގައި ބަލާނީ ކޮންމެ މަހަކު 34 ޔުނިޓަށް ވުރެ ގިނަ ޔުނިޓު ބޭނުންކޮށްފައި ހުންނަ ނަމަ

  • އެ އަދަދަށް ވުރެ މަދުން ކަރަންޓު ބޭނުންކުރާ ނަމަ ބަލާނީ އެތަނުގައި މީހުން ނޫޅޭ ކަމަށް

ސިރާޖު ވިދާޅުވި ގޮތުގައި 34 ޔުނިޓަށް ވުރެ މަދުން ކަރަންޓް ބޭނުންކުރާ ގޭބިސިތަކުގައި މީހުން ނޫޅޭ ކަމަށް ބަލާ ކުނި ނެގުމުގެ ފީ ނުނަގާނެ އެވެ. ޗުއްޓީއަށް ގޮސް އެއްވެސް މީހަކު ގޭގައި ނޫޅޭ މަސްތަކުގައި ކުނި ނަގަން ނުޖެހޭނެ ކަން ފާހަގަކޮށް، އެ މަސްތަކުގައި ކުނި ނަގަން ނުޖެހޭނެ ކަމަށް ސިރާޖު ވިދާޅުވި އެވެ.

މީގެ އިތުރުން ވެސް ކުނި ނެގުމުގެ ފީ ދެއްކުން އިސްތިސްނާވާ ބައެއް ހާލަތްތަކަށް ސިރާޖު އަލިއަޅުވާލެއްވި އެވެ. އެގޮތުން:

  • އެއްވެސް އެޕާޓުމަންޓެއް ނުހިމެނޭ ގޮތަށް ގޭގޭގެ އާންމު ސަރަހައްދުތަކަށް ލާފައި ހުންނަ ކަރަންޓު މީޓަރަށް ކުނި ނެގުމުގެ ފީ ޗާޖެއް ނުކުރާނެ

  • ލިފްޓުތަކަށް ލާފައި ހުންނަ ކަރަންޓު މީޓަރުތަކަށް ފީ ޗާޖެއް ނުކުރާނެ

  • ބައެއް އެޕާޓުމަންޓުތަކުގައި ވަކި ދެ މީޓަރު ލާފައި ހުއްޓަސް ފީ ނަގާނީ އެއް މީޓަރަށް

މިގޮތަށް ހުންނަ ތަންތަން ދެނެގަތުމަށް ވެމްކޯގެ ޓީމުތަކުން ސާވޭ ކުރަމުންދާނެ ކަމަށާއި މިފަދައިން ހުންނަ މީޓަރުތައް ރައްޔިތުންނަށް ކޮންމެ ވަގުތެއްގައި ރިޕޯޓު ކުރެވޭނެ ކަމަށް ވެސް ސިރާޖު ވިދާޅުވި އެވެ.

ދެ ބިލު އެއްކޮށްލައިގެން ފީ ނަގަން ފެށުމުން ރައްޔިތުންނަށް ވަރަށް ގިނަ ފައިދާ ވާނެ ކަމަށް ވެމްކޯ އިން ބުންޏެވެ. އެގޮތުން:

  • ވެމްކޯގެ ފީ ދައްކަން އުފުލަން ޖެހޭ ތަކުލީފުތައް ނިމުމަކަށް އައުން

  • ވެމްކޯގައި އިތުރަށް ރަޖިސްޓްރީ ވާން ނުޖެހުން

  • ކުރީ އެޕާޓުމަންޓުގެ ބިލު މިހާރުގެ ބިލުން އުނި ނުކުރެވިގެން އުޅޭކަށް ނުޖެހޭނެ

  • އެ ބަދަލުވިޔަސް އަލުން ރަޖިސްޓްރީ ކުރާކަށް ނުޖެހޭނެ

  • ގޭގެ ވެރިފަރާތުގެ ސިޓީއެއް ހޯދާކަށް ނުޖެހޭނެ

  • ފީ ނަގާނީ މީހުން ދިރިއުޅޭ ތަންތަނުގައި ލާފައި ހުރި މީޓަރުތަކަށް އެކަނި

  • ވެމްކޯގެ އޮޕަރޭޝަންސްތައް އިތުރަށް ހަރުދަނާކޮށް ފުޅާކުރަން މަގުފަހިވެ، މާލެތެރެ ސާފުތާހިރުކޮށް ބޭއްވޭނެ

  • ކުނި އުކާލުމުގެ ހިދުމަތަށް ދައްކަން ޖެހެނީ ކުރިންވެސް ދައްކަމުން އައި 150ރ.

އެނގުން މުހިއްމު - ސްޓެލްކޯގެ ކަރަންޓު ބިލަށް ކުނި އުކާ ފީ އިތުރުކޮށް، ދެ ބިލް އެއްކޮށްލައިގެން ފީ ނަގާގޮތަށް ނިންމީ މާލެ ސަރަހައްދުގައި ދިރިއުޅޭ ގިނަ ބަޔަކު ވެމްކޯގެ ކުނި އުކައިދޭ ހިދުމަތަށް ރަޖިސްޓްރީ ނުކުރުމާއި ފައިސާ ނުދެއްކުމުގެ ސަބަބުން އެ ކުންފުންޏަށް މާލީ ގޮތުން ބޮޑެތި ގޮންޖެހުންތަކެއް ކުރިމަތި ވެގެންނެވެ.

މި ބަދަލު ގެނެސް ދެ ބިލް އެއްކޮށްލައިގެން މެއި މަހުން ފެށިގެން ފީ ނަގަން ފެށުމާ އެކު، ކުނި ނެގުމުގެ ފީ ވެމްކޯއަށް ވަކިން ދައްކާކަށް ނުޖެހޭނެ އެވެ.

އިތުރަށް ކިޔާލަން:

ހަބަރު ވެމްކޯ މާލެ އެންވަަޔަރްމަންޓް އެންޑް ޓެކްނޮލޮޖީ މިނިސްޓްރީ ތިމާވެށި ކުނީގެ މައްސަލަ

އިތުރު އާޓިކަލް

އިތުރު އާޓިކަލް