ޑްރަގު މައްސަލައެއްގައި ފުލުހުންގެ ބަންދުގައި ހުރި މީހަކު ފިލައިފި

މަސްތުވާތަކެތީގެ މައްސަލައެއްގައި ފުލުހުންގެ ބެލުމުގެ ދަށުގައި ހުރި މީހަކު ރޭ ދަންވަރު ފިލައިފި އެވެ. މިއީ، ދެ ހަފްތާއެއްހާ ދުވަސް ތެރޭ މިގޮތަށް ފިލި ދެ ވަނަ މީހާ އެވެ.

ވީ ކިހިނެއް؟ - މި ފަހަރު ފިލާފައިވަނީ ގއ. ދާންދޫ ޕޮލިސް ސްޓޭޝަންގައި ހުރި މީހެކެވެ. މިކަމުގެ މައުލޫމާތު ފުލުހުންނަށް ލިބުނީ، ރޭ ދަންވަރު 12:57ގައި ކަމަށް ފުލުހުން ބުންޏެވެ.

ތަފްސީލު - ފުލުހުންގެ ތަރުޖަމާނު މިއަދު 'ދައުރު'އަށް ވިދާޅުވީ، ދާންދު ޕޮލިސް ސްޓޭޝަންގައި ހައްޔަރުކޮށްފައިވާ މީހަކު ފިލުމުން އޭނާ ހޯދުމުގެ މަސައްކަތް ކުރަމުންދާ ކަމަށެވެ.

ގުޅުން ހުރި - ފުލުހުންގެ ބެލުމުގެ ދަށުގައި ހުރި މީހަކު މި މަހު 2 ވަނަ ދުވަހު ވެސް ވަނީ ފިލައިފަ އެވެ. އއ. ރަސްދޫ ޕޮލިސް ސްޓޭޝަންގައި ހުއްޓާ ފިލި އެ މީހާ ހޯދާފައިވަނީ، ޖެހިގެން އައި ދުވަހު ކުރަމަތި ރިސޯޓު ކައިރިން ފަތާފައި ދަނިކޮށެވެ.