ރަސްދޫގައި ފުލުހުންގެ ބެލުމުގެ ދަށުގައި ބަހައްޓާފައި ހުއްޓާ ފިލި ޝަހުބާން
ރަސްދޫން ފިލި ކުށްވެރިޔާ ފަތާފައި ދަނިކޮށް ހޯދައިފި
އއ. ރަސްދޫ ޕޮލިސް ސްޓޭޝަންގައި ހައްޔަރުކޮށްފައި ހުއްޓާ ފިލި ގައިދީ، ކުރަމަތި ރިސޯޓް މޫދުގައި ފަތާފައި ދަނިކޮށް ފުލުހުން ދެންމެ ހޯދައިފި އެވެ.
ވީ ކިހިނެއް؟- ފުލުހުން ކުރިން ބުނެފައިވާ ގޮތުގައި، އއ. ހިމަންދޫ ހުސެން ޝަހުބާން، ފިލީ އޭނާ ބަހައްޓާފައި ހުރި ގޮޅިން ނެރެފައި ހުއްޓަ އެވެ.
ރޭ ދަންވަރުއްސުރެ ފުލުހުން އަންނަނީ ޝަހުބާން ހޯދުމުންނެވެ. އޭނާގެ ހަބަރެއް ވެއްޖެ ނަމަ، އެންގުމަށް މިއަދު ހަވީރު ވަނީ އާންމުންގެ އެހީއަށް ވެސް އެދިފަ އެވެ.
މަންޒަރު ދުށް މީހުން ބުނީ ޝަހުބާން ފެނުނީ ރަސްދުއާ ފަސްވަރަކަށް މިނިޓު ދުރުގައި އޮންނަ ކުރަމަތީ ރިސޯޓް ކައިރިން ކަމަށެވެ. ފުލުހުން އޭނާ ހައްޔަރުކުރީ އެ ރިސޯޓުގެ ލޯންޗުތައް ކައިރިން ފަތާފައި ދަނިކޮށް ކަމަށް ވެސް، އެކަކު ބުންޏެވެ.
ރަސްދޫ ފަދަ، ވަލެއް ނޯންނަ އަދި ކުޑަކުޑަ ރަށެއްގައި ކުށްވެރިއަކަށް ފިލައިގެން ނޫޅެވޭނެތީ، އޭނާ ފަތާފައި އެ ރަށުން ފޭބުމުގެ ފުރުސަތު ބޮޑު ކަމަށް ކުރިން ވެސް ބައެއް މީހުން ލަފާކުރި އެވެ. އަދި ފަތާފައި ކުރަމައްޗަށް އަރާފާނެތީ، މިއަދު ހަވީރުންސުރެ ފުލުހުން އައީ ކުރަމަތި ސަރަހައްދު ބަލަމުންނެވެ.
"ހަމަ ފެނުނު ތަނާ ފުލުހުން އަތުލައިގެންފި. މިހާރު އޭނާ ވަނީ ހަައްޔަރުކޮށްގެން ރަސްދޫ ޕޮލިސް ސްޓޭޝަނަށް ގެންގޮސްފައި،" މަންޒަރު ދުށް މީހަކު ބުންޏެވެ.
ފުލުހުން މިއަދު ބުނިގޮތުގައި:
-
ޝަހުބާނަކީ މަސްތުވާތަކެތި ބޭނުންކޮށް، އެތަކެތި ގެންގުޅެ، އަދި އޭގެ ވިޔަފާރި ކުރާ ކަމަށް ތުހުމަތުކުރެވޭ މައްސަލައެއްގައި ހައްޔަރުކޮށްފައި ހުރި މީހެއް ކަމަށް
-
އޭނާ ބަހައްޓާފައި ހުރީ، ޝަރީއަތުން ގޮތެއް ނިންމަންދެން ކަމަށް