މައުމޫނާއި ރައީސް ސޯލިހު މިއަދު ދުބާއީގައި ބައްދަލުކުރައްވަނީ: މައުމޫން ވިދާޅުވީ ކަންބޮޑުވުންތަކެއް ހިއްސާކުރެއްވި ކަމަށް. (ފޮޓޯ/މައުމޫންގެ ޓްވިޓާ)
ކަންބޮޑުވުންތަކަކާ އެކު މައުމޫން ދުބާއީގައި ރައީސްއާ ބައްދަލުކުރައްވައިފި
ރައީސް އިބްރާހިމް މުހައްމަދު ސޯލިހް، ވެރިކަން ކުރާ ކޯލިޝަންގައި ހިމެނޭ އެމްއާރުއެމްގެ ޒައީމް މައުމޫން އަބްދުލްގައްޔޫމްއާ ދުބާއީގައި މިއަދު ބައްދަލުކުރައްވައިފި އެވެ.
ވީ ކިހިނެއް؟ - ދުބާއީ އެކްސްޕޯއަށް ވަޑައިގެން ހުންނެވި ރައީސް ސޯލިހާއި ކުރީގެ ރައީސް މައުމޫން ބައްދަލުކުރެއްވީ ރައީސް ސޯލިހް ދުބާއީގައި ހުންނަވާ ހޮޓަލުގަ އެވެ.
ބުނީ ކީކޭ؟ - އެ ބައްދަލުވުމުގެ ފޮޓޯތަކާ އެކު މައުމޫން މިއަދު ކުރެއްވި ޓުވީޓެއްގައި ވިދާޅުވީ ރައީސް ސޯލިހާ އެކު ބައްދަލުކުރެއްވީ "މިހާރުގެ ހާލަތާއި އެމްއާރުއެމްގެ ކަންބޮޑުވުންތައް" ރައީސްއާ ހިއްސާކުރެއްވުމަށް ކަމަށެވެ.
"ކަންކަމާ މެދު ރައީސް ސޯލިހު ގެންގުޅުއްވާ ވިސްނުންފުޅާ މެދު އުފާކުރަން،" މައުމޫނުގެ ޓުވީޓުގައިވެ އެވެ.
އެ ބައްދަލުވުމުގެ ފޮޓޯތައް އާންމުކުރުން ފިޔަވާ އިތުރު އެއްޗެއް ރައީސް އޮފީހުން ނުބުނެ އެވެ.
މުހިންމުވަނީ ކީއްވެ؟ - ސަރުކާރުގެ ކޯލިޝަންގައި ހިމެނޭ އެމްއާރުއެމްގެ އެންމެ އިސް ވެރިޔާއާ އެކު ރައީސް ސޯލިހް މިއަދު ބައްދަލު ކުރެއްވި އިރު، ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް މުހައްމަދު ނަޝީދު ގެންދަވަނީ ރާއްޖޭގެ ވެރިކަމުގެ ނިޒާމު ބަރުލަމާނީއަށް ބަދަލުކުުރުމާ އެކު ގާނޫނުއަސާސީއަށް މުހިންމު ތިން އިސްލާހެއް ގެނައުމަށް ސިޔާސީ ލީޑަރުންގެ ތާއީދު ހޯއްދެވުމަށް މަސައްކަތް ކުރައްވަމުންނެވެ.
މައުމޫނަކީ އަބަދު ވެސް ބަރުލަމާނީ ނިޒާމާ ފާޅުގައި ދެކޮޅު ހައްދަވާ ބޭފުޅެކެވެ.