ކުމުންދޫ ފަޅުތެރޭ ބާނި ގަދަވެ ދޯނި ނެރަށް އަރާފައި.
ކުމުންދޫ ނެރުމައްޗަށް ދޯންޏެއް އަރައި މީހުންނަށާއި މުދަލަށް ގެއްލުން
ހދ. ކުމުންދޫ ނެރުމައްޗަށް މިއަދު ފެރީ ދޯންޏެއް އަރައި މީހުންނަށާއި މުދަލަށް ގެއްލުން ލިބިއްޖެ އެވެ.
ވީ ކިހިނެއް؟ - މިއަދު މެންދުރު 12:30 ހާއިރު އެ ހާދިސާ ހިނގީ، ކުޅުދުއްފުށީގައި އޮންނަ ހޮނިހިރު ބާޒާރަށް ދިޔަ މީހުންނާއި މުދަލާ އެކު އެނބުރި ކުމުންދުއަށް ގޮސް، އެ ރަށު ފަޅަށް ވަންނަން އުޅުމުގެ ތެރޭގަ އެވެ.
ތަފްސީލް - އެ ރަށު ކައުންސިލްގެ މެންބަރު އަލީ އަންވަރު މިއަދު 'ދައުރު'އަށް ވިދާޅުވީ، ކުމުންދޫ ފަޅުތެރެއަކީ އާންމުކޮށް ވަރަށް ބާނި ބޮޑު ސަރަހައްދެއް ކަމަށެވެ. މި ދުވަސްކޮޅު އާދަޔާ ހިލާފަށް ބާނި ބޮޑު ކަމަށް ވެސް އޭނާ ވިދާޅުވި އެވެ.
ދޯނި ފަޅަށް ވަންނަން އުޅުމުގެ ތެރޭގައި ނެރަށް އަރައި ދޯނީގައި ހުރި މުދަލަށާއި އޭގައި ތިބި މީހުންނަށް ގެއްލުން ލިބުނުއިރު ބައެއް މުދާ ފަޅުތެރެއަށް ދޫވި ކަމަށް ކައުންސިލަރު ވިދާޅުވި އެވެ.
"އެކެއްގެ އަތް ބިންދައިގެން ގޮސް، ބައެއް މީހުންނަށް އެކި ވަރުގެ ކުދި އަނިޔާ ވެސް ލިބުނު،" އޭނާ ވިދާޅުވި އެވެ.
ބުނީ ކީކޭ؟ - އަންވަރު ވިދާޅުވީ، މިހާރު ވެސް ރަށުގެ ބަނދަރު ހެދުމުގެ މަސައްކަތް ކުރަމުން އަންނަ ކަމަށެވެ. ކަނޑިންމަ އޮންނަ ގޮތުން ފަޅުތެރެއަށް ބޮޑެތި ރާޅުތައް ވަންނަ ކަމަށް އޭނާ ވިދާޅުވި އެވެ.
"މިއީ ގަދަ ދުވަސްކޮޅެއް ވެސް ނޫން،" އޭނާ ވިދާޅުވި އެވެ.
އަންވަރު ވިދާޅުވީ ފަޅުތެރޭގައި ބާނި ބޮޑުވެ ދިމާވާ މައްސަލަތައް ޕްލޭނިން މިނިސްޓްރީއާ ވެސް ރަސްމީކޮށް ހިއްސާކޮށްފައިވާނެ ކަމަށެވެ.