ޖޭޕީ ކެންޑިޑޭޓަކު ރިޔާސީ އިންތިހާބުގައި ވާދަ ކުރާނެ ކަމުގެ %99 ޔަގީންކަން އެބަ އޮތް: އަލީ ހުސައިން

މިހާރު ސަރުކާރު ކޯލިޝަންގައި އޮތް ޖުމްހޫރީ ޕާޓީއިން ކުރިއަށް އޮތް ރިޔާސީ އިންތިހާބަށް ވަކި ކެންޑިޑޭޓަކު ނެރެ ވާދަކުރާނެ ކަމުގެ ފުރިހަމަ ޔަގީންކަން އެބަ އޮތް ކަމަށް އެ ޕާޓީއަށް ނިސްބަތްވާ މަޖިލީހުގެ ކެންދޫ ދާއިރާގެ މެންބަރު އަލީ ހުސައިން ވިދާޅުވެއްޖެ އެވެ.

ވީ ކިހިނެއް؟ - އަލީ ހުސައިން މިގޮތަށް ވިދާޅުވީ، މި ހަފްތާގެ 'ދައުރު'ގެ ހަތް ސުވާލު ޕްރޮގްރާމްގައި ވާހަކަ ދައްކަވަމުންނެވެ. 

ބުނީ ކީކޭ؟ - "އަޅުގަނޑު ގަބޫލު ކުރާ ގޮތުގައި ހަމަ ގާތްގަނޑަކަށް %99 ޔަގީން ޖޭޕީން ކެންޑިޑޭޓަކު ނެރޭނެކަން... ކޮންގްރެސްގެ އިއްތިފާގުން އެންމެން އާނއެކޭ ބުނި ބަހެއް ބޮލާލާ ޖަހާނޭކަމަށް ގަބޫލެއް ނުކުރަން. އަދި ކޯލިޝަން ހަދައިގެން ބައެއްގެ ފަހަތަށް އަރައިގެން ދާން ޖެހޭ ވަރުގެ ސަބަބުތަކެއް ހުރިކަމަށްވެސް ގަބޫލެއް ނުކުރަން،" ދެވަނަ ދައުރަކަށް ކެންދޫ ދާއިރާއަށް ހަމަ ޖޭޕީގެ މެންބަރެއްގެ ގޮތުގައި އިންތިހާބުވެވަޑައިގެން ހުންނެވި އަލީ ހުސައިން ވިދާޅުވި އެވެ.

އެނގުން މުހިންމު - މިދިޔަ މަހު ފަހުކޮޅު ބޭއްވި ޖުމްހޫރީ ޕާޓީގެ ގައުމީ ކޮންފަރެންސްގެ އިއްތިފާގުން ފާސްކޮށްފައި ވަނީ:

އަލީ ހުސައިން ވިދާޅުވި ގޮތުގައި ގައުމީ ކޮންފަރެންސްގެ ގަރާރު ފާސްވީވެސް އެއާ ދެކޮޅަށް ވާހަކަ ދެއްކި ބޭފުޅުންވެސް ވޯޓު ދެއްވައިގެންނެވެ. އެ ގަރާރު ބޮލާލާ ޖަހައި، އިންތިހާބުގައި ވާދަ ނުކުރަން ޖުމްހޫރީ ޕާޓީގެ ކައުންސިލުން ނިންމައިފިނަމަ، އެއީ ޕާޓީގެ ކުރިމަގާ މެދު ވަރަށް ބޮޑަށް ސުވާލު އުފެދޭނެ ނިންމުމަކަށް ވާނޭ ކަމަށް އޭނާ ވިދާޅުވި އެވެ.

ޖޭޕީގެ ލީޑަރު ގާސިމް އިބްރާހިމްއަށް މިދިޔަ ރިޔާސީ އިންތިހާބުގައި ވާދަކުރުމުގެ ފުރުސަތު ގެއްލުނީ ޖަލު ހުކުމެއްގެ ސަބަބުންކަން ފާހަގަ ކުރައްވައި އަލީ ހުސެއިން ވިދާޅުވީ، މިފަހަރު އިންތިހާބު އަންނަ އިރު އޮތީ ކުރިން އޮތް ހާލަތެއް ނޫން ކަމަށާއި ހާލަތު މިހާރު ވަނީ ބަދަލުވެފައި ކަމަށެވެ.

"އިންތިހާބުތަކުގައި ވާދަކުރެވޭ ގޮތަށް ހާލަތު ރަނގަޅުވީމާ، އާންމު ރައްޔިތުންނާ އެންގޭޖްވުމަށް އޮތް ހަމައެކަނި ގޮތަކީ، އިންތިހާބުތަކުގައި ބައިވެރިވުން. އަދި ޕާޓީއަށް ލިބިފައިވާ ތާއީދުވެސް މިނެކިރާލަން ލިބޭނެ ހަމައެކަނި ފުރުސަތަކީ ރިޔާސީ އިންތިހާބުގައި ވާދަކުރުން،" އަލީ ހުސައިން ވިދާޅުވި އެވެ.

ޖޭޕީގެ ފަރާތުން ވާދަކުރައްވާނީ ގާސިމްތޯ ކުރި ސުވާލުގެ ޖަވާބުގައި އޭނާ ވިދާޅުވީ، ބޮޑަށް ބެލެވެނީ އެގޮތަށް ކަމަށެވެ.

"އެއީ ޖުމްހޫރީ ޕާޓީގައި މިވަގުތު އެންމެ ޕޮޕިއުލާ އަދި އެންމެ މީހުން ގަދަރުކުރާ މީހަކީވެސް ޕާޓީގެ ލީޑަރު އޮންރަބަލް ގާސިމް އިބްރާހިމްކަމަށްވާތީ،" އަލީ ހުސައިން ވިދާޅުވި އެވެ.

ޕާޓީ ތެރެއިން ޕްރައިމަރީއަކަށް ހުޅުވާލިޔަސް، ގާސިމްއާ ވާދަކުރާނެ ފަރާތެއް ހުންނާނެ ކަމަށް އަލީ ހުސައިން އަށް ގަބޫލެއް ނުކުރެއްވެ އެވެ. އަދި މި ދަނޑިވަޅުގައި ޕާޓީގެ ރޫހު ހުރީވެސް ގާސިމް ކުރިމަތިލުމަށް ކަމަށް އޭނާ ވިދާޅުވި އެވެ.

"އެހެން ގޮތަކަށް ދާނެ ކަމަކަށް އަޅުގަނޑަކަށް ގަބޫލެއް ނުކުރެވޭ،" އޭނާ ވިދާޅުވި އެވެ.

ފަސް މަންޒަރު - އާ ގާނޫނުއަސާސީ ތަސްދީގުކުރި ފަހުން ބޭއްވި ތިން އިންތިހާބުގެ ތެރެއިން 2008 އަދި 2013ގެ ރިޔާސީ އިންތިހާބުގައި ޖޭޕީގެ ލީޑަރު ގާސިމް އިބްރާހިމް ވާދަކުރެއްވި އެވެ. ނަމަވެސް، ދެވަނަ ބުރަށް ދިއުމަށް ބޭނުންވާ އަދަދަށް ދެ އިންތިހާބުގައި ވެސް ވޯޓު ލިބިވަޑައެއް ނުގަތެވެ.

ނަމަވެސް، ކުރިން އޮތް ތިން އިންތިހާބުގައި ވެސް ކޮންމެ ވެރިއަކަށް ވެސް ކާމިޔާބު ހޯއްދެވިފައި ވަނީ، ޖޭޕީއާ އެކު ކޯލިޝަން ހަދައިގެންނެވެ. އެ ޕާޓީ ވެފައިވަނީ ކޮންމެ އިންތިހާބެއްގެ ނަތީޖާ އަނބުރާލުމުގައި މުހިންމު ރޯލެއް އަދާ ކުރާ ޕާޓީއަކަށެވެ.