ތިލަފުށި: ސިނާއީ މައި މަރުކަޒަކަށް އެތަން ހެދުމުގެ މަޝްރޫއު ވަނީ ފަށާފައި
ސިނާއީ މަސައްކަތަށް ތިލަފުށިން ބިން ވިއްކާގޮތް ހާމަކޮށްފި
ފޭސްތަކަށް ބަހާލައިގެން ސިނާއީ ބޭނުމަށް ތިލަފުށިން ބީލަމުގެ އުސޫލުން ބިން ވިއްކާނެ ގޮތުގެ ތަފްސީލު އެޗްޑީސީން މިރޭ އާއްމުކޮށްފި އެވެ.
ވީ ކިހިނެއް؟- ސިނާއީ މައި މަރުކަޒަށް ތިލަފުށި ބަދަލުކުރުމުގެ މަޝްރޫއުގެ ދަށުން މިއީ، އެ ރަށުން ބިން ވިއްކާ ފުރަތަމަ ފަހަރެވެ. އެޗްޑީސީން ބުނި ގޮތުގައި ބީލަމުގެ އުސޫލުން ފުރަތަމަ ވިއްކުމަށް ހަމަޖެހިފައިވަނީ ތިލަފުށި 'ޒޯން އޭ'ގެ ބިންތަކެވެ.
ބީލަމުގެ އުސޫލުން ބިން ވިއްކުމަށް ހަމަޖެހިފައިވާ އުސޫލު:
-
އަމިއްލަ މީހެއް ނުވަތަ ކުންފުންޏެއްގެ ފަރާތުން ބީލަން ހުށަހެޅުން (ދިވެހިން އަދި ބޭރުގެ ފަރާތްތައް ހިމެނޭހެން)
-
ބީލަން ކާމިޔާބުކުރާ ފަރާތަކީ ދިވެއްސެއް ނުވަތަ ނުވަތަ ދިވެހި ކުންފުންޏެއް ނަމަ ބިން މިލްކުވުން
-
ބީލަން ކާމިޔާބުކުރާ ފަރާތަކީ ބޭރު މީހެއް ނުވަތަ ބޭރުގެ ކުންފުންޏެއް ނަމަ 99 އަހަރަށް ބިން ދޫކުރުން
-
ބީލަން ހުށަހެޅޭ އެންމެ ދަށް އަގަކީ އަކަފޫޓަކަށް 1،700 ރުފިޔާ
ބީލަމުގެ އުސޫލުން ބިން ވިއްކުމަށް ހަމަޖެހިފައިވާ މަރުހަލާތައް:
-
މަރުހަލާ 1: ޝައުގުވެރިވާ ބިމަށް 'އެކްސްޕްރެޝަން އޮފް އިންޓަރެސްޓް' (އީއޯއައި) ހުށަހެޅުން
-
މަރުހަލާ 2: އީއޯއައި ހުށަހަޅާފައިވާ ބިމަށް ބިޑްކުރުން
އެޗްޑީސީން ބުނި ގޮތުގައި ޝައުގުވެރިވާ ފަރާތްތަކުން ބީލަމުގެ އުސޫލުން ބިންގަތުމަށް ކުރިމަތިލުމަށް ހަމަޖެހިފައިވަނީ އޮންލައިން ޕޯޓަލްއެއް މެދުވެރިކޮށެވެ. އެ ޕޯޓަލް ހުޅުވާލާނީ، އެޗްޑީސީން ބުނި ގޮތުގައި މި މަހުގެ 7 ވަނަ ދުވަހު އެވެ.
ތިލަފުށިން ބައެއް ހިއްކައި، ސިނާއީ މައި މަރުކަޒަކަށް އެ ރަށް ބަދަލުކުރުމުގެ އަމާޒަކީ، ސަރުކާރުން ބުނެފައިވާ ގޮތުގައި، މާލެ ސަރަހައްދުގައި ކުރާ ސިނާއީ މަސައްކަތްތައް ތިލަފުއްޓަށް ބަދަލުކުރުމާ އެކު، ބިމުގެ ދަތިކަމާއި ބިމު ކުލި އުފުލޭ މައްސަލައަށް ހައްލެއް ގެނައުމެވެ.
ތިލަފުށީން ބިން ވިއްކައި ކުއްޔަށް ދޭން އިއުލާން ކުރިއަސް، އެ އިއުލާންގައި ފައިސާ ދައްކަން ޖެހެނީ އިންސްޓޯލްމަންޓަށް ކަމެއް ނުވަތަ އެއްފަހަރާ ކަމެއް ނޭނގެ އެވެ.