ކަރަންޓު ބިލުގައި ވެމްކޯގެ ފީ ހިމަނައި ބިލުކުރަން ފަށަނީ

ކުނި އުކާލުމުގެ ހިދުމަތުން ނަގާ ފީ ކަރަންޓު ބިލުގެ ތެރޭގައި ހިމެނުމަށް ވާން ޖެހޭ ތައްޔާރީތައް ވަމުން އަންނަ ކަމަށާއި ކަމާ ބެހޭ އިދާރާތަކާ އެކު އެ މަޝްވަރާ ކުރަމުން އަންނަ ކަމަށް، ކުނި އުކާލުމުގެ ހިދުމަތް ދޭ ސަރުކާރުގެ ކުންފުނި، ވެމްކޯ އިން މިއަދު ބުނެފި އެވެ.

ވީ ކިހިނެއް؟ - މާލެ ސަރަހައްދުގައި ކުނި އުކާލުމުގެ ހިދުމަތް ވެމްކޯ އިން ދެމުން އަންނައިރު، އެ ހިދުމަތް ހޯދާ ބައެއް ކަސްޓަމަރުން ބިލަށް ފައިސާ ނުދައްކާ މައްސަލަ އަކީ އެ ކުންފުންޏަށް ދިމާވެފައި އޮތް ބޮޑު މައްސަލައެކެވެ. އެ މައްސަލައަށް ހައްލެއް ހޯދުމަށް ފެން ނުވަތަ ކަރަންޓު ބިލުގައި ކުނި އުކާލުމުގެ ފީ ހިމެނުމުގެ ވާހަކަތައް ދެކެވޭތާ ދުވަސްތަކެއް ވެއްޖެ އެވެ.

ތަފްސީލް - ވެމްކޯގެ މެނޭޖިން ޑިރެކްޓަރު ޔޫސުފް ސިރާޖު މިއަދު 'ދައުރު'އަށް ވިދާޅުވީ:

"މިއީ ޓެކްނިކަލް ގިނަ ކަންތައްތަކެއް ހިމެނޭ ކަމެއް ވީމާ ސީދާ އެކަން ފެށޭނެ އިރެއް ދަންނަވަން ދަތި. އެހެން ނަމަވެސް، އިންޓަގްރޭޝަން، ޑޭޓާ ޝެއަރިން މަސައްކަތްތައް ވެމްކޯ އާއި ސްޓެލްކޯއާ ދެމެދު ކުރިއަށް އެބަދޭ. އަޅުގަނޑުމެން އަމާޒު ކުރަނީ މި އަހަރުގެ ފުރަތަމަ ކުއާޓަރުގެ ތެެރޭގައި ސްޓެލްކޯ މެދުވެރިކޮށް ބިލް ކުރަން ފަށަން،" ސިރާޖު ވިދާޅުވި އެވެ.

ސިރާޖު ވިދާޅުވީ ވެމްކޯގައި ރަޖިސްޓްރީކޮށްގެން ހިދުމަތް ހޯދާ 24،000 ކަސްޓަމަރުން މާލެ ސަރަހައްދުގައި އެބަތިބި ކަމަށެވެ. މީގެ ކުރިން ކަސްޓަމަރުންގެ އަތުން ފީ ހޯދުމުގައި ދަތިތައް ކުރިމަތިވި ނަމަވެސް، މިހާރު ރަޖިސްޓްރީކޮށްގެން ހިދުމަތް ހޯދާ %85 ކަސްޓަމަރުން ހިދުމަތަށް ފައިސާ ދައްކާ ކަމަށް އޭނާ ވިދާޅުވި އެވެ.