ޔާމީން ވެރިކަމަށް ގެންނަން އެކުގައި ތިބުމަށް ސެނެޓުން އަހުދުވެއްޖެ

މަނީ ލޯންޑަރިން އާއި ރިޝްވަތުގެ ދައުވާ ސާބިތުވެ، މިހާރު 11 އަހަރުގެ ޖަލު ހުކުމެއް ތަންފީޒު ކުރަމުންދާ އިދިކޮޅު ލީޑަރު، ކުރީގެ ރައީސް އަބްދުﷲ ޔާމީން މިނިވަން ކުރުމުގެ މަސައްކަތްކޮށް، އެމަނިކުފާނު ވެރިކަމަށް ގެނައުމަށްޓަކައި ޕީޕީއެމް-ޕީއެންސީގެ ސެނެޓް މެމްބަރުން އެކަތިގަނޑެއްގެ ގޮތުގައި ތިބުމަށް މިރޭ އަހުދުވެއްޖެ އެވެ.

ވީ ކިހިނެއް؟ - ޔާމީންގެ މައްޗަށް ކުރިމިނަލް ކޯޓުން މިދިޔަ އާދިއްތަ ދުވަހު އިއްވި ހުކުމަށް ފަހު، ފުރަތަމަ ފަހަރަށް ޕީޕީއެމް-ޕީއެންސީގެ އެންމެ ބާރުގަދަ ގުނަވަން، ސެނެޓުގެ ބައްދަލުވުމެއް ހ. މީރުމާގައި މިރޭ ވަނީ ބާއްވާފަ އެވެ.

ތަފްސީލު - ދެ ގަޑިއިރަށް ދިގުދެމިގެންދިޔަ މި ބައްދަލުވުމުގައި އޮތީ، ސެނެޓްގެ ރިޔާސަތުން ހުށަހެޅި ގަރާރެއް ފާސްކުރުމާއި ޔާމީން ޖަލަށްލުމާ ގުޅިގެން ސެނެޓަރުންގެ ޝުއޫރު ފާޅު ކުރުމެވެ.

ޔާމީނަށް އިއްވި ހުކުމް ބާތިލުކޮށް، އެމަނިކުފާނަށް "ދެމުުންދާ އަނިޔާތައް ހުއްޓާލައި، ވަގުތުން މިނިވަން ކުރުމަށް" އެ ގަރާރުގައި ވަނީ ގޮވާލާފަ އެވެ. އެ ގަރާރުގައި ބުނެފައި ވަނީ:

ގަރާރުގައި، ޔާމީން މިނިވަން ކުރުމަށް ކުރަން ޖެހޭ ބައެއް ކަންކަމަށް ވެސް އިގުރާރުވެފައިވެ އެވެ. އެގޮތުން ގަރާރުގައި ބުނީ:

"އެ ކަންކަން ކުރުމަށް ކުރަން ޖެހޭ އެންމެހާ މަސައްކަތްތަކެއް ކުރުމަށާއި [ޔާމީން] ރާއްޖޭގެ ރައީސުލްޖުމްހޫރިއްޔާގެ މަގާމަށް އިންތިހާބު ކުރުމަށް ކުރަން ޖެހޭ އެންމެހާ މަސައްކަތް ކުރުމަށާއި އެކަންކަން ކުރުމުގައި ޕްރޮގްރެސިވް ކޮންގްރެސްގެ ހުރިހާ މެންބަރުން އެކަތިގަނޑެއްގެ ގޮތުގައި ދެމިތިބުމަށް އަހުދުވެ، ބައިބައިވުން އުފެއްދުމަށް އަދާވާތްތެރިން ކުރަމުންދާ ކަންކަމުން ދުރުހެލިވުމުގެ އަޒުމް އައުކުރުމަށް،" ގަރާރު ހުށަހަޅާ ބޭނުމުގެ ގޮތުގައި، އެ ގަރާރު ނިންމާލަމުން ބުނެފައިވެ އެވެ.

މި ގަރާރު ފާސްކޮށްފައި ވަނީ، ހިޔާލުފާލުކުރެއްވި 42 ސެނެޓަރުން ހުށަހަޅުއްވި ބައެއް އިސްލާހުތަކާ އެކު، ބައްދަލުވުމަށް ވަޑައިގެންނެވި 89 ސެންޓަރުންގެ އިއްތިފާގުންނެވެ.

އެނގުން މުހިންމު - އާރަށުގެ މައްސަލައިގައި ޔާމީން 11 އަހަރަށް ޖަލަށް ލުމާ އެކު، 5 މިލިއަން ޑޮލަރުން ޖޫރިމަނާ ކުރަން ކްރިމިނަލް ކޯޓުން ހުކުމް ކުރީ، އެމަނިކުފާނު ޝަރީއަތުގައި ވިދާޅުވި ފަދަ، ޑޮލަރު ގަތުމުގެ މުއާމަލާތެއް ނޫންކަން ސާބިތުވާތީ އެވެ. އެގޮތުން: