ވެރިކަމުގެ ކޮންމެ ދުވަހަކު ވެސް މަސައްކަތް ކުރީ އެއްބައިވަންތަކަން ދަމަހައްޓަން: ރައީސް

ވެރިކަމުގައި މިހާތަނަށް ހޭދަކުރެއްވި ދުވަސްތަކުގެ ތެރެއިން ކޮންމެ ދުވަހަކު ވެސް މަސައްކަތް ކުރެއްވީ ދިވެހިންގެ އެއްބައިވަންތަކަން ދަމަހައްޓަން ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެެ އެވެ.

ވީ ކިހިނެއް؟ - މިއަދު ފާހަގަކުރާ ދިވެހިިންގެ އެއްބައިވަންތަކަމުގެ ދުވަހުގެ ޖަލްސާގައި ބައިވެރިވެވަޑައިގެން މ. ކޮޅުފުށީގަައި ވާހަކަ ދައްކަވަމުން ރައީސް ސޯލިހު ވިދާޅުވީ ރައްޔިތުންނަށް ހިދުމަތް ކުރައްވަން ނިކުންނެވި އިރު އެމަނިކުފާނުގެ ކުރިމަތީ އޮތް އެންމެ ބޮޑު އެއް ގޮންޖެހުމަކީ ދިވެހިންގެ ތެެރޭގައި ހަމަޖެހުމާއި ސުލްހަ އާއި އެއްބައިިވަންތަކަން ގެއްލި ބައިބައިވެފައި އޮތް އޮތުން ކަމަށެވެ.

ބުނީ ކީކޭ؟ - ރައީސް ވިދާޅުވީ އެއްބައިވަންތަކަމުގެ ދުވަސް ފާހަގަ ކުރަނީ ސުނާމީ ކާރިސާގައި ހާލުގައި ޖެހުނު މީހުންނަށް އެހީތެރިވުމަށް ދިވެހިން ދެއްކި ނަމޫނާ ފާހަގަ ކުރުން ކަމަށް ވިޔަސް، ރާއްޖެ އަށް އިރު އަރާ އިރުއޮއްސޭ ކޮންމެ ދުވަހަކީ ދިވެހިންގެ އެއްބައިވަންތަ ކަމުގެ ދުވަހެއް ކަމަށް ގަބޫލު ކުރައްވާ ކަމަށެވެ.

ސިޔާސީ ބޭނުންތަކަށް ޓަކައި ވަކި ބަޔަކު ގަސްތުގައި ހަމަޖެހުން ނަގާލަމުން ދިޔަ ކަމަށާއި އެކަމަށް ހައްލެއް ގެނައުމަށް މުޖުތަމައުގައި ހަމަޖެހުން ގާއިމު ކުރުމަކީ ފުރަތަމަ ކުރަންވީ ކަންތައް ކަމަށް ވިސްނިވަޑައިގެންނެވި ކަމަށް ރައީސް ވިދާޅުވި އެވެ.

ރައީސް ވިދާޅުވީ އެއްބައިވަންތަ ކުރެވޭނީ ހިދުމަތް ދިނުމުގައި ރައްޔިތުންގެ މެދުގައި ތަފާތުނުކޮށް ރައްޔިތުންގެ މެދުގައި ހަމަހަމަކަން ގާއިމްކޮށްގެން ކަމަށެވެ.

"އަސާސީ ހިދުމަތްތައް ފޯރުކޮށްދިނުމަށް އަޅުގަނޑުމެން ފެށި ކޮންމެ މަޝްރޫއެއްގެ އަމަޒަކީ ވަކި ރަށެއް ތަފާތުނުކޮށް ރާއްޖޭގެ ހުރިހާ ރައްޔިތުންނަށް އެ ހިދުމަތްތައް ފޯރުކޮށްދިނުން،" ރަައީސް ވިދާޅުވި އެވެ.

ސުނަމީ ކާރިސާގެ ހަނދާންތައް އާކުރައްވަމުން ރައީސް ވިދާޅުވީ އެދުވަހު ދިވެހިން ސާބިތުކޮށްދިނީ ޒަމާނުއްސުރެ ދިވެހިންގެ މެދުގައި އޮތް އެކުވެރިކަމާއި ކުލުނާއި ލޯބީގެ ވަރުގަދަ ގުޅުމުން ކިތަންމެ ބޮޑު ގޮންޖެހުމެއް ވެސް ހުރަސްކުރެވިދާނެ ކަން ކަމަށެވެ.

"މީހުން ދިރިނޫޅެވޭ ވަރަށް ބައެއް ރަށްރަށް ވީރާނާ ވެގެން ދިޔަ އަދި ވަރަށް ގިނަ ރަށްރަށަށް ބޮޑެތި ގެއްލުންތައް ލިބުނު. އެހެން ނަމަވެސް އެ ހިތާމަތައް ތަހައްމަލު ކުރުމުގައްޔާއި އެ ދަތިތައް ފޫބެއްދުމަށް ކުރި މަސައްކަތުގައި އެ ގެއްލުން ލިބުނު ރަށަކާއި ގެއްލުން ނުލިބޭ ރަށަކާ ތަފާތެއް ނެތް ކޮންމެ ބަޔަކު ވެސް އެބަޔަކަށް ވީ ވަރަކުން، ކެރި ފޯރުން ތެރިކަން ހުރި ވަރަކުން އަނެއް ބަޔަކަށް އެހީތެރިކަން ފޯރުކޮށްދެމުން ދިޔަ،" ރައީސް ވިދާޅުވި އެވެ.

ރައީސް އިތުރަށް ވިދާޅުވީ:

ކޮޅުފުށީ ރައްޔިތުންނަށް ރައީސް ވިދާޅުވީ އެރަށުގައި ގާއިމް ކުރުމަށް ރައްޔިތުން އެދޭ ހިދުމަތްތައް ގާއިމްކޮށްދެއްވާނެ ކަމުގެ ޔަގީންކަން ދެއްވާ ކަމަށެވެ. އެގޮތުން އެރަށުގައި ބޯފެނުގެ ނިޒާމު ގާއިމުކޮށް އިންޖީނު ގޭގެ މަސައްކަތް ކުރަމުންދާ ކަމަށާއި ރަށުގެ ގޮނޑުދޮށް ހިމާޔަތް ކުރުމުގެ މަސައްކަތް އަންނަ އަހަރުގެ ކުރީކޮޅު ފެށޭނެ ކަމަށް ރައީސް ވިދާޅުވި އެވެ. އަދި އެރަށުގައި 100 ހައުސިން ޔުނިޓު ގާއިމް ކުރުމުގެ މަސައްކަތް ބަޔަކާ ހަވާލުކުުރުމުގެ މަސައްކަތް މިހާރު ކުރިއަށް ދާ ކަމަށާއި ބޯހިޔާވަހި ކަމުގެ މަައްސަލައަށް ހައްލު ގެނެސްދެއްވާނެ ކަމަށް ރައީސް ވިދާޅުވި އެވެ.

އެނގުން މުހިއްމު - 2004 ވަނަ އަހަރުގެ ޑިސެމްބަރު މަހުގެ 26 ވަނަ ދުވަހު ކުރިމަތިވި ސުނާމީ ކާރިސާގައި އެންމެ ބޮޑަށް ގެއްލުން ލިބުނު ރަށްތަކުގެ ތެރޭ ހިމެނޭ މ. ކޮޅުފުށިން އެ ކާރިސާގައި 16 މީހުން މަރުވި އެވެ.